MARKA 8 - Laibaibal Thiang (BSI)

¹ Cu cân i mibu cu an tamtuk hringhran, eiawk le zeihmanh an ngei lo, Jesuh nih lamkaltu kha a kawh hna i an sinah,

² “Mibu hna hi atu nithum ka sinah an um cang, eiawk zeihmanh an ngeih lo caah ka zâng an fak tuk hringhran.

³ Rawl`âm i an inn leiah kan tlunter ahcun, lampi ah a buhri lai, zeitintiah a cheu cu lam hla in a rami an si,” tiah a ti.

⁴ A lamkaltu hna nih, “Ahonihdah hi bantuk ramking ah hi tluk a tammi minung hi rawl a pêk khawh lai?” tiah an ti.

⁵ “Changreu zeizatdah nan ngeih?” tiah a hal hna. Annih nih, “Pasarih” tiah an ti.

⁶ Mibu kha lei ah ṭhu dingin nawl a pêk hna. Changreu pasarih cu a lak i lawmhnâk bia a chim, a cheu hnuah, mibupi sin i phaw dingin a lamkaltu kha a pêk hna i mibu kha an phawt hna.

⁷ Nga tlawmpal an ngeihmi zong thluachuah a pêk i an sinah phawt dingin a chimh hna.

⁸ Cuticun khim tein an ei, an ei hlei zong a puam ngaimi sei sarih khat in an ruh.

⁹ A eitu hna cu mi thongli hrawng an si. Cun a tlunter hna.

¹⁰ Chikkhatteah tilawng ah a lamkaltu hna he an i cit i Dalmanutha ram an phân.

¹¹ Cun Farasih kha Amah el awkah an ra, Amah hneksaknâk caah van lei in hmelchunhnâk tuah kha an fial.

¹² Asinain anih cu a thlarau in a hrum ai i “Zeiruangahdah tuchan mi hna nih hmelchunhnâk thil lawng an kawl? Biataktein kan chimh hna, tuchan mi hna sinah hin hmelchunhnâk pêk an si hrimhrim lai lo,” tiah a ti.

¹³ A kaltâk hna i tilawng ah â cit ṭhân i va ralah a kal.

¹⁴ Lamkaltu hna nih changreu ken an rak philh i tilawng ah khan changreu pakhat dah ti lo cu zeihmanh an ngei lo.

¹⁵ Cun an sinah, “Farasih hna thilnu le Herod thilnu chungin ṭha tein i ralring u,” tiah a ti.

¹⁶ Annih nih, “Changreu kan ngeih lo ruang i a chimmi a si men lai,” tiah an ruah.

¹⁷ Jesuh nih a hngalh tikah, “Zeiruangahdah changreu nan ngeih lo ruang i cubantukin khua nan ruah? Atu tiangah nan theithiam lo i nan hngal kho hrim lo maw, nan lung a hak ko rih maw?

¹⁸ Mit nan ngei ko nain nan hmu kho lo maw? Hna nan ngei ko nain nan thei lo maw? Zeihmanh nan i cinken kho hrim lo maw?

¹⁹ Mi thongnga ca i changreu ka cheu lioah khan a hleimi sei zeizatdah nan ruh kha” tiah a ti. Annih nih, “Sei hleihnih,” tiah an ti.

²⁰ A si ah mi thongli ca i changreu pasarih ka cheu lioah khan a hleimi a nganmi sei zeizatdah nan ruh? A ti ṭhân hna i annih nih, “Sei sarih,” tiah an ti.

²¹ Cuticun an sinah, “Cutiasiah zeitindah nan lung a pem khawh lo?” tiah a ti.

²² Cuhnuah Bethsaida khua a phân i mitcaw pakhat a sinah an ratpi, amah cu tawng dingin an nawl.

²³ Anih nih mitcaw kut kha a tlaih i khua chungin a chuahpi. A mit ah cil a châk i a cungah a kut a chuan i khua a hmuhkhawh le hmuhkhawh lo kha a hal.

²⁴ Khua a hun chuan i, “Minung hna hi thingkung a kalmi bantukin ka hmuh hna,” tiah a ti.

²⁵ Cuticun a mit kha a tonghpiak ṭhân, a hun zohter ṭhân i zeizong vialte fiang te i hmu kho lakin a dam.

²⁶ Cun a in leiah a tlunter i, “Khua chungah lut hlah, khuachung mi hna zong ahohmanh chim hna hlah,” tiah a ti.

²⁷ Jesuh le a lamkaltu hna cu Sisaria ram Filipi khua ah an tlawng, lam i an kal lioah, lamkaltu kha, “Mi nih mizei anka ti dah?” tiah a hal hna.

²⁸ Annih nih, “Baptisma petu Johan, a si an in ti, midang nih Elijah, a si an in ti, cheukhat nih profet hna lakah pakhat khat a si, an in ti,” tiah an ti.

²⁹ Anih nih, “A si ah nannih nih mizei nan ka ti dah?” tiah a hal hna. Peter nih, “Krih na si,” tiah a leh.

³⁰ Anih nih a konglam kha ahohmanh chim lo dingin fak piin ralrin a pêk hna.

³¹ Cun anih nih, Mi Fapa nih harnâk tampi a teminnâk ding le, upa hna le, tlângbawi hna le, nawlbiacawnpiaktu hna nih an hlawt lainâk le, an thah lainâk le, nithum hnu i a thawhṭan lainâk kha cawnpiak a thawk hna.

³² Cu bia cu fanghlang tein a chim i Peter nih ka dangah a kalpi i sîk hram a thawk.

³³ Asinain anih cu â mer i a lamkaltu kha a zoh hna, Peter kha sîk pahin, “Satan, ka hnulei ah kal! Pathian thil ruat loin minung thil lawng na ruah caah a si,” tiah a ti.

³⁴ Mizapi kha a lamkaltu hna he a sinah a kawh hna i “Zulh a ka duhmi pauh cu, amah i hlaw sehlaw, a vailam put in ka zul seh.

³⁵ Zeitintiah a nunnâk himter a duhmi pauh nih a hloh lai i keimah le thawngṭha ruangah a nunnâk a hlohmi pauh nih a himter lai.

³⁶ Zeitintiah mi nih vawlei hi a dihlak in ngeiin, a nunnâk lo sehlaw a caah zeidah san atlaih hnga?

³⁷ Asiloah mi nih a thlarau thlennâk ah zeidah a pêk khawh lai?

³⁸ Zeitintiah tuchan ṭhangthar ṭangdang kai a hmangmi le misual hna lakah keimah le ka bia a zahpimi pauh, Mi Fapa nih, van mithiang hna he a Pa sunparnâk thuamin a rat tikah cu minung cu a zahpi ve lai,” tiah a ti.