MARKA 7 - Laibaibal Thiang (BSI)

¹ Cuhnuah farasih hna le nawlbiacawnpiaktu hna chungin mi zeimaw, Jerusalem khua in an ra.

² Cu hna nih, a lamkaltu cheukhat nih kut thur he rawl an ei kha an rak hmuh i an sawi hna, a thûr timi cu kut ṭawllo kha a si.

³ Zeitintiah farasih le Judah mi vialte nih upa hna phunglam kha fek tein an i tlaih caah, ṭha tein kut an ṭawl hlanah rawl an ei bal lo.

⁴ Market in inah an ṭin tik zongah an i kholhṭawl ta lo ahcun an ei bal lo. Zulh ding hrimhrim ah an i chanhchinmi zong tampi a um, hrai le bel, khêng le ṭhutdanh hna kholhṭawl zong a si.

⁵ Farasih le nawlbiacawnpiaktu hna nih, “Zeiruangahdah na zultu hna nih upa hna phung buarin kut ṭawl loin rawl an ei?” tiah an hal.

⁶ Anih nih, “Isaiah nih, nannih mi depde hna kong a rak chimmi hi a dik ngaingai. ‘Hi mi hna nih an kâ in anka thangṭhat i an lungthin in an ka hlat.

⁷ An i cawnpiakmi hi minung phung men a si i ankâ biakmi hi pakpalawng a si.’

⁸ Zeitintiah Pathian nawlpêk zei rel loin, minung phung nan i tlaih, hrai le ûmkhêng ṭawl le thil dangdang hna zong fekṭhup in nan i tlaih,” tiah a ti.

⁹ An sinah, “Nan phung tlaih nan i zuam ruangah Pathian nawlpêk tu nan hlawt.

¹⁰ Zeitintiah Moses nih, “Nanu le napa upat hna! ‘anu le apa thangchiattu cu thi ko seh,’ tiah a rak ti.

¹¹ Asinain nannih nih, “Mi nih anu le apa sinah, nan ca i san ka tlaihnâk cu Korban a si cang” a ti ahcun (Korban ti cu Pathian sinah pêkchanh, tinâk a si)

¹² anu le apa bomh nan sian ti lomi hi.

¹³ Cucaah nan i chanhchinmi nan phung ruangah Pathian bia hi sullam ngei loah nan canter tawn. Cubantuk cu tampi nan tuah,” tiah a ti.

¹⁴ Mibu kha a sinah a kawh hna i, “Ka bia hi ngai ulaw, a sullam zong hngal tuah u;

¹⁵ lenglei in minung paw chung i a lutmi nih mi a thûrter bal lo; minung chungin a rak chuakmi tu kha mi a thûrtertu cu a si.

¹⁶ Theihnâk ding i hna a ngeimi pauh nih thei seh,” tiah a ti.

¹⁷ Mizapi kha in chungah a luhtâk hna hnuah, a lamkaltu nih tahchunhnâk sullam kha an hal.

¹⁸ An sinah, “Nannih zong nih nan theithiam hlei lo maw? lenglei in minung paw chung i a lutmi zeihmanh nih minung a thûrter kho lo,

¹⁹ a lungthin chungah lut loin a pawpi ah a lut i êknâk ah a chuah ṭhân caah, ei ding vialte a thiang cang, timi hna hi nan thei thiam lo maw?

²⁰ Cun anih nih, “Minung chunglei in a chuakmi nih, cu nih cun minung cu a thûrter tawn.

²¹ Zeitintiah chunglei minung lungthin chungin khuaruahnâk sual kha a rak chuak tawn, ṭangdang kainâk, nupa sualnâk, lainawnnâk,

²² firnâk, hngarnâk, Ṭhatlonâk, hlennâk, hornâk, hnahchuahnâk, thangchiatnâk, porhlawtnâk le hruhnâk hna hi;

²³ cu thil vialte cu chunglei in a rak chuak i minung kha a thûrter tawn,” tiah a ti.

²⁴ Cu hmun cun a tho i Tair le Sidon ramah a kal. Inn pakhat ah a lut i a um tiah ahohmanh hngalh a duh lo, asinain â thuplan kho lo.

²⁵ Minu pakhat a fanu thlarau thur nih a tlaihmi nih a rak hngalh; a ra i a ke hramah a bawk.

²⁶ Nu cu Grik mi a si i Syro-Foinisiami in a chuakmi a si, anih nih a fanu chung i khuachia ṭhawl dingin a rak nawl.

²⁷ Asinain Jesuh nih, “Fa le hi an paw khim hmasa seh, zeitintiah fa le rawl lâkpiak i uico pêk cu a ṭha hnga maw?” tiah a ti.

²⁸ Anih nih, “A si ko, Bawipa, asinain, cabuai tang i uico nih fa le rawl ṭilfuan cu an ei tawn ko,” tiah a leh.

²⁹ Anih nih, “Cucu na chim cang bangin, kal kun, khuachia nih na fanu a chuahtâk cang,” tiah a ti.

³⁰ Cun inn a phâk tikah, a fanu cu khuachia nih a rak chuahtâk cang i ihkhun i a ih kha a va hmuh.

³¹ Cuticun Tair le Sidon ram kha a chuahtâk ṭhân i Dekapolis ram lan in Galili Rili kha a phân.

³² Cuka ah mi pakhat hnachêt, holh fianglo kha a sinah an ratpi i a cungah kut chuan dingin an nawl.

³³ Cupa cu mizapi sinin a dangah a kalpi i a kutdong in a hna kua kha a tonghpiak, cun a cil a châk i a lei kha a tonghpiak ṭhân,

³⁴ Van lei a zoh i thaw a lâk hnuah a sinah, “Ephatha” tiah a ti, cucu “Rak i ong cang” tinâk a si.

³⁵ Chikkhatteah a hna cu a awng, a lei ṭemnâk kha a poih i fiang tein a holh kho.

³⁶ Cun a sinah, ahohmanh chim hlah, tiah nawl a pêk, asinain fak piin an aupi chinchin.

³⁷ Mak an ti ngaingai i, “Anih nih cun thil vialte hi a ṭhatter dih a si ko hih. Hnachetmi hna a awnter i holh kho lomi zong a holhter hna,” tiah an ti.