MARKA 6 - Laibaibal Thiang (BSI)

¹ Cuhnuah cuka in a chuak i a tlawnlennâk ramah a kal, a lamkaltu hna nih an zulh.

² Sabbath ni a phâk tikah sinagog ah cawnpiak a thawk hna. A cawnpiaknâk a ngaitu kha an lung a suk hna, “Hipa nih hin hi thil hna hi khuazeiindah a hmuh hnga? A sin i pêkmi fimnâk hi zeidah a si? A kut in hi tluk a nganmi thil hna a tuah khawhmi hi? tiah an ti.

³ Hipa hi Mary fapa, Jeim le Joses le Judas le Simon hna u, zungthiampa kha a si lo maw? A far le zong kan sin i a ummi hi an si lo maw?” tiah an ti. Cuticun Amah cu zeiah an rel lo.

⁴ Jesuh nih, “Profet cu amah khua le a rualchan hna le a innah dah ti lo, thangṭhat loin a um bal lo,” tiah a ti.

⁵ Cubangin mizaw tlawmte cung i a kut a chuan i a damter hna dah ti lo, cuka ah cun thillianngan a tuah kho lo.

⁶ An zumh lo ruangah a khuaruah a har ngai. Cuticun cawnpiak pah in khuate kha a tlawng.

⁷ Hleihnih kha a kawh hna i thlarau thûr cungah nawlngeihnâk kha a pêk hna i pahnih duahmah in a thlah hna.

⁸ An khual tlawnnâk ah ṭhiangṭhunh dah ti lo, changreu, zal le an taisawm i phaisa zong zeihmanh i ken lo dingin nawl a pêk hna;

⁹ asinain kedan tu cu a danhter hna, angki zong pahnih thonh lo ding tiah a ti hna.

¹⁰ Amah ṭhiamṭhiam nih, “Khuazeihmanh ah, nan chuah ṭhân hlan tiang nan tlun innah um peng u.

¹¹ An cohlang duh lomi hna cu, cu hmun nan chuahtâk lai ah, an tuahmi a ṭhat lo zia an hngalh khawh nâkhnga, nan ke leidip nan thin ta lai. Biataktein kan chimh hna, biaceihni ah cun cu khua hna nih an tuar hngami cu Sodom le Gomorah tuarmi nâk in ṭih a nung deuh lai,” tiah a ti.

¹² Cuticun an kal i mizapi kha sualnâk i ngaihchih dingin phungkha an chimh hna;

¹³ Khuachia tampi an ṭhawl i mizaw tampi zong sathau an thuh i an damter.

¹⁴ Cubangin Jesuh min cu a thang chinchin i Herod siangpahrang zong nih a rak theih. “Baptisma petu Johan kha thihnâk in a tho ṭhân a si cu ta, cucaah cubantuk ṭhawnnâk nih amah ah rian a ṭuannâk cu a si,” tiah a ti.

¹⁵ Mi dang nih Elijah a si, tiah an ti. Mi dang nih, ‘Profet a si, asilohmanh ah profet pakhat khat a si ko lai,’ tiah an ti.

¹⁶ Asinain Herod nih cun a rak theih ka tein, “A lu ka tanmi Johan kha a si hrimhrim ko lai; thihnâk in a tho ṭhân a si ko lai,” tiah a ti.

¹⁷ Herod cu Johan tlaitu le thong i a thlatu a si, zeitintiah a nau Filip nupi Herodi kha nupi ah a rak ngeih ruangah cu thil a tuahnâk cu a si.

¹⁸ Johan nih Herod sinah na nau nupi na chuh hi phungning a si lo tiah a rak ti cang.

¹⁹ Cucaah Herodi nih amah kha a huat tuk i thah tiang a duh, asinain a duhning cun a tuah kho lo,

²⁰ zeitintiah Herod nih Johan cu miding le mithiang a si a hngalh caah a kilven. A phungchim kha lung lawm tein a ngaih tawn caah thil tampi kha a tuah tawn.

²¹ Cuticun Herod chuah ni a phâk tikah a mi lianngan le, bawi hna le, Galili ram mirum hna rawl a dangh hna lioah cân rem a rak um.

²² Herod fanu kha lut in a lâm i Herod le a rawl eipi mi kha a lawmhter hna. Cun siangpahrang nih ngaknu cu, na duhmi ka hal, kan pêk lai, tiah a ti.

²³ Na halmi pauh cu ka penmi ram hnarcheu tiang hmanh kan pêk ko lai, tiah chiatserh in bia a kam.

²⁴ Anih cu a va chuak i a nu sinah, “Zeidah ka hal lai?” tiah a va ti i anih nih, “Baptisma petu Johan lu siseh,” tiah a rak ti.

²⁵ Siangpahrang sinah khulrangin a rak lut i, “Baptisma petu Johan lu khengin ka pe cawlh law ka duh,” tiah a va ti.

²⁶ Siangpahrang cu a ngaih a chia ngaingai, asinain chiat â rak serh cangmi le rawl a ei pimi hna ruangah a rak el ngam ti lo.

²⁷ Cun siangpahrang nih vengtu ralkap pakhat a thlah cawlh i a lu rak pu dingin nawl a pêk. Anih nih thawng chungah a lu kha a va tan.

²⁸ A lu cu kheng in a rak put i ngaknu kha an pêk i anih nih a nu kha a pêk.

²⁹ Cu bia cu a zultu hna nih an theih tikah a ruak kha an va hlawm i thlân ah an vui.

³⁰ Cun Lamkaltu kha Jesuh sinah an rak tlung, an tuahmi thil le an cawnpiakning vialte kha a sinah an chim.

³¹ Anih nih, “Hmun kingah kal usih law, cân tlawmpal i din u sih,” tiah a ti hna. Mi tampi an lut an chuak i rawl hmanh an ei manh lo.

³² Cuticun hmunking lei ah tilawng in an va kal.

³³ Asinain mibu nih an kal lai kha an hmuh, mitampi nih Amah a si kha an hngalh, cuticun khuakip tein ke in an ra. An i tinhmi hmun an phâk hlanah mizapi nih an rak phâk kanh diam hna i a sinah an phân.

³⁴ Jesuh cu tilawng in a hung chuak i mibu cu tluk tam cu a hmuh hna tikah, khâltu a ngei lomi tuu bantuk an si caah a zângfah ngaingai hna i bia tampi a cawnpiak hna.

³⁵ Khua a tlai tikah, a lamkaltu kha a sinah an ra, “Hihi hmunking a si, khua le a hnu cang.

³⁶ Hika hrawng khua le hi ram hrawngah hin eiawk an i cawk khawh nâkhnga ṭirter hna, zeitintiah eiawk zeihmanh an ngei ti lo,” tiah an ti.

³⁷ Anih nih, “Nanmah nih eiawk pe hna u” tiah a leh hna. Annih nih, “Ngamu zahnih man changreu kan va cawk lai i eiawk kan pêk hna lai maw?” tiah an ti.

³⁸ Anih nih, “Changreu zeizat dah nan ngeih? hun zoh hnik u,” tiah a ti. An ngeih zat cu an hngalh hnu ah,

³⁹ anih nih an dihlak in ram hring cungah a bu buin ṭhutter dingin lamkaltu kha nawl a pêk hna.

⁴⁰ Cuticun mi zakhat, sawmnga, tiin an ṭhutter hna.

⁴¹ Cun changreu panga le nga pahnih kha a lâk i vanlei zohin thluachuah a pêk, cun changreu kha a cheu i mizapi sinah phaw dingin lamkaltu kha a pêk hna; nga pahnih zong an dihlak sinah a phawt hna.

⁴² Cuticun an dihlak in khim tein an ei.

⁴³ Changreu le nga a hleimi an rut tikah sei hleihnih tiangin an ruh.

⁴⁴ Changreu eitu hna cu patling lawngte hmanh thong nga an si.

⁴⁵ Hmakhatteah mizapi kha a ṭinter hna lioah varal lei ah Bethsaida khua i kal hmasa dingin lamkaltu kha tilawng ah citter in a kalter hna.

⁴⁶ An kal hnuah thlacam dingin tlângah a kal.

⁴⁷ Zanlei a si tikah, tilawng cu tidil laifang ah a um i anih cu amah lawng ram chungah a um.

⁴⁸ Cu cân ah thli nih an tilawng cu anmah lei hoih in a nam hna ruangah an buaining kha a va hmuh hna. Zinglei suimilâm pathum hrawngah tidil cungah ke in an umnâk lei kha a panh i lanhtâk a timh hna.

⁴⁹ Cubangin ti cung i ke in a kal kha an rak hmuh tikah mithla ah an ruah i an ai,

⁵⁰ zeitintiah an dihlakin Amah cu an hmuh i an buai. Asinain anih nih a kawh hna i “Keimah ka si, ṭih hlah u,” tiah a ti hna.

⁵¹ Cuticun tilawng ah an sinah a lut ve i thli cu a dai. Anmah le anmah a ruahawk hngallo tiangin awlawk chongin an um i mak an ti ngaingai.

⁵² Zeitintiah an lungthin a hahtuk ruangah, changreu kong hmanh kha an thei thiam kho lo.

⁵³ Cuticun varal an kai i Genesaret ram an phân, tikam ah tilawng kha an hrên.

⁵⁴ Tilawng in an rak chuah tikah mizapi nih Amah kha an hngalh cawlh,

⁵⁵ cu ram vialte ah an tli i a um ti an rak hngalhnâk hmunkip in mizaw kha an ihkhun he an rak zawnh hna.

⁵⁶ Khua hme le, khua ngan le, ramlak le, khuazei a luhnâk pauh ah mizaw kha chawdawr ah ihter in, a puanki an tongh khawh nâkhnga an nawl hna i a tawngtu pauh an dam dih.