MARKA 5 - Laibaibal Thiang (BSI)

¹ Cuticun tiva ral, Gadarin mi hna ramah an phân.

² Tilawg chungin an chuah hnu ah, mi pakhat, thlarau thur a ngeimi, thlân chungin a rak chuakmi nih hmakhatteah a rak ton,

³ cupa cu thlânah a um tawn i ahohmanh nih an ṭêmbawh kho lo, cikcîn hmanh in an ṭêmbawh kho lo,

⁴ hrêng le cikcîn zongin an ṭêm tawn. Cikcîn kha a chah dih i hrêng zong a khiah dih hna; ahohmanh nih an hrem kho lo.

⁵ Chun zan hlan in thlân le tlâng cungah a ai tawn i lung in amah le amah â ah tawn.

⁶ Anih nih hlat piin Jesuh a hmuh tikah a rak tli i a biak.

⁷ Aw thangpi in a au, “Jesuh, Pathian Cungnungbik Fapa, kei le nang nih zeidah pehtlainâk kan ngeih? Dân ka tat sawh hlah, tiah Pathian min in kan nawl,” tiah a ti.

⁸ Zeitintiah Amah nih, “Nang, thlarau thurpa, mipa chung in chuak tuah,” a rak ti diam cang.

⁹ Anih nih, “Na min zeidah a si,” tiah a hal, “Ka min cu tampi a si, zeicatiah tampi kan si,” tiah a ti.

¹⁰ Cu ram in a ṭhawl hna nâkhnga lo biatak tein an nawl.

¹¹ Cuka hrawng tlang pangah vawkrual tampi rawl kawl in an tlong.

¹² Cubangin khuachia nih vawkrual sinah kalin an chungah kan luh khawh nâkhnga nawl kan pe ko tiah an nawl.

¹³ Jesuh nih nawl a pêk hna. Cuticun thlarau thur kha an chuak i vawk chungah an lut, (thonghnih hrawng an si); cuticun vawkrual hna cu lungpangah an zuang i tili chungah lut in an thi dih.

¹⁴ Vawk a zuatu kha an zâm i khuachung le a pawngkam ramah cu kong cu an thanh. Cuticun cu thil zoh awkah mi kha an ra.

¹⁵ Jesuh sin an rak phâk tikah, khuachia tampi nih a tlaihmi pa, hnipuan i hruk in lungfim te i a ṭhut ko kha an hmuh i an ṭih ngaingai.

¹⁶ Cun thil umtuning a rak hmutu hna nih khuachia tuahmi pa cung i thil a cangmi le vawk kong kha mi an chimh hna.

¹⁷ Cu hna nih Amah cu an ram chuahtâk dingin an nawl.

¹⁸ Tilawng i cit â timh tikah, khuachia tuahmi pa nih Jesuh sin i um peng dingin a nawl.

¹⁹ Asinain Jesuh nih a senh lo, “Na inah na hawi le sinah va tlung law Bawipa nih na ca i an tuahpiakmi a lianhnganning le an zângfahnâk kong hi va chim hna,” tiah a ti.

²⁰ A kal i Dekapolis khua ah Jesuh nih a ca i thil a tuahpiakmi lianhnganning kha a tlang aupi i mi vialte nih mak an ti ngaingai.

²¹ Jesuh cu tilawng in varal a rak phâk ṭhân tikah mi tampi an ra, Amah cu tidil kamah a um ko rih.

²² Cun zohhmanh sinagog uktu hna lak i mi pakhat, a min Jairu timi a ra, a hmuh le cângkâ a ke hramah a bawk i

²³ “Ka fanu ngakchiate a thi dengmang i na rat i a cungah na kut na chuan ahcun a dam ko lai,” tiah a nawl.

²⁴ Jesuh nih a zulh i mi tampi nih an zulh i an hnor lengmang.

²⁵ Cubangin nu pakhat cu kum hleihnih chung thichuak zawtnâk in a zaw,

²⁶ sibawi tampi sinah â zohkhenh cang. A ngeihmi vialte zong a dih cang i ṭhat deuh lei si loin a zual chin chin.

²⁷ Cunu nih Jesuh kong a rak theih tikah mibu karlak ah a hnulei in a ra i a puan kha a tongh.

²⁸ Zeitintiah a puan hmanh kha tawng ninglaw, damter ka si ko lai, tiah a lungin a ti.

²⁹ Chikkhatteah a thichuak cu a dam cawlh, a zawtnâk in ka dam ti cu amah nih a hngalh.

³⁰ Jesuh nih a chungin thiltikhawhnâk a chuak, ti kha a hngalh i mizapi kha a zoh len hna i “Hodah ka puan a tawng?” tiah a ti.

³¹ Asinain a lamkaltu hna nih, “Mizapi nih hi tlukin an in hnorngen lengmang hi na hmu ko nain, zeitindah ahonihdah aka tawng, na ti khawh ê? tiah an ti.

³² Asinain cu thil a tuahtu hmuh duhah anih cu â mer lengmang ko.

³³ Cutikah minu nih a tuahpiakmi thil kha hngalin, ṭih le ther buin a ra i a hmaiah a bawkin a umtuning vialte kha a chimh dih.

³⁴ Anih nih, “Ka fanu, na zumhnâk hi na dampi. Hnangam tein kal law, na zawtnâk in va dam cang,” tiah a ti.

³⁵ Bia a chim lioah, sinagog uktu inn in mi an ra i, “Na fanu a thi cang. Zeiruangahdah cawnpiaktu hi na buaiter ko rih lai? tiah an ti.

³⁶ Jesuh nih an chimmi kha a rak theih tikah, sinagog uktu sinah, “Na thin phang hlah, zum ko,” tiah a ti.

³⁷ Peter le Jeim le Jeim unau Johan dah ti lo cu ahohmanh zulh a siang hna lo.

³⁸ Cuticun sinagog hotu inn an phâk tikah, a ṭap lenmi hna le, a ai thluahmahmi le ai tuai lenmi kha a hmuh hna.

³⁹ A luh tikah, “Zeiruangahdah hnâ nan cheh i nan ṭah? Ngakchia cu a thi lo, â hngilhmi a si,” tiah a ti.

⁴⁰ Annih nih an rak nihsawh. Asinain an dihlak in a chuahter hna, ngakchia nu le pa le a sin i a ummi lawng â kalpi hna i ngakchia umnâk ah an lut.

⁴¹ Cuticun ngakchia kut kha a tlaih i, “Talitha kumi!” tiah a ti. Cucu, “Nute, tho tuah kan ti,” tinâk a si.

⁴² Hmakkhatteah nu ngakchia te cu a tho i a kal; amah cu kum hleihnih mi a si. Cun annih cu a ngan ngaimi khuaruahharnâk nih a tlaih hna.

⁴³ Asinain cu thil cu ahohmanh chim lo dingin fakpi in nawl a pêk hna, cun nute cu eiawk pe dingin a chimh hna.