MARKA 3 - Laibaibal Thiang (BSI)

¹ Cun sinagog ah a lut ṭhân i cuka ah mi pakhat kutzeng a rak um.

² Sual an phawt khawh nâkhnga, Sabbath ni ah a damter lai le damter lai lo kha an ngiat ko.

³ Anih nih kutzeng sinah, “Hmai ah rak chuak,” tiah a ti.

⁴ Cuticun an sinah, “Sabbath ni ah ṭhatter maw thiang chiatter? nunnâk khamh maw thiang thah dah?” tiah a hal hna. Asinain dai tein an um.

⁵ Thinhung ngaiin a zoh hna, an lung a khawntuk ruang i lung fak ngaingai in, cu pa sinah cun, “Na kut thlir,” tiah a ti. A hun thlir tikah a kut cu khatte lei bantuk in a dam.

⁶ Farasih kha an chuak i Herod minung hna he i fonh zau in Amah an thah khawh nâkhnga khua an khâng.

⁷ Asinain Jesuh cu a lamkaltu hna he rili lei ah an kal. Cuticun Galili ram le Judia ram le,

⁸ Jerusalem le Idumia ram le Jordan varal le, Tair le Sidon khua hna in khuaruahhar a tuahmi kong an rak theih tikah a sinah mi tampi an ra.

⁹ Zapi nih hna an hnawhtuk sual nâkhnga lo tilawng pakhat rak timtuah dingin lamkaltu kha a chimh hna.

¹⁰ Zeitintiah mi tampi a rak damter cang hna caah zawtnâk a ngeimi pauh nih Amah kha tongh cio an timh.

¹¹ Thlarau thur zong nih an hmuh tikah, a hmai ah an bawk i, “Nang cu Pathian Fapa na si,” tiah an au tawn.

¹² Asinain anih nih a konglam phuanglo dingin ralrin a pêk tawn hna.

¹³ Cun tlâng cungah a kai i a duhmi pauh kha a kawh hna i a sinah an ra.

¹⁴ Cuticun anmah chungin mi hleihnih a ruah hna i annih cu a sinah um peng ding le phungchim i a thlah ding an si caah,

¹⁵ khuachia ṭhawl khawhnâk le mizaw damter khawhnâk a pêk hna;

¹⁶ Cu hna cu, Simon, Peter tiah min a sakmi,

¹⁷ Zebedi fapa Jeim le Jeim unau Johan, cuhna cu, ‘Boanerges’ A ti hna, cucu ‘Khuari fale’ tinâk a si.

¹⁸ Andria, Filip, Bartholomi, Matthai, Thomas, Alfai fapa Jeim, Thadia, Kanaan mi Simon le

¹⁹ Amah rawitu Judas Iskariot an si. Cun inn chungah an lut.

²⁰ Mibu kha an ra ṭhân i rawl hmanh siarem tein an ei kho lo.

²¹ A chungle nih an theih tikah, “A hrut cang a si cu,” tiah Amah lak awkah an rak pawk.

²² Jerusalem khua in a rami nawlbiacawnpiaktu hna nih, “Belzebul he â pehtlaimi a si. Khuachia bawi a si caah pei khuachia a ṭhawl khawh ko cu,” tiah an rak ti ve.

²³ Jesuh nih a auh hna i tahchunhnâk in, “Satan nih zeitindah Satan cu a ṭhawl khawh lai?

²⁴ Bawi pennâk zong amah le amah â doh ahcun zeitindah a pennâk a hmunh khawh lai?

²⁵ Chungkhar zong an i doh ahcun cu chungkhar cu a dir kho lai lo.

²⁶ Satan zong amah le amah â doh i â ralchanh ahcun a dir kho lai lo. A lo ral ko lai.

²⁷ Ahohmanh nih miṭhawng innah lut in cu miṭhawngpa cu an ṭem hmasat lo ahcun a chawva cu an lâkpiak kho lai lo. An ṭem hnu lawngah cu inn cu an bauh khawh lai.

²⁸ Biataktein kan chimh hna, minung fapa hna sualnâk vialte le (Pathian) an cawhdehnâk vialte zong ngaihthiam an si ko lai,

²⁹ asinain Thiang Thlarau cawhdehtu cu ngaihthiam an si kho lai lo, zungzal thiamlo conâk cu an co ding a si,” tiah a chimh hna.

³⁰ “Thlarau thur he an i peh” an ti ruangah cu bia cu a chimnâk a si.

³¹ Cuticun a nu le a nau le kha an ra i lengah dir in Amah kotu mi an fial.

³² A pawngah mizapi an ṭhu i a sinah, “Zohhmanh, lengah na nu le na nau le nih an in kawl,” tiah an ti.

³³ Anih nih, “Ka nu le ka nau le cu ahodah an si?” tiah a leh hna.

³⁴ A pawng i a ṭhumi hna cu a hei zoh hna i, “Ka nu le ka nau le cu hi hna hi an si,”

³⁵ Zeitintiah Pathian duhnâk a tuahmi pauh cu, ka nau le, ka far le, ka nu le an si,” tiah a ti.