MARKA 16 - Laibaibal Thiang (BSI)

¹ Sabbath ni a dih tikah, Mary Magdalin le Jeim nu Mary le Salom an rat i a ruak thuh awkah zihmui kha an cawk.

² Zarhkhat chung ni hmasatbik zingka ni a chuah hnu ah thlân cu an va phân.

³ Anmah le anmah an i caih i, “Ahonihdah thlân kharnâk lung a kan thawnpiak lai” tiah an ti.

⁴ Asinain an va zoh tikah, lung cu thawn cia in an va hmuh, a ngan ngai ngaimi lung a si.

⁵ Thlân chungah an lut i tlangval pakhat, puanrang aih in thlân orhlei kam i a ṭhumi kha an va hmuh i an lau ngai ngai.

⁶ Asinain anih nih, “Lau hlah u, an khenhchihmi Nazaret Jesuh kha nan kawl si kaw, A tho ṭhân cang! Hika ah a um ti lo. Zohhmanh u an chiahnâk hi.

⁷ Va kal ulaw, a lamkaltu hna le Peter kha va chim hna u, Galili ramah nan hmaiah a kal lai, nan sinah a rak chim cang bangin cuka ah nan hmuh lai, tiah nan chimh hna lai,” tiah a ti.

⁸ Annih cu thinphâng in an ther i thinlau ngaiin thlân in an tlung. An thin a phântukah ahosin hmanh ah an chim lo.

⁹ Cun zarhkhat chung ni hmasa bik zingka te i a thawhṭan ah khan Mary Magdalin a chung i khuachia pasarih a `hawlpiakmi sinah â langh hmasa bik,

¹⁰ Amah he a rak umṭi cangmi hna sinah a va kal i mithi ngai i an ṭah lioah a va chimh hna.

¹¹ A nung cang ti le nu nih a hmuhnâk kong an theih nain an zum lo.

¹² Cuhnuah an lakah mi pahnih kâ dang i a kalmi hna mit hmuh ah phun dangin â langh ṭhân.

¹³ Annih nih lamkaltu dang kha an va chimh hna, asinain an chimmi zong cu an zum hlei lo.

¹⁴ Cuhnuah rawl an dûm lioah hleikhat hna sinah â langh i a thawhṭhân hnu i amah hmutu hna chimmi an zumh duh lo ruangah, an zumhlonâk le an lungthin hahnâk kha a sîk hna.

¹⁵ An sinah, “Vawlei vialte ah kal u law sermi vialte sinah thawngṭha hi chim u.

¹⁶ A zum i baptisma a ingmi cu khamh an si lai, asinain a zumlotu cu thiamlo a co lai.

¹⁷ Cun hi hmelchunhnâk hna nih zumtu hna cu a zulh hna lai: Ka min in khuachia an ṭhawl lai I holhthar in an holh lai,

¹⁸ rul kha kut in an lâk lai i thihnâk sivai zei pauh ding hna hmanhsehlaw an zei a poi lai lo. Mizaw cungah an kut an chuan lai i an dam lai.

¹⁹ Cubangin Bawipa nih an sinah bia a chim dih in vanah lâk in a um i Pathian orhlei kutah a ṭhu.

²⁰ Cun annih cu an kal i kakip ah phung an chim, Bawipa nih anmah a ṭuanpi hna i bia kha fehter dingin hmelchunhnâk in a zulh peng hna. Amen.