MARKA 15 - Laibaibal Thiang (BSI)

¹ A thaizing zingka te ah, tlângbawi hna le upa hna, nawlbiacawnpiaktu hna le biaceihtu vialte kha an i tong, Jesuh cu ṭem buin an kalpi i Pailat kutah an pêk.

² Pailat nih, “Judah siangpahrang na si maw?” tiah a hal. Anih nih, “Na chim bangin a si ko,” tiah a leh.

³ Tlângbawi hna nih a phunphun in a sual an kawl nain, kâ khat hmanh in a let hna lo.

⁴ Pailat nih, “Sual a in puhnâk vialte hi na let hna lai lo maw?” tiah a hal ṭhân.

⁵ Asinain Jesuh nih kâ khat hmanh in a let lo i Pailat nih mak a ti ngaingai.

⁶ Cun thô lioah thongtla an halmi pauh Pailat nih a chuahpiak tawn hna.

⁷ Mi pakhat Barabbas an timi cu a hawi le sinah ralthawh ruangah hrengkhenh buin thong ah a um, ral an thawh ruang i lainawngmi a si.

⁸ Cuticun mizapi cu thang ngaiin an au i an ca-ah a tuah tawnmi kha tuahpiak dingin an nawl.

⁹ Pailat nih a leh hna i, “Judah siangpahrang hi in chuahpiak hna ninglaw nan duh maw?” tiah a ti hna.

¹⁰ Zeitintiah amah cu tlângbawi hna nih hnachuah ruang i a sinah an rak pêkmi a si kha a hngalh.

¹¹ Asinain tlângbawi hna nih Barabbas chuah dingin mizapi kha an lêm hna.

¹² Pailat nih, “Judah siangpahrang timi hi zeitindah tuah seh tiah nan ka duh?” tiah a ti ṭhân hna.

¹³ Annih nih, “Khenhchih ko,” tiah an au.

¹⁴ Pailat nih, “Zeiruangah? Zei sualnâkdah a tuah?” tiah a ti. Annih nih, “Khenhchih ko” tiah an au ṭhân.

¹⁵ Pailat nih mizapi lung lawmhter a duh i Barabbas kha a chuahpiak hna, Jesuh cu a velh hnuah, khenh chih dingin a pêk hna.

¹⁶ Cuhnuah ralkap hna nih bawi intual kulhmi chung i Praitoriam an timi ah amah cu an luhpi i ralkap vialte an i ko.

¹⁷ Puan sen an aihter i hling luchin an sermi cu a lu ah an chinh,

¹⁸ Judah siangpahrang pa, na kut kan in tlaih tiah serhsatnâkin an ti.

¹⁹ A lu ah hluangkung in an tuk, cil an châk i khukbil in an biak.

²⁰ Capo saihnâk i an hman dih in puansen kha an phoih i amah angki an aihter ṭhân, cun khenhchih dingah an chuahpi.

²¹ Cuticun Sairin khuami Simon, Alexandria le Rufas pa, a rak tlawngmi kha a vailam kha hranhram in an putter.

²² Hmun pakhat, Golgotha, luruh hmun an timi ah an phâkpi.

²³ Cuka ah Mura he cawhmi mitsurhang kha an pêk, asinain a ding duh lo.

²⁴ Cun an khenhchih i a hnipuan kha camcawh fung zuh in an i phaw.

²⁵ An khenhchih cân cu zinglei suimilam pakua hrawng a si.

²⁶ Sual an phawtnâk câ kha a lu cungah, “JUDAH SIANGPAHRANG” tiah an tar.

²⁷ Amah sinah damiah pahnih, a orhlei ah pakhat, a kehlei ah pakhat an khenhchih hna.

²⁸ Cathiang nih, “Mi sual hna sinah relchih in a um,” a timi kha a tling.

²⁹ Cuka pawng i â chawkletmi vialte nih an lu an thinhnawh i, “Aize, nang ṭempal ṭhet in nithum ah a sa ṭhan kho tu,

³⁰ i damter law, vailam cungin rung ṭum ngat, tiah an tihrâm.

³¹ Cubangin tlângbawi hna le nawlbiacawnpiaktu hna nih anmah he nihsawh buin, “Midang a damter, amah â damter kho fawn lo.

³² Krih, Israel Siangpahrang cu, atu ah vailam cungin rung ṭum sehlaw, kan hmuh lai i kan zumh lai,” tiah an ti. Amah he an khenhchihmi hna zong nih an nihsawh ve.

³³ Chun suimilam hleihnih in zanlei suimilam pathum tiang cu ram vialte cu a mui dih.

³⁴ Zanlei suimilam pathum ah Jesuh cu aw thang ngai in, “Eloi, Eloi, Lama Sabakthani?” ti in a au, cucu, “Ka Pathian, Ka Pathian, zeicadah na ka kaltâk?” tinâk a si.

³⁵ A pawngah a dirmi cheukhat nih cucu an theih tikah, “Zohhmanh u, Elijah a auh a si cuh,” tiah an ti.

³⁶ Mi pakhat a tli i misur hang a thormi ah puanchia a ciah, fungpar ah a tar hnu ah a dinter. “Um ko seh, Amah khamhtu dingah Elijah a ra hnga maw, kan zoh lai cu,” tiah an ti.

³⁷ Jesuh cu aw thang ngai in a au i a thlarau a thlah.

³⁸ Ṭempal puanzar kha a cunglei in a tanglei tiang a tlek.

³⁹ Cun a hmai i a dirmi ralbawi pa nih cubantuk i a au le a thlarau a thlahmi a hmuh tikah, “Hipa hi Pathian Fapa a si hrimhrim ko,” tiah a ti.

⁴⁰ Nu hna zong nih ralkhat in a rak cuan i cu hna lakah, Mary Magdalin le, Mary Jeim le Joses nu le Salom zong an i tel,

⁴¹ cu hna cu Galili ram i a um lio i amah zul in rian a ṭuanpiaktu an si, nu dang tam nawn amah he Jerusalem i a rami zong an um.

⁴² Zanlei a si i cu ni cu timhlamhnâk Ni a thaizing Sabbath ni ca i zarhte ni a si.

⁴³ Arimathia khuami Josef, hmaizahmi biaceihtu, Pathian pennâk â ruahchanmi kha a ra i ralṭha in Pailat sinah a kal i Jesuh ruak kha a hal.

⁴⁴ Pailat nih cubangin a thihmi cu mak a ti ngai ngai, ralbawi pa cu au in a thihnâk a rauh cangnâk kong a hal.

⁴⁵ Cuticun ralbawi pa sinin biafiang a theih hnuah Josef sinah a ruak kha a pêk.

⁴⁶ Khiangrâng puan a cawk, amah kha a ṭhumh i khiangrâng puan in a tuam. Lung in kharmi thlânah a chiah i thlân inkâ cu a khar.

⁴⁷ Cun Mary Magdalin le Joses nu Mary nih an vuinâk hmun kha an hmuh.