MARKA 14 - Laibaibal Thiang (BSI)

¹ Ni hnih hnuah lanhtâk thô le thilnu cawhlo thô a um lai. Tlângbawi hna le nawlbia cawnpiaktu hna nih hlennâk hmangin Amah cu an thah khawh nâkhnga khua an khâng.

² Asinain thô lioah cun si hlahseh, culoahcun zatlâng buainâk a chuak sual lai, tiah an ti.

³ Cun Bethani khua, thinghmui pa Simon in i rawl a dum lioah, minu pakhat lungrang thawlin Spiknard sathau a rim a hmui ngaimi le manfak ngaimi he a ra, a thawl kha khuai in alu ah a tawih.

⁴ Asinain an lak i mi cheukhat an thin a hung, zeiruangahdah hi rimhmuimi sathau hi a sawksâm?

⁵ Zeitintiah zuar sehlaw ngamu zathum man a si i misifak phawtah a ṭhadeuh lo maw, tiah an zai hnawh.

⁶ Asinain Jesuh nih, “Dai tein umter u. Zeiruangahdah nan zai hnawh, ka cungah thilṭha ngai a tuah.

⁷ Zeitintiah mi sifak cu nan sinah an um peng ko lai, nan duh cân pauh ah nan bomh khawh ko hna, kei tu cu nan sinah ka um peng lai lo.

⁸ A tuah khawhtawk a tuah i ka taksa hi vui dingin sathau a rak thuh ciami a si, tiah a ti.

⁹ Biataktein kan chimh hna, vawlei dihlak thawngṭha an chimnâk pauh ah hi minu tuahmi zong hi amah philh lo nâkah an chim ve lai,” tiah a ti.

¹⁰ Cun hleihnih lak i pakhat Judas Iskariot cu Jesuh rawi duhah tlângbawi sinah a kal.

¹¹ Cu kong an theih tikah an i lawm i a sinah phaisa pêk awkah bia an kamh. Cuticun rawinâk cân rem kha a ngiat.

¹² Cubangin thilnu cawhlo changreu thô, ni hmasabik, lantâk thô ca i tuu an thah tawn ni ah lamkaltu hna nih, “Lanhtâk thô rawl ei nâk dingah khuazeiahdah in tuahpiak ning law na duh?” tiah an ti.

¹³ A lamkaltu hna lakah mi pahnih a thlah hna i, “Khuapi ah va lut ulaw, bel in ti a thanmi pa nih an ton hna lai, amah kha nan zulh lai.

¹⁴ A luhnâk inn ngeitu sinah, “Ka lamkaltu hna he lanhtâk thô rawl kan dum`inâk ding khual umnâk khân cu khuazeiahdah a si,” tiah nan hal lai.

¹⁵ Cuticun anih nih inn cungdot kaupi thil vialte tling tein timhlamh cangmi kha an hmusak hna lai, cucu timhcia tein nan umter lai,” tiah a ti.

¹⁶ A lamkaltu hna cu an kal i khuapi ah an lut, an sin i a rak chimningte khan an hmuh i lanhtâk thô rawl kha an timhlamh.

¹⁷ Zanlei a si tikah hleihnih hna he an va kal.

¹⁸ Cubangin rawl ei i an ṭhut ko lioah Jesuh nih, “Biataktein kan chimh hna, ka sin i rawl a eimi lakah mi pakhat nih nan ka rawi lai,” tiah a ti.

¹⁹ An ngaih a chia tuk hringhran i pumpâk cio in, “Keimah hi ka si maw?” tiah an ti cio. Midang zong nih, ‘Keimah maw, ka si,’ tiah an ti ve.

²⁰ Anih nih, “Hleihnih lak i pakhat, kheng a ka hrawmtu hi a si.

²¹ Mi Fapa hi a kong an rak ṭial cang bantukin a kal lai, Mi Fapa rawitu pa cu ngaihchia a va si dah! Cu mipa cu chuak loin rak um sehlaw a caah a ṭha deuh lai,” tiah a ti.

²² Cun rawl an ei lioah, Jesuh nih changreu kha a lâk, thluachuah a pêk hnuah a cheu i an sinah a pek, “La ulaw, ei u; hihi ka taksa a si,” tiah a ti.

²³ Hrai zong kha a lâk i lawmhnâk bia a chim dih in an sinah a pêk i an dihlak in an din.

²⁴ Anih nih, “Hihi ka thisen i biakam thar, mi tampi ca i a chuak hngami cu a si.

²⁵ Biataktein kan chimh hna, “Pathian pennâk ah a thar in ka din cân a phâk hlan tiang misur hang hi ka ding ti lai lo,” tiah a ti.

²⁶ Cun hla an sak dihin an chuak i Oliv tlângah an kal.

²⁷ Jesuh nih, “Tuzan ah keimah ruangah nan dihlakin nanka tluktâk dih lai, hitihin ṭial arak si cang kha, ‘Tukhâl kha ka velh lai i tuurun kha an i ṭhek dih lai,’ tiin.

²⁸ Asinain thawhter ka si hnuah nan hmaiah Galili ah ka kal lai,” tiah a ti.

²⁹ Peter nih, “An dihlakin an tlukdih hmanh ah, ka tlu lai lo,” tiah a ti.

³⁰ Jesuh nih, “Biataktein kan chimh ni hin ah, tuzan hmanh ah, ar voihnih khuan hlan hmanh ah, voithum naka hlawt lai,” tiah a ti.

³¹ Asinain anih nih uar ngaiin, “Na thihnâk ah thi ve hmanhninglaw kan hlawt lai lo,” tiah a ti. An dihlakin cu bangin an ti cio.

³² Cun hmun pakhat Gethsemani an timi kha an phân i lamkaltu hna sinah, “Thla ka va cam lioah hika hin rak ṭhu u,” tiah a ti.

³³ Peter le Jeim le Johan kha a kalpi hna. Anih cu a thin a phâng i a awlawk a chong.

³⁴ Cuticun an sinah, “Ka thlarau a ngaih a chia tuk hringhran i thihpi tlâk a si. Hika ah um in ralring tein um u.

³⁵ Hmailei ah tlawmpal a va kal i vawlei ah a bawk, a si khawh ahcun cu cân nih a lanhtâk khawh nâkhnga thla a cam.

³⁶ “Abba, ka Pa, zeizong vialte hi na caah a si kho ko. Hi hrai hi ka sinin la ko, asinain keimah duhnâk si loin, nangmah duhnâk bang siseh,” tiah a ti.

³⁷ A rak kir i an i hngilh kha a hmuh hna, Peter sinah, “Simon, nâ hngilh maw? suimilam pakhat hmanh nâ ralring kho lo maw?

³⁸ Tukforhnâk i nan luhnâk hnga lo, ralring tein thla cam u. Thlarau nih a duh i taksa cu a der,” tiah a ti.

³⁹ A kal ṭhân i a hal bon kha hal in thla a cam ṭhân.

⁴⁰ A rak kir ṭhân i an i hngilh kha a hmuh ṭhân hna. An mit a ku tuk hringhran i hun leh awk zong an hngal lo.

⁴¹ A voithumnâk i a rak kir ṭhân tikah, nan i hngilh peng i nan i din ko rih maw? A za cang a cân a phân cang: Mi Fapa hi misual kutah tlaihter a si cang lai.

⁴² Tho ulaw, kal hna usih. Zohhmanh u a ka rawitu ding a nai cang.

⁴³ A chim lioah, Judas, hleihnih lak i pakhat cu, tlângbawi hna le nawlbiacawnpiaktu hna le upa hna lak i a rami, vainam le tanbo â rak putmi mitampi he an rak phân.

⁴⁴ A rawitu pa nih hmelchunhnâk a rak pêk cang hna, “Ka hnamhmi pauh amah a si lai, nan tlaih lai i him tein lodiam nan kalpi lai,” tiah a rak ti hna.

⁴⁵ A rak phâk le cângkâ, amah kha a panh cawlh i, “Rabbi, Rabbi,” tiah a hnamh.

⁴⁶ Cuticun an tlaih i an kalpi cawlh.

⁴⁷ A pawng i a dirmi lakah pakhat nih vainam â zuh i tlângbawi nganbik sinum a hna pet lakin a tuk.

⁴⁸ Jesuh nih, “Damiah tlaih ding bantukin vainam le tanbo he maw nan rat?

⁴⁹ Ṭempal ah nichiarte nan sinah cawnpiak in ka um tawn i nan ka tlai fawn lo. Asinain Cathiang a tlin khawh nâk ding caah a si,” tiah a ti hna.

⁵⁰ An dihlakin amah kha an kaltâk i an zâm.

⁵¹ Cubangin tlangval pakhat khiangrang puan lawng i ngaih in a zulh ve i cu pa cu tlangval dang nih an rak tlaih i

⁵² a khiangrang puan kaltâk in taklawng in a tli.

⁵³ Jesuh cu tlângbawi nganbik inn ah an kalpi, cun tlângbawi hna le nawlbiacawnpiaktu hna le upa vialte kha an i pum.

⁵⁴ Peter nih hla nawn khin tlangbawi nganbik inntual tiangin a zulh i sinum hna sinah mei a to.

⁵⁵ Cubangin tlângbawi hna le biaceihtu vialte nih Jesuh thahnâk dingah a sualnâk an kawl, asinain a sualnâk an hmu kho lo.

⁵⁶ Zeitintiah mi tampi nih lih in sual an puh lengmang, asinain sual an puhnâk kha â ralchanh leng mang.

⁵⁷ Cuticun mi zeimaw, an rak dir i lih in, hitihin a sual an rak kawl.

⁵⁸ Hipa nih hin, “Hi ṭempal kut in sakmi hi ka ṭheh lai i nithum chungah a dang, kut in sak lomi ka dirh ṭhân lai, a timi kan theih,” tiah an ti.

⁵⁹ Asinain sual an puhnâk cu ai rem kho lo.

⁶⁰ Tlângbawi nganbik cu a laiah a dir i Jesuh sinah, “Zeihmanh na let hna lo maw? Hi hna nih hin zeiruangahdah na sual an kawl? tiah a hal.

⁶¹ Anih cu dai tein a um, kâ khat hmanh in a let lo. Tlângbawi nganbik nih, “Krih, Thangṭhat tlak Fapa cu na si maw?” tiah a hal.

⁶² Jesuh nih, “Aw, ka si, Mi Fapa hi a ṭhawngmi orhlei ah ṭhu in, khuadawm lak i a rat kha na hmuh te lai,” tiah a ti.

⁶³ Cuticun tlângbawi ngan nih a hnipuan a thleh i, “Theihpitu dang zeidah kan herh ti lai?

⁶⁴ ( Pathian)cawhdehnâk bia nan theih cang! Zeitindah nan ruah? tiah a ti. An dihlak in Amah cu thih awkah â tlak tiin thiamlo an coter.

⁶⁵ Cheukhat nih cil an châk i a hmai an tuam i an thongh, “Holh ngat, tiah hotu hna nih an bengh.

⁶⁶ Cubangin Peter cu tanglei tualrawn i a um lioah tlângbawi sinum ngaknu lakah pakhat a ra.

⁶⁷ Peter nih mei a toh ko kha a hmuh i, “Nang zong hi Nazaret Jesuh sin i a ummi kha na si,” tiah a ti.

⁶⁸ Anih nih, “Na bia chim cu ka thei lo, a ruah awk hrim ka thiam lo tiah, a hlawt. Inleng ah a va chuak i ar a khuang cawlh.

⁶⁹ Cun ngaknu nih a hmuh ṭhân, a pawng i a ummi hna sinah, “Hipa hi anmah lak i a ummi a si,” tiah a ti.

⁷⁰ Asinain â pheh ṭhân. A rauh hlanah a pawng i a ummi hna nih Peter sinah, “An lak i a ummi na si ve ko, na aw cawiin Galili mi na si ti a fianter ko,” tiah an ti.

⁷¹ Anih nih, “Cu minung nan chimmi cu ka hngal hrimhrim lo,” tiin chiat i serh in a chim.

⁷² A voihnihnâk ah ar cu a khuang ṭhân, Cuticun Peter nih a sinah Jesuh nih, “Ar voihnih a khuan hlanah, voithum naka hlawt lai,” a timi kha a hun hngalh i cucu ruat in a ṭap.