MARKA 13 - Laibaibal Thiang (BSI)

¹ Cuticun ṭempal a chuahtâk lioah, a zultu lakah mi pakhat nih, “Cawnpiaktu, zohhmanh lung an rualmi le an inn sakning a ropit ning hi,” tiah a ti.

² Jesuh nih, “Hi a ropi ngaimi in hi na hmu ko lo maw? Lungrual vialte hi chimh lomi pakhat hmanh a um lai lo,” tiah a ti.

³ Cubangin ṭempal ralden Oliv tlangcung i a ṭhut lioah, Peter, Jeim, Johan le Andru nih bia an hal,

⁴ “Cucu zeitikahdah a si lai? Cu thil hna a tlinnâk ding hmelchunhnâk ah zeidah a si lai,” tiah an ti.

⁵ Jesuh nih, “Ahohmanh nih an in hlen nâkhnga lo i ralring u.

⁶ Zeitintiah mi tampi ka min in an ra lai, “Amah cu ka si” tiah mi tampi an hlen hna lai.

⁷ Ral dohnâk le raltuknâk thong nan theih lai, asinain buai hlah u, zeitintiah cu thil hna cu a um hrimhrim awk a si, asinain donghnâk cu a si rih lai lo.

⁸ Ram le ram an i doh lai, pennâk le pennâk an i doh lai, hmunkip ah li ai hnin lai I mangṭam le buainâk a um lai. Hi vialte hna hi fahnâk hramthawknâk a si.

⁹ I ralring u, biaceihnâk ah an in chuahpi hna lai, Sinagog ah an in velh hna lai, ka bia hngalhter awkah, hruaitu le uktu hna hmai ah keimah ruangah chuahpi nan si te lai.

¹⁰ Cun thawngṭha hi miphun vialte sinah chim a si hmasa lai.

¹¹ Tlaih nan si i biaceihnâk i chuahpi nan si tikah, zeidah ka chim lai tiah, ruat hmasa hlah u. A cân teah chim awk kha pêk nan si ko lai, a chimtu cu nanmah si loin, Thiang Thlarau a si lai.

¹² Cuticun thah awkah unau le unau an i rawi lai, pa nih a fa, fale nih an nu le an pa an doh lai i an thahter hna lai.

¹³ Ka min ruangah mi vialte huat nan si lai. Asinain a dongh tiangin a tuarmi cu khamh an si lai.

¹⁴ Cuticun ṭhiotu fihnung profet Daniel chimmi kha a dir lonâk dingah a dir nan hmuh tikah (a relmi pauh nih a sullam hngal ko seh), khi cân ah, Judia ram i a ummi kha tlang cungah zâm hna seh.

¹⁵ Inn cungah a ummi kha, inn chungah ṭum hlah seh, inn chung i thilri lak awkah lut hlah seh.

¹⁶ Lo i a ummi zong a thilri lakah tlung hlah seh.

¹⁷ Cu ni ah cun fa a pawimi le nau a pawmmi caah vansannâk a si lai.

¹⁸ Nan zâm cân kha khausik cân a si nâkhnga lo thla cam u.

¹⁹ Zeitintiah cu ni cu harnâk ni a si lai. Cubantuk harnâk cu Pathian nih vawlei a ser ri in a um bal lo i zeitikhmanhah a um ṭhân ti lai lo.

²⁰ Bawipa nih cu ni hna cu tawiter hlah sehlaw, ahohmanh a nung kho lai lo. Asinain a thim i a ruah ciami hna ruangah ni kha a tawiter hna lai.

²¹ “Cu cân ah mi nih, ‘Zoh u, Krih cu khika ah, asiloah, zoh u, Krih cu hika ah, an ti tikah va zum hna hlah u.

²² Zeitintiah krih deu hna le profet deu kha an chuak lai, cu hna nih cun mi hlennâk caah hmelchunhnâk le khuarauhhar thil kha an tuah lai, si kho sehlaw, thimmi hmanh an hlen hna lai.

²³ Nannih tu cu ralring tein um u, ngaihmanh u, thil vialte kan chimh chung cang hna hi,” tiah a ti.

²⁴ Asinain cu ni hna le, harnâk cân a dih cun, nika a mui lai i thlapa a ceu ti lai lo.

²⁵ Van in arfi an tla lai i van thiltikhawhnâk cu â hnin lai.

²⁶ Cu hnu ah Mi Fapa hi thiltikhawhnâk lianhngannâk le sunparnâk he khuadawm lak i a rat kha an hmuh lai.

²⁷ A vancungmi kha a thlah hna lai i a thimmi hna cu vanhramdeng thli pali in a hlatnâk bik vawlei in a hlatnâk bik van i a ummi kha an pumh hna lai.

²⁸ Cubangin theipi kungah hin tahchunhnâk cawng u, a zim a no i a hnah a cawrh ahcun vaupi a nai cang ti kha nan hngalh.

²⁹ Cuticun hi thil hna nan hmuh tikah, Amah cu inkâ hramah a um cang tiah nan hngalh lai.

³⁰ Biataktein kan chimh hna, cu thil vialte a tlin hlan tiang tu lio chan hna hi an lo lai lo.

³¹ Lei le van an lo lai, asinain ka bia cu a lo lai lo.

³² “Asinain a ni le suimilam cân cu Pa dah ti lo ahohmanh nih an hngal lo, van i vanmi hna le Fapa zong nih a hngal lo.

³³ Thlacam in i ralring u, zeicatiah a cân kha nan hngal lo.

³⁴ Ram hlapi i khual tlawn ai timmi nih sin um hna sin i nawlngeihnâk a pêk i an ṭuan hngami pein, innkâ congtu zong ṭha tein nawl a pêk hnu ah a kalmi he tahchunh a si.

³⁵ Cucaah i ralring u, inn ngeitu rat cân cu zanlei ah maw, zanṭim ah maw, arkhuan cân ah maw, zingah dah a si lai nan hngal lo.

³⁶ Culoahcun nan i hngilh cân ah a ra sual lai i an poh sual hna lai.

³⁷ Nan sin i ka chimmi vialte hi mi vialte sin i chim ka si. I ralring u.