MARKA 12 - Laibaibal Thiang (BSI)

¹ Cuticun tahchunhnâkin an sinah chim hram a thawk. Mipa nih mitsur a cin i a kulh, a nennâk khor a cawh i parthlâm a sak. Dûm congtu hna kutah i hlawhfa dingin a chiah i ram hlapi ah a tlawng.

² A thei lawh cân a phâk tikah, a covo lâk dingin dûm congtu hna sinah sinum pakhat a thlah.

³ Anih cu an rak tlaih i an velh hnuah kut lawngin an kirter.

⁴ Sinum dang a thlah ṭhân, a nih zong cu lungin an rak cheh, alu an rak pemh i fakpi i an hrem hnu ah an kirter ṭhân.

⁵ Midang a thlah ṭhân i an rak thah, midang zong a cheu an rak velh i a cheu an rak thah hna.

⁶ Cuticun fapa pakhat, a dawt ngaimi a ngei. Anih zong cu a thlah. Zeicatiah ka fapa cu an rak upat deuh lai, tiah a ruah.

⁷ Asinain dûm congtu hna nih, “Hipa hi ro cotu a si. Ra u, that u sih, cun a co hngami ro kha kanmah ta a si ko lai,” tiah an ti.

⁸ Cuticun an i kalpi i an thah i dûm lengah an hlawnh.

⁹ “Cucaah dûm ngeitu nih zeitindah a ti hna lai? Ara lai i dûm congtu hna cu a hloh dih hna lai i midang kut ah dûm cu a pêk lai.

¹⁰ Hi Cathiang hi nan rel bal lo maw? ‘In satu hna duh lomi lung kha, cucu a kil i santlai bik lung a si.

¹¹ Cucu Bawipa tuahmi a si, kan mithmuh ah khuaruahhar a si, tihi,’ tiah a ti.

¹² Amah kha tlaih an timh, asinain mizapi an ṭih hna, anmah ralchanh in a chimmi tahchunhnâk kha an fiang. Cun an chuahtâk i an kal.

¹³ A bia in an tlaih khawh nâkhnga Farasih le Herod mi kha a sinah an thlah.

¹⁴ A sin an phâk tikah, “Cawnpiaktu, miding na si, uar khunmi zong na ngei lo, thleidan zong na ngei lo. Biatak in Pathian bia na cawnpiak tawn. Sizar sin i ngunkhuai pek hi phungning a si maw si lo dah?

¹⁵ Kan pe hnga maw pe lo? tiah an ti. Asinain an depdetning kha a hngalh i, “Zeiruangahdah nanka hniksak, ngamu kha ka pe ulaw, ka rak zoh lai,” tiah a ti hna.

¹⁶ An ratpi i, “Hihi aho milem le aho min dah a si?” tiah a ti. Annih nih, “Sizar,” tiah an ti.

¹⁷ Jesuh nih, “Sizar thil cu Sizar pe ulaw, Pathian thil cu Pathian sinah pe ngat u,” tiah a ti i mak an ti ngai ngai.

¹⁸ Thawhṭhannâk a um lo, titu Sadusih mi kha a sinah an ra i bia an hal.

¹⁹ “Cawnpiaktu, Moses nih, ‘Mi nih fa ngeih loin a nupi a thihtâk ahcun, a unau nih ci a thlahpiak lai,” tiah a kan ṭial piak.

²⁰ Cubangin unau pasarih an um; a upa bik nih nupi a ngei i ci thlah loin a thi.

²¹ A pahnihnâk pa nih ai lak i ci thlah loin a thi ṭhân, a pathumnâk pa zong cubantuk cu a si.

²² Cuticun unau pasarih hna cu ci thlah loin an thi i a donghnâk ah minu zong cu a thi ve.

²³ Asiah thawhṭhân ni ah aho nupi dah a si hnga? An dihlak nupi le a si fawn,” tiah an ti.

²⁴ Jesuh nih, “Cathiang le Pathian thiltikhawhnâk nan hngalh lo caah nan palh tawnnâk cu a si.

²⁵ Zeitintiah thihnâk in thawhter an si hnuah, nupi pasal an i ngei ti lai lo, van i vanmi hna bantuk an si lai.

²⁶ Mithi hna an tho ṭhân timi kongah, Moses cauk nan rel bal lo maw? Burbûk ah khan Pathian nih, “Kei cu Abraham Pathian, Isaak Pathian, Jacob Pathian ka si,” a timi kha, nan rel bal lo maw?

²⁷ Anih cu mithi Pathian a si lo, minung Pathian a si. Cucaah ngan tukin nan palh,” tiah a leh hna.

²⁸ Nawlbia cawnpiaktu mi pakhat a ra i an i alnâk kha a rak ngai ve. An halmi zong palhnâk um loin a leh hna ti zong a theih, “Nawl pêkmi lakah a hmasabik zei dah?” tiah a hal.

²⁹ Jesuh nih, “Nawl pek hmasabik cu hihi a si, “Maw, Israel hna, ngai hmanh u, BAWIPA kan Pathian cu BAWIPA pakhat a si.

³⁰ BAWIPA na Pathian cu, na lungthin dihlak, na thlarau dihlak, na ruahnak dihlak, na ṭhawnnâk dihlak in na dawt lai. Hihi nawlpek hmasa bik a si.

³¹ Pahnihnâk amah bantuk cu hihi a si. “Nangmah nâ dawt bangin na innpa na dawt lai.” Hi hna nâk i a ngan deuhmi Nawlpêk a um ti lo,” tiah a ti.

³² Nawlbia cawnpiaktu nih a sinah, “A ṭha, cawnpiaktu. Biatak na chim, Pathian cu pakhat a si, Amah hlei a dang an um lo.

³³ Lungthin dihlak, hngalhnâk dihlak, thlarau dihlak le ṭhawnnâk dihlak i Amah dawt le, mah i dawt bang i innpa dawt cu pêkchanhnâk le pum khangh thawinâk nâkin a ṭha deuh,” tiah a ti.

³⁴ Cubangin mipa nih fim ngaiin a lehmi Jesuh nih a theih tikah, “Pathian pennâk he nâ hlat lo,” tiah a ti. Cu hnu cun ahohmanh nih bia an hal ngam ti lo.

³⁵ Ṭempal i a cawnpiak hna lioah Jesuh nih, “Nawlbiacawnpiaktu hna nih zeitindah Krih cu David Fapa an ti khawh?

³⁶ Zeitintiah David hrimhrim nih Thiang Thlarau thawngin, ‘BAWIPA nih ka Bawipa sinah, “Na ral hna na ke tangah ka chiah hlan tiang ka orhlei ah ṭhu,” tiah a rak ti.

³⁷ Amah David hmanh nih, ‘Bawipa’ tiah a kawh ahcun, zeitindah a fapa cu a si khawh? Mizapi le zatlâng hna nih lunglawm ngaiin a chimmi kha an ngaih tawn.

³⁸ Cun a cawnpiaknâk ah hitihin a chim, “Nawlbiacawnpiaktu hna chungin i ralring u, annih nih angkifual aih i len le, market hmun i kut tlaih kha an tlaihchan.

³⁹ Sinagog i ṭhutnâk ṭhabik i ṭhut le, rawl danghnâk i ṭhutnâk ṭha i ṭhut an i cuh tawn.

⁴⁰ Nuhmei chawva an ei i zapi hlennâk ah thla saupi in an cam tawn. Hi mi hna thiamlo conâk hi a ngan ngaingai te lai,” tiah a ti.

⁴¹ Cubangin Jesuh cu thawhlawm kuang ralden ah a ṭhu i thawhlawm kuang i mi nih thawhlawm an thlakmi kha a rak zoh. Mirum hna nih tam ngaiin an thlak.

⁴² Cuticun a hnu ah nuhmei sifak ngaimi a ra, dar tangka pahnih piahra tluk a simi khi a thlak ve.

⁴³ Jesuh nih a lamkaltu kha a kawh hna i “Biataktein kan chimh hna, thawhlawm kuangah a thlatu vialte ah hi nuhmei sifaknu thlakmi a tambik,

⁴⁴ zeitintiah hi hna nih hin an ngeih hlei an thlak, anih nih cun a ngeichun, a nunpi dingmi kha a thlak,” tiah a ti.