MARKA 11 - Laibaibal Thiang (BSI)

¹ Cubangin Jerusalem khua an phâk lai ah Olive tlang i Bethphage le Bethani an phâk tikah, lamkaltu pahnih a thlah hna i

² an sinah, “Nan hmai khua ah khin va kal ulaw, nan luh le cângkâ, hrênmi lâfa, ahohmanh cit bal lomi nan hmuh lai. Phoih ulaw ratpi u.

³ Mi nih, “Zeiruangahdah kha kha nan phoih? an ti ahcun, ‘Bawipa nih a herh’ ti ulaw an ratter ko hna lai,” tiah a ti.

⁴ Cuticun an kal i lamkam i inkâ lengah hrenmi lâfa cu an va hmuh i an phoih.

⁵ Cuka i a dirmi hna nih, “Zeiruangahdah lâfa kha nan phoih?” tiah an ti.

⁶ Jesuh nih nawl a pêk hna ningte khan an chimh hna i an ratter cawlh hna.

⁷ Cuticun lâfa cu Jesuh sinah an ratpi, a cungah an puan an danh i â cit.

⁸ Mi tampi nih an puan kha lamah an phah, midang nih hnahchawl an sah i lamah an phah.

⁹ Hnu le hmai ah a kalmi hna nih, Hosana! BAWIPA min in a rami cu thangṭhat si ko seh,

¹⁰ Bawipa min in a rami kan pa David pennâk cu thluachuah si ko seh, cungnungbik ah khin Hosana! tiah an au.

¹¹ Jesuh cu Jerusalem le ṭempal chungah a lut i zeizong vialte a zoh dih hna hnuah, khua a tlai cang caah, Bethani khua ah hleihnih hna he an kal.

¹² A thaizingah, Bethani i a rak chuah tikah, a rawl a ṭâm.

¹³ Hlât nawn khin Theipi kung a hnah he a hmuh. Thil zeimaw hmuh i ruahchan in a panh, ahmun a phâk tikah, a hnah dah ti lo cu zeihmanh a hmu lo, zeitintiah theipi tlai cân a rak si lo.

¹⁴ Theipi kung lehpah in Jesuh nih, “Ahohmanh nih na thei ei ti hna hlah seh,” tiah a ti. Cucu lamkaltu hna nih an theih.

¹⁵ Cun Jerusalem kha an phân. Jesuh cu ṭempal ah a lut i ṭempal chungah thil zuartu le cawtu kha ṭhawl a thawk hna. Phaisa thlengtu cabuai kha a thluk i ṭhuro zuartu ṭhutdanh zong a thluk hna.

¹⁶ Ṭempal lanhpi awkah thil phorh zong a senh hna lo.

¹⁷ Cuticun a cawnpiak hna, “Ka inn cu miphun vialte caah thlacamnâk inn a si lai,” tiah ṭial a si lo mei? nannih nih mifir kua ah nan canter,” tiah a ti.

¹⁸ Tlângbawi hna le nawlbiacawnpiaktu hna nih an theih tikah Amah thahnâk ding khua an khâng; asinain a cawnpiaknâk kha mizapi nih biapi ngai in an ruah caah, annih nih an ṭih hna.

¹⁹ Zanlei sangah khuapi in a chuak.

²⁰ Cubangin zinglei i an kalpah in theipi kung kha a hram tiang i ro dih in an hmuh.

²¹ Peter nih a hun hngalh i a sinah, “Rabbi, zohhmanh, theipi kung chiat na serhmi kha a car dih cang,” tiah a ti.

²² Jesuh nih, “Pathian zum u.

²³ Zeitintiah biataktein kan chimh hna, hi tlâng sinah, ‘I ṭhial law, rili ah i hlawnh,’ tiah lungthin i lunghrinh lo tein, zumhnâk in a chimtu pauh tuahpiak a si lai, a chimmi pauh a hmuh ko lai.

²⁴ Cucaah kan chimh hna, thlacamnâk in nan halmi pauh, hmuhcia ah ruat ulaw, nan hmuh lai.

²⁵ “Cun thlacam i nan dir tikah, aho cung zongah bia nan ngeih ahcun ngaithiam hna u, cuticun van i nan Pa zong nih nan sualnâk an ngaihthiam ve hna lai.

²⁶ Asinain nan ngaihthiam hna lo ahcun, van i nan Pa zong nih nan sualnâk a ngaithiam ve lai lo,” tiah a ti hna.

²⁷ Cun Jerusalem kha an rak phân ṭhân, Ṭempal a ṭol lioah, tlângbawi hna le nawlbiacawnpiaktu hna le upa hna a sinah an ra i

²⁸ a sinah, “Aho nawl ngeihnâk in dah hihi na tuah? Ahonihdah hi thil tuah awkah nawlngeihnâk an in pek?” tiah an ti.

²⁹ Jesuh nih, “Bia pakhat kan hal hna lai i ka let u, cun hi thil hi a ho nawlpêknâk in dah ka tuah kan chimh hna lai,” tiah a ti hna.

³⁰ Baptisma petu Johan kha van lei in maw a si minung lei in dah? ka let u, tiah a ti.

³¹ Anmah le anmah an i ceih i van leiin, kan ti ahcun, ziah a bia nan ngaih kun lo a kan ti lai.

³² Minung leiin, kan ti ahcun, mizapi ṭih an nung fawn, zeicahtiah mi vialte nih Johan cu profet dik ah an ruah dih fawn.

³³ Cuticun Jesuh sinah, “Kan hngal lo,” tiah an leh. Jesuh nih, “Kei zong nih aho nawl ngeihnâk in dah, hi thil hna hi ka tuah, kan chim ve hna lai lo,” tiah a ti hna.