MARKA 10 - Laibaibal Thiang (BSI)

¹ Cuka cun a tho i Jordan varal i Judia ram kha a phân. Mizapi kha a sinah an ra ṭhân i a tuah tawn bangin a cawnpiak ṭhân hna.

² Farasih kha an ra i Amah hneksaknâk ah, “Mi nih a nupi a mâ kho maw?” tiah an ti.

³ Anih nih, “Moses nih zeitindah nawl an pêk hna?” tiah a leh hna.

⁴ Annih nih, “Moses nih mâknâk ca ṭial ahcun mâk a sian ko” tiah an ti.

⁵ Jesuh nih, “Nan lung a khontuk caah hi nawl hi an pêk hna.

⁶ Asinain vawlei serka ah, Pathian nih pa le nu ah a ser hna.

⁷ Hiruangah hin pa nih anu le apa kaltâk in a nupi he an i pehtlai lai,

⁸ an pahnih in titsa pumkhat an si cang lai, pahnih si ti loin pakhat an si cang lai.

⁹ Cucaah Pathian nih a pehmi cu minung nih ṭhen hlahseh,” tiah a ti.

¹⁰ Inn ah lamkaltu hna nih cu kong cu an hal ṭhân.

¹¹ Anih nih, “Nupi a mâ i midang a ngeimi pauh a nupi ṭangdang a kaitâk a si.

¹² Nu zong nih ava a kirtâk i va dang a ngeih ahcun ṭangdang kai a si.

¹³ A rak tongh awkah ngakchia kha an ratpi hna, asinain lamkaltu nih anrak sik hna.

¹⁴ Cucu Jesuh nih a hmuh tikah a lung a si lo ngaingai i lamkaltu hna sinah, “Ngakchia kha ka sinah ratter ulaw, dawn hna hlah u, Pathian pennâk cu hibantuk hna caah a si.

¹⁵ Biataktein kan chimh hna, Pathian pennâk cu ngakchia te nih a lawmh bantukin a lawm lomi pauh cu a chungah a lut lai lo,” tiah a ti.

¹⁶ A rak pom hna i an cungah akut chuangin thluachuah a pêk hna.

¹⁷ Lam i a kal lioah, mi pakhat a rak tli i khukbil in a sinah, “Cawnpiaktu ṭha, zungzal nunnâk ngeih awkah zeidah ka tuah lai?” tiah a hal.

¹⁸ Jesuh nih, “Zeiruangah dah ṭha naka ti? Mi pakhat dah ti lo cu ṭha an um lo, cucu Pathian a si.

¹⁹ Nawlpêk kha na hngalh ko hna, ‘Ṭangdang kai hlah, lai nawng hlah, fir hlah, lih in sual kawl hlah, hleng hlah, nanu le napa upat hna’ timi hna hi,” tiah a ti.

²⁰ Anih nih, “Cawnpiaktu, cu thil vialte cu ka no lioin ka tuah dih cang,” tiah a ti.

²¹ Jesuh nih amah cu zoh in a dawt i a sinah, “Pakhat te na bau, kal law, na ngeih vialte zuar in, mi sifak va pe hna law vanah ro na ngei lai, cun ra law, vailam putin ka zul,” tiah a ti.

²² Cu bia nih a hmai a chiatter i ngaihchia ngaiin a kal, zeicatiah chawva tampi ngeitu a si.

²³ Jesuh nih a zoh hna i lamkaltu sinah, “Mirum ca i Pathian pennâk luh cu zeitlukindah a har!” tiah a ti.

²⁴ A chimmi nih Lamkaltu kha an khuaruah a harter hna, Jesuh nih a chimh ṭhân hna i rumnâk â bochanmi hna caah Pathian pennâk luh cu zeitlukindah a har.

²⁵ Pathian pennâk i mirum luhnâk cha cun kalauk ṭhim hna i luh a fawi deuh lai,” tiah a ti.

²⁶ An khuaruah a har chinchin i cutiasiah ahodah khamh a si kho kun lai? tiah an ti.

²⁷ Jesuh nih a zoh hna i, “Cucu minung caah tuahkhawh a si lo, asinain Pathian caah cun a si lo. Pathian he cun thil vialte hi a si kho ko,” tiah a ti.

²⁸ Peter nih, “Zohhmanh, zeizong vialte kaltâk in kan in zulh tiah chim a hun thawk.

²⁹ Jesuh nih, “Biataktein kan chimh, keimah le Thawngṭha ruangah inn siseh, unau siseh, far le siseh, mi siseh, pa siseh, nupi siseh, fale siseh, ram siseh a kaltakmi pauh cu,

³⁰ atu nun chung lila ah in, unau, farnu, nu, fa, ram hna a let zakhat tiang, sersatnâk he a hmu lo dingmi pakhat hmanh an um lo; hmailei chan i zungzal nunnâk he.

³¹ Asinain hmasa bik, hmadungbik an si lai i hmadungbik, hmasabik an si lai,” tiah a ti.

³² Cubangin Jerusalem hung kal awkah, lam i an um lioah, Jesuh cu an hmaiah a kal, an khuaruah a har ngai. Hnulei i zulh zong kha an thin a phâng. Cun hleihnih kha a thlei hna i a cung i a tlung hnga ding chimh kha a thawk hna.

³³ Zohhmanh u Jerusalem ah kan kal lai, Mi Fapa hi tlângbawi hna le nawlbiacawnpiaktu hna kutah chanh a si lai, thi dingin bia an ceih lai i Gentel sinah an pêk lai,

³⁴ annih nih nihchuak saihnâk ah hmangin, an velh lai, cil an châk lai i an thah lai. Cun nithum ni ah a tho ṭhân lai,” tiah a chimh hna.

³⁵ Zebedi fapa Jeim le Johan kha a sinah an ra, “Kan halmi pauh kan tuahpiak law, kan duh,” tiah an ti.

³⁶ Anih nih, “Zeidah tuahpiak nan duh?” tiah a ti.

³⁷ Annih nih, “Na sunparnâkah, na orhlei ah pakhat, na kehlei ah pakhat, kan ṭhutter law kan duh,” tiah an ti.

³⁸ Jesuh nih, “Nan halmi hi nan hngal lo. Ka dinmi hrai nan ding kho lai maw? Ka in ding Baptisma nan ing kho lai maw?” tiah a ti.

³⁹ Annih nih a sinah, “Kan in khawh ko lai,” tiah an ti. Jesuh nih, “Ka dinmi hrai nan din lai i ka in ding Baptisma nan in tak ko lai.

⁴⁰ Asinain ka orhlei le ka kehlei i ṭhutnâk nawl cu keimah pêk awk a si lo. An timhpiakmi hna caah a si,” tiah a ti hna.

⁴¹ Cucu Lamkaltu pahra hna nih an theih tikah, Jeim le Johan cungah an lung a si lo.

⁴² Asinain Jesuh nih a kawh hna i an sinah, “Gentel uktu hna cu an ukmi hna cungah an i bawiter ngai, an mi lianngan hna nih nawlngeihnâk a hleihluat in an hman kha nan theih.

⁴³ Asinain nannih cu cubantuk cu nan si lai lo. Nan lakah mingan si a duhmi cu nan sinum ah a can hmasat awk a si,” tiah a ti.

⁴⁴ Nan lakah hmasabik si a duhmi pauh cu nan salah a um awk a si.

⁴⁵ Zeitintiah Mi Fapa hmanh hi, rianhmi si loin riantu ding le mi tampi tlanhnâk ding ca i a nunnâk pek awkah pei a rat cu,” tiah a ti.

⁴⁶ Cun Jeriko khua an rak phân. A lamkaltu le mibu hna nih Jeriko an chuahtak lioah mitcaw Bartimu, Timia fapa kha lamkam ah kutdawh in a ṭhu.

⁴⁷ Nazaret Jesuh a si ti kha a theih tikah, Jesuh, David Fapa, ka zângfah tuah, tiah au a thawk.

⁴⁸ Mi tampi nih daite um dingah ralrin an pêk, asinain David Fapa, ka zângfah ko, tiah a au chin.

⁴⁹ Jesuh cu a dir i amah cu ko dingin nawl a pêk hna. Mitcaw pa cu an kawh i a sinah, “Na tha nuam ko, tho, an kawh cu,” tiah an ti.

⁵⁰ A puan kha hlawnh in, a tho i Jesuh sinah a ra.

⁵¹ Jesuh nih, “Zeidah tuahpiak na duh?” tiah a ti. Mitcaw pa nih, “Cawnpiaktu, hmuh khawh ka duh,” tiah a ti.

⁵² Jesuh nih, “Va kal cang, na zumhnâk nih an damter,” tiah a ti. Hmakhat teah khua a hmu i lamah Jesuh kha a zulh colh.