LUKA 5 - Laibaibal Thiang (BSI)

¹ Mizapi nih Pathian bia ngaih awkah amah an panh cuahmah lio ah, anih cu Genesaret Tidil kamah a dir,

² tidil kamah tilawng pahnih a dirmi kha a hmuh i ngatlaitu nih an sur an thenh ruang i tilawng an chuahtâk lio a si.

³ Cuticun tilawng pakhat Simon ta ah khan â cit i tikam in tlawmpal thawlh deuh kha a fial. Cuticun a ṭhu i mizapi kha a cawnpiak hna.

⁴ Bia a chim dih hnu ah, Simon sinah, “Tithuhnâk lei panh in na sur kha nga tlaih awkah vorh tuah,” tiah a ti.

⁵ Simon nih, “Cawnpiaktu, zan khaudei ka vorh cang i zeihmanh ka tlai lo, asinain na bia in sur ka vorh lai” tiah a ti.

⁶ A chim bangin a hun vorh tikah, nga tampi an tlaih i an sur zong a tlek cuahmah.

⁷ Tilawng dang i an hawile kha anmah bomh awkah an kut in an hei zauh hna. An ra i tilawng pahnih pil dengmang tiangin an pon.

⁸ Simon Peter nih cucu a hmuh tikah, Jesuh kehram ah a bawk i, “Maw, Bawipa, misual ka si, ka kaltâk,” tiah a ti.

⁹ Zeitintiah cutluk tam i nga an tlaihmi kha amah le a hawi le an khuaruah a har tuk hringhran.

¹⁰ Simon rian`uanpi hawi Zebedi fapa Jeim le Johan zong nih mak an ti ngaingai. Jesuh nih Simon sinah, “Ṭihhlah, atu thawkin minung na tlaih cang lai,” tiah a ti.

¹¹ Cuticun an tilawng kha tikam ah an kalpi i zeizong vialte kaltâk in amah kha an zulh.

¹² Cun khua pakhat i a um lio ah, ngaihmanh, mi pakhat thinghmui in a khatmi nih Jesuh a hmuh, a hmai ah bawkin, “Bawipa na duh ahcun naka thianter khawh,” tiin a nawl.

¹³ Anih nih, a kut in a hun banh i a tongh hnu ah, “Ka duh, thiang cang” tiah a ti. Chikkhatteah a thinghmui nih a chuahtak cawlh.

¹⁴ Ahohmanh chim hlah tiah cupa cu a ti. “Tlângbawi sin tu ah va zohter law, nâ thenhnâk caah Moses nih nawl a rak pêk bangin va pe, minih na dam cang tiah an theih khawh nâkhnga,” tiah a ti.

¹⁵ Asinain a thawng cu a thang chinchin i a bia ngaihduh le an zawtnâk damter duh ah mi tampi an i pum.

¹⁶ Cuticun ramking ah amah te lawng â zûk i thla a cam tawn.

¹⁷ Nikhat cu a cawnpiak hna lio ah Farasih le nawlbiacawnpiaktu kha an ṭhu ve, cu hna cu Galili ram le Judia ram kip le Jerusalem in a rami an si. Mi damter khawhnâk Bawipa thiltikhawhnâk kha a sinah a um.

¹⁸ Cun ngaihmanh zeng pakhat a ihkhun he an rak zawnh i a chungah lut in, a hmai ah chiah an va timh.

¹⁹ Mizapi ruangah luhpi khawhnâk lam a um lo, inn cungah an kaipi i inn cung kha an ṭheh, cu awng ah cun a ihkhun he Jesuh hmai zawnah an vun ṭhumh.

²⁰ Anih nih an zumhning a hmuh i, “Mipa, na sualnâk ngaihthiam a si cang,” tiah a ti.

²¹ Cun nawlbiacawnpiaktu le Farasih hna nih, “(Pathian)cawhdehnâk bia a chimtu hi mizeidah a si? Pathian dah tilo, ahodah sual a ngai thiam kho? tiah khua an ruat.

²² Jesuh nih an ruahmi kha a hngalh i, “Nan lungthin ah zeidah nan ruah?

²³ ‘Na sualnâk ngaihthiam a si cang, timaw chim a fawi deuh, tho law, ke in kal cang, ti hi dah?

²⁴ Sihmanhsehlaw vawlei ah Mi Fapa nih sualngaihthiam khawhnâk a ngei ti nan hngalh nâkhnga caah a ti i mizeng sinah, ‘Tho law, na ihphah la law, na inah kal,”’ tiah a ti.

²⁵ Hmakhatteah an mit hmuh ah a tho cawlh i a ihphah kha la in, Pathian thangṭhat pahin a inah a tlung.

²⁶ An dih lakin mak an ti ngaingai i Pathian thangṭhat in, “Nihin ah thilmak ngai kan hmuh,” tiah an ti i an ṭih ngaingai.

²⁷ Cuhnuah a chuak i ngunkhuai khawlhnâk hmun i a ṭhumi, ngunkhuai khawltu pakhat, a min Levi kha a hmuh i, “Ka zul” tiah a ti.

²⁸ Cun a tho i zeizong vialte kaltâk in a zulh.

²⁹ Levi nih a innah Jesuh caah rawldanghnâk nganpi a tuah i cuka ah ngunkhuai khawltu tampi le midang kha an sinah an ṭhu.

³⁰ Cun nawlbiacawnpiaktu le Farasih kha a lamkaltu sinah an phunzai, “Zeiruangahdah, ngunkhuai khawltu hna he nan ei i nan din?” tiah an ti.

³¹ Jesuh nih, “Ngandammi nih sibawi an herh lo, a zawmi hna nih an herh,” tiah a ti hna.

³² Midingmi hna auh awkah ka ra lo i misual hna auh i ngaihchihter awkah ka ra, tiah a leh hna.

³³ Annih nih, “Johan zultu hna nih rawl an ulh i thla an cam tawn, cun Farasih hna zong nih cubantukin an tuah tawn, asinain nan nih nan ei i nan din kun? tiah an ti.

³⁴ Jesuh nih, mo ngeitu an sinah a um chung pauh cu mo ngeitu hawi le rawl nan ulhter kho lai maw?

³⁵ Sihmanhsehlaw mo ngeitu kha an sinin lak cân a phân te lai, cu cân ah an ulh te lai,” tiah a ti.

³⁶ An sinah tahchuanhnâk bia a chim, “Ahohmanh nih puanthar in puanhlun an belh ballo, an belh ahcun a thar nih a hlun kha a thleh chin lai. Cucaah a thar le a hlun cu â rem kho lo.

³⁷ Ahohmanh nih misur hang thar saphaw hlun thawl ah an rawn bal lo, an rawn ahcun misur hang thar nih a khuai lai i a tle dih lai. Saphaw thawl zong a rawk dih lai.

³⁸ Cuticun misur hang thar cu saphaw thawl thar ah rawn ding a si i an pahnih in an him.

³⁹ Cun ahohmanh nih misur hang hlun an din dih in, misur hang thar an duh bal lo; “A hlun a ṭha deuh’ an ti tawn,” tiah a ti.