LUKA 3 - Laibaibal Thiang (BSI)

¹ Tiberius Sizar a si kum hleinga nâkah, Pontius Pailat cu Judia ram Mangki a si. Herod cu Galili ram uktu a si i a nau Filip cu Ituria le Trakhonitis peng uktu a si. Lisanias cu Abilen ram uktu a si.

² Annas le Kaifas cu tlângbawi ngan an si lio ah, ramcar i Zakariah fapa Johan sinah Pathian bia a phân.

³ Jordan tiva kam ram vialte a ṭol i sual ngaihthiamnâk caah ngaihchihnâk Baptisma kong kha a chimh hna.

⁴ Profet Isaiah cauk chungah, “Ramcar chung i aunâk aw nih, Bawipa lam remh ulaw, a lam kha dinter u.

⁵ Horkuang vialte chilh dih ulaw, mual le tlang kip niamter u, lamkawi mi dinter ulaw, lam bingboh mi ruanter u.

⁶ Cun mi vialte nih Pathian khamhnâk cu an hmuh lai,” a ti, tiah â ṭial bangin.

⁷ Anih nih, a sin i baptisma in awkah a rami mizapi sinah, “Rul fale hna, a ra laimi thinhunnâk zâmtâk dingin, ahonihdah ralrinnâk an pêk hna?

⁸ Cucaah theitlai chuah lakin i ngaihchih u. Abraham tefa kan si, tiah ruat hlah u. Duh sehlaw, Pathian nih hi lung hna hmanh hi Abraham tefa ah a canter khawh, tiah kan ti hna.

⁹ Atu thawkin thingkung hramkip ah hreitlung an chiah cang. Cucaah theitlai ṭha a tlai lomi thingkung pauh cu an hau i mei ah an hlawnh,” tiah a ti.

¹⁰ Mizapi nih, “Zeidah kan tuah kun lai?” tiah an ti.

¹¹ Anih nih an sinah, “Angki pahnih a ngeimi pauh nih, a ngei lomi pe seh, ei awk a ngeimi pauh nih cubangin tuah ve seh,” tiah a leh hna.

¹² Ngunkhuai khawltu hna zong an ra i, “Cawnpiaktu, zeidah kan tuah lai?” tiah an ti.

¹³ Anih nih, “Ri khiahmi nâk tamin khawl hrimhrim hna hlah u,” tiah a ti.

¹⁴ Cubantuk ṭhiamṭhiam in ralkap zong nih, “Kannih ta zeidah kan tuah lai?” tiah an hal. Anih nih, “Ahohmanh va tlerh hna hlah u law, lih in va nam hna hlah u. Nan hlawh ah nan lung tling seh,” tiah a ti hna.

¹⁵ Cuticun Johan kongah mipi ruahchannâk a sang chin. Krih a si ko lo maw, tiah an ruah lio ah,

¹⁶ Johan nih a leh hna i an dihlak sinah, “Kei nih ti ah baptisma kan pêk hna; asinain keimahnâk i a ngan deuhmi a ra lio, a kedan hri phoih awk hmanh ah kâ tlâk lo. Amah nih mei le Thiang thlarau in baptisma an pêk hna lai.

¹⁷ A kut in sisiap â ken i a hrih ah a zah lai, cun a fang kha bukah a khumh lai i a hi tu cu a mit lomi mei in a khangh lai,” tiah a ti.

¹⁸ Cun mizapi sinah thapêknâk bia kha a chimh hna.

¹⁹ Asinain siangpahrang Herod cu a nau nupi Herodi he an umṭinâk kongah le sualnâk dangdang a tuahmi kongah Johan nih a chimhhrin;

²⁰ cubantuk sualnâk a tuahmi vialte hlei ah Johan kha thong ah a thlak.

²¹ Mi vialte nih baptisma an in lio ah, Jesuh zong nih baptisma a in ve, thla a cam lio ah van kha â ong.

²² Cun Thiang thlarau cu ṭhuro pum bantukin a rung zuang i a cungah â fu, van in aw a rung chuak i, “Nangmah cu ka dawtmi Fapa na si; Na cungah ka lawm tak tak,” tiah a ti.

²³ Jesuh nih rianṭuan â thawk lio ah kum 30 a si i (mi ruahnâk ah) Josef fapa a si.

²⁴ cucu Mathat fa a si, cucu Levi fa a si, cucu Melki fa a si, cucu Janna fa a si, cucu Josef fa a si,

²⁵ cucu Mattathiah fa a si, cucu Amos fa a si, cucu Nahum fa a si, cucu Asli fa a si, cucu Naggai fa a si,

²⁶ cucu Maath fa a si, cucu Mattathias fa a si, cucu Simei fa a si, cucu Josef fa a si, cucu Judah fa a si.

²⁷ cucu Joanas fa a si, cucu Rhesa fa a si, cucu Zerubbabel fa a si, cucu Sheatiel fa a si, cucu Neri fa a si,

²⁸ cucu Melchi fa a si, cucu Addi fa a si, cucu Losam fa a si, cucu Elmodam fa a si, cucu Er fa a si.

²⁹ cucu Josea fa a si, cucu Eliezar fa a si, cucu Jorim fa a si, cucu Matthat fa a si, cucu Levi fa a si.

³⁰ cucu Simeon fa a si, cucu Judah fa a si, cucu Joseph fa a si, cucu Jonan fa a si, cucu Eliakim fa a si,

³¹ cucu Melea fa a si, cucu Menan fa a si, cucu Mattathah fa a si, cucu Nathan fa a si, cucu David fa a si.

³² cucu Jesse fa a si, cucu Obed fa a si, cucu Boas fa a si, cucu Salmon fa a si, cucu Nahshon fa a si,

³³ cucu Amminadab fa a si, cucu Ram fa a si, cucu Hezron fa a si, cucu Perez fa a si, cucu Judah fa a si.

³⁴ cucu Jakob fa a si, cucu Isac fa a si, cucu Abraham fa a si, cucu Terah fa a si, cucu Nahor fa a si.

³⁵ cucu Serug fa a si, cucu Reu fa a si, cucu Peleg fa a si, cucu Eber fa a si, cucu Shelah fa a si,

³⁶ cucu Cainan fa a si, cucu Arphaxad fa a si, cucu Shem fa a si, cucu Noah fa a si, cucu Lamech fa a si.

³⁷ cucu Methuselah fa si, cucu Enoch fa a si, cucu Jared fa a si, cucu Mahalalet fa a si, cucu Cainan fa a si,

³⁸ cucu Enosh fa a si, cucu Seth fa a si, cucu Adam fa a si, cucu Pathian fa a si.