LUKA 24 - Laibaibal Thiang (BSI)

¹ Zarhkhat chung ni hmasa bik khua a dei hnu ah annih hna cu nudang hna he rim hmui an timhlamhmi i put in thlân ah an kal i

² thlânin lung cu hrilh cia in an va hmuh.

³ An lut i Jesuh ruak kha an hmu lo.

⁴ A ruah awk hngallo i khuaruahhar i an um lio ah, ngaihmanh, a tleu ngaimi hnipuan â hrukmi pa pahnih an pawngah an rak dir.

⁵ An ṭihtuk ruangah vawlei zoh i an kun lio ah, cumi hna nih, “Zeiruangahdah mithi hna sinah minung nan kawl?

⁶ Hika ah a um ti lo, a tho ṭhân cang, Galili ram i a um lio ah nan si i a rak chimmi kha philhhlah ngat u.

⁷ Mi Fapa hi misual hna kutah tlaihter a si lai, an khenhchih lai i nithum ni ah a tho ṭhân lai, tiah a rak chimmi kha,” tiah an ti.

⁸ Cun a rak chimmi kha an hun hngalh ṭhân.

⁹ Cuhnuah thlân in an kir i hleikhat hna le midang sinah cu thil cu an chimh hna.

¹⁰ Cu nu hna, Mary Magdalin, Joanna, Jeim nu Mary le an sin i nu dang hna zong nih lamkaltu hna sinah cu bia cu an chimh hna.

¹¹ An chimmi bia hna cu bia lolak men ah an ruah i an zum lo.

¹² Peter cu a tho i thlân lei ah a tli. A kun i a zoh tikah khiangrâng puan lawng kha a hmuh. Cuticun thil umtuning mak ti ngai in a tluntâk ṭhân.

¹³ Ngaihmanh cu ni lila ah an lak i mi pahnih, Emmau khua ah kal an i tim, cukhua cu Jerusalem khua in meng sarih a si.

¹⁴ Annih nih thil umtuning vialte cu an i ruah thluah mah.

¹⁵ Cubangin an i ruah i an i al lio ah, Jesuh hrimhrim nih a panh hna i an sinah a kal.

¹⁶ Asinain an hngalh khawh nâkhnga lo anmit kha vaihter an si.

¹⁷ Anih nih, “Kalpah i hmaichia ngai in nan i ruah lenmi kha zeidah a si,” tiah a ti.

¹⁸ Pakhat deuh a min Kleopas nih, “Jeusalem khua i khual hna lakah nangmah lawng in maw na um? Atu lio thil umtuning na hngalh lo,” tiah a ti.

¹⁹ Anih nih, “Zei thil dah?” tiah a ti. Annih nih, “Nazaret Jesuh, Pathian le mi vialte mit hmuh ah bia le tuahsernâk i a min a thang ngaimi profet kong cu ta,

²⁰ tlângbawi hna le a kan uktu hna nih thi ding in thiamlo an coternâk kong le khenhchih a sinâk kong hna cuta.

²¹ Kannih nih Israel hna tlanhtu a si lai tiah kan i ruahchan thlathlak he. Cuhleiah, cuthil a sinâk cu nihin hi a nithumnâk a si.

²² Asi kanmah lak i nu cheukhat zingka te ah thlân i a kalmi hna nih kan khuaruah an harter.

²³ A ruak hmu ṭung loin, vanmi â langmi an hmuhnâk kong le, cu hna nih a nung`hân an tinâk kong an kan chimh.

²⁴ Kan lakah cheukhat thlân ah an va kal i nu hna chim bantukin an va hmuh, asinain Amah tu cu an hmu fawn lo,” tiah an chimh.

²⁵ Anih nih, “Mihrut hna! Profet hna chimmi vialte zumhnâk kongah lungkhongmi hna!

²⁶ Krih nih cuthil hna cu tuar in a sunparnâk ah a lut ding a si lo maw? tiah a ti hna.

²⁷ Cun Moses le Profet vialte ah â thawk i Cathiang vialte nih Amah kong an chimmi cu fianter in a chimh hna.

²⁸ Cuticun ankalnâk ding khua an naih cuahmah lio ah hla nawn i a kal lai ding bantukin a um.

²⁹ Asinain an thlauh i, “Kan sinah um ve ko, khua a tlai dengcang i ni zong a tlâk cang lai hih,” tiah an ti. Cun an sin i um dingin a lut.

³⁰ Cubangin an sinah rawldûm in a ṭhut lio ah, changreu a lâk i thluachuah a pêk, cun a cheu i a pêk hna.

³¹ Cuticun anmit a dei i aho a si kha an hun hngalh i anih cu a lo colh.

³² Annih nih, “Lam ah bia a kan ruah i Cathiang a fianter lio ah khan ka lungthin mei bangin a kan kangh len a si lo mei? tiah an i ti.

³³ Hmakhat teah an tho cawlh i Jerusalem ah an kir, hleikhat hna le an hawi dang kha an va hmuh hna.

³⁴ “Bawipa cu a tho ṭhân taktak ko, Simon sin zongah a lang tiah an rak ti.

³⁵ Annih zong nih lam i thil umtuning vialte le changreu a cheu i a muihmai an hun hngalh ṭhân nâk kong kha an chimh ve hna.

³⁶ Cubangin cu bia an chim lio ah, Amah Jesuh hrimhrim kha an lakah a hung dir i an sinah, “Nan cungah daihnâk um ko seh,” tiah a ti hna.

³⁷ Annih cu an lau i anṭih tuk hringhran, thlarau a hmumi ah an i ruat.

³⁸ Anih nih, “Zeiruangahdah nan khuaruah a har? Zeiruangahdah nan lungthin ah lunghrinhnâk a um?

³⁹ Ka kut le ka ke hna hi zoh hna ngat u, keimah hrimhrim kha ka si, ka tawng u law ka zoh tuah u, zeitintiah thlarau nih ruh le titsa a ngei lo, nanhmuh bangin kei nih cun ka ngeih ko hi ta,” tiah a ti.

⁴⁰ Cu bia a chimdih in akut le ake kha a zohter hna.

⁴¹ Asinain an i lomhtuk ruang i an zumh khawh rih lo ruang i khuaruahhar in an um lio ah, “Hika ah ei awk zeimaw, nan ngei maw?” tiah a ti.

⁴² Cuticun nga emmi le khuaithlar an pêk.

⁴³ Cucu a lâk i an mithmuh ah a ei.

⁴⁴ Cuticun an sinah, “Hi hna hi nansin i ka um lioah kan chimhmi hna kha a si, Moses nawlbia le, Profet hna cauk le, Sam cauk chungah ka kong ṭialmi vialte kha a taktak i a tlindih awk a si,” tiah a ti hna.

⁴⁵ Cun Cathiang an hngalh khawh nâkhnga an lungthin kha a on piak hna.

⁴⁶ Cuticun an sinah, “Hitihin ṭial a si, Krih nih a tuar a herh hrimhrim lai i nithum ni ah thihnâk in a thawhṭhân awk a si,

⁴⁷ cun Amah min in ngaihchihnâk le sual ngaihthiamnâk kong kha Jerusalem khua in an thawk lai i mi phunkip sinah chim a si lai.

⁴⁸ Nanmah hi hi thil vialte hngalpitu nan si.

⁴⁹ Ngaihmanh u, ka Pa, Biakam mi cu nan cungah ka run thlah lai, asinain cunglei in thiltikhawhnâk i thomh nan si hlan pauh cu Jerusalem hi chuaktâk hlah u.

⁵⁰ Cun Bethani haukâ tiangin annih cu a chuahpi hna i a ban thlir in thluachuah a pêk hna.

⁵¹ Cubangin thluachuah a pêk hna lio ah, ansin in â ṭhen i van ah kaipi a si.

⁵² Cun annih nih Amah cu an biak, lunglawm ngaiin Jerusalem ah an kir ṭhân i

⁵³ an cân vialte ṭempal ah Pathian thangṭhat le lawmhnâk bia chimnâk ah an hman. Amen.