LUKA 22 - Laibaibal Thiang (BSI)

¹ Thilnu cawhlo changreu Thô, lanhtâk Thô timi cu a nai cang.

² Tlângbawi hna le nawlbiacawnpiaktu hna nih an thah khawh nâkhnga a lam an kawl, zeitintiah zatlâng an ṭih hna.

³ Cuticun hleihnih hna chungmi, Judas, Iskariot an timi chungah Satan a lut.

⁴ Cuticun ava kal i tlângbawi hna le kilvengtu ralkap hna sinah Amah an tlaih khawh nâkhnga, a va ceihpi hna.

⁵ Annih cu an i lawm ngaingai, phaisa pêk dingah bia zong an kamh.

⁶ Anih nih, mizapi hngalh lo cân i tlaihter khawh dingin bia â kam.

⁷ Cuticun Thilnu cawhlo ni, lanhtâk Thô ca i tuufa thah cân kha a phân.

⁸ Jesuh nih Peter le Johan kha, “Lanhtâk Thô rawl kan ei`inâk caah va timtuah u,” tiah a thlah hna.

⁹ Annih nih, khawzeiahdah timtuah ning law na duh? tiah an ti.

¹⁰ Anih nih, “Zohhmanh u, khuapi i nan luh tikah, bel i ti apu mipa nih an ton hna lai a luhnâk innah nan zulh lai.

¹¹ Cun inn ngeitu sinah, “Cawnpiaktu nih, ka lamkaltu hna he lanhtâk Thô rawl kan ei nâkding khual umnâk khân cu khuazeiahdah,” a ti, tiah nan ti lai.

¹² Anih nih inn dot cungah khân kaupi timhcia dihmi an hmusak hna lai, cuka ah nan timh lai,” tiah a ti.

¹³ Cuticun an kal i a rak chimcia bantuk tein an va hmuh i lanhtâk Thô rawl cu an timh.

¹⁴ A cân a phâk tikah, Anih cu a ṭhu i lamkaltu hleihnih zong a sinah an um ve.

¹⁵ Cun an sinah, “Ka temtuar hlanah, hi lanhtâk Thô rawl eipi hi kâ ngaih i ka duh tukmi a si,

¹⁶ zeitintiah Pathian pennâk a taktak i tlinter a si hlan pauh cu, ka ei ṭhân ti lai lo, tiah kan chimh cang hna kha,” tiah a ti.

¹⁷ Cuticun hrai kha a lak i lawmhnâk bia a chim dih in, hihi la ulaw i phaw dih u;

¹⁸ zeitintiah kan chimh cang hna kha, atu thawkin Pathian pennâk a phâk hlan lo misur hang hi ka ding ti lai lo,” tiah a ti.

¹⁹ Changreu zong kha a lâk i lawmhnâk bia a chim dih in a cheu i an sinah a pêk. Hihi ka taksa nan ca i ka pêk ding cu a si. Nanka philhlonâk caah hihi rak tuah lengmang u,” tiah a ti.

²⁰ Cubangin zanriah ei dih ah, hrai zong kha a lâk i, “Hi hrai hi ka thisen i biakam thar, nan ca i a chuak hngami cu a si.

²¹ Asinain zohhmanh u, aka rawitu ding kut cu ka pawng i cabuai cungah a um ko.

²² Mi Fapa hi ruahcia a si bangin a kal hrimhrim ko lai, asinain a rawitu minung cu ngaihchia a va si dah,” tiah a ti.

²³ Annih nih anmah chung i cubantuk thil a tuahtu ding cu ahodah a si lai, tiah pakhat le pakhat an i hal.

²⁴ Cun anmah lakah ahodah a nganbik ah ruah a si hnga timi kongah elhnialnâk a um.

²⁵ Anih nih, “Gentel bawi hna cu an tangmi hna cungah an i bawiter ngaingai i an cung i nawlngeihtu hna cu, “Duhpiaktu” tiah an ti tawn hna.

²⁶ Nanmah chungah cubantuk cu a si awk a si lo, nanlak i nganbik si a duhmi cu a ngakchia deuhmi bangin um sehlaw, a bawi deuh cu rianṭuantu bangin um seh.

²⁷ Zeitintiah ahodah a ngan deuh, rawldûmtu maw rawlchuangtu? Rawldûmtu a si lai lo maw? Sasinain kei hi nanlak ah rawlchuangtu bangin ka um.

²⁸ Nannih hi hniksaknâk ka ton chung vialte aka umpitu nan si.

²⁹ Ka Pa nih ka sin i aka pêk bang khan, nan sinah pennâk kan pêk cang hna,

³⁰ cuticun ka Pennâk chung i ka cabuai cungah nan ei i nan din khawh nâkhnga le, Israel phun hleihnih bia ceihpiak in, bawi ṭhutdanh i nan ṭhut khawh nâkhnga,” tiah a ti.

³¹ Cun Bawipa nih, “Simon, Simon! Satan nih fangkhei bantukin an khei khawh nâkhnga nangmah hi an hal len dah kaw.

³² Asinain na zumhnâk a tlau nâkhnga lo thla kan campiak, ka sin i na rak kir ṭhân tikah na unau thazâng rak pe hna,” tiah a ti.

³³ Anih nih, “Bawipa, na kalnâk i kal ve dingah, thong tlak le thih zong ka zuam ko,” tiah a ti.

³⁴ Anih nih, “Peter, kan chimh, naka hngalhmi hi, voithum tiang naka hlawt hlan ah cun ar a khuang lai lo,” tiah a ti.

³⁵ Cun an sinah, “Phaisa bawm le zal, kedanh tel lo i khual kan tlawnter hna ah khan baumi nan ngei maw?” tiah a ti hna. Annih nih, “Ngei hlah” tiah an ti.

³⁶ Anih nih, “Atu ah cun phaisa bawm a ngeimi le zal ngeimi nih i ken seh, vainam a ngei lomi nih a thilri zuar sehlaw i cawk seh.

³⁷ Zeitintiah kan chimh hna, hi ṭialmi bia hi ka cungah a tling hngami a si. ‘Anih cu misual hna lakah relchih a si timi hi. Cu chimchung bia a tlinnâk ding cu keimah hi ka si,” tiah a ti.

³⁸ Annih nih, “Bawipa zohhmanh vainam pahnih a um ko,” tiah an ti. Anih nih, “Â za ko,” tiah a ti hna.

³⁹ Cun a chuak i a tuah tawn bantukin Oliv tlangah a kal i lamkaltu zong nih an zulh.

⁴⁰ A hmun a phâk tikah an sinah, “Tukforhnâk i nan luh nâkhnga lo, thlacam tuah u,” tiah a ti.

⁴¹ Anih cu lungchep tluk ah ava kal i a khuk bil in thla a cam,

⁴² “Ka Pa, rem na ti ahcun, hi hrai hi ka sin in ka ṭhial piak ko, asinain keimah nawl si loin, nangmah nawl siseh,” tiah a ti.

⁴³ Van in vanmi pakhat Amah thazâng pêk awkah a sinah â lang.

⁴⁴ A lung a fak tuk i fak chinchin in thla a cam. Cuticun a thlan cu thi dor nganpi bantukin leiah a tla.

⁴⁵ Thlacamnâk in a rak kir i a lamkaltu sinah a ra, ngaihchiat ruang i an i hngilh kha a hmuh hna.

⁴⁶ Cuticun an sinah, “Zeiruangahdah nan i hngilh? Tho ulaw, thlacam u, culoahcun tukforhnâk chungah nan lut sual lai,” tiah a ti.

⁴⁷ A chim lio ah, zohhmanh mizapi an rak phân; hleihnih lak i â tel vemi Judas an timi nih a rak hruai hna i hnamh awkah Jesuh kha a panh.

⁴⁸ Jesuh nih, Judas, Mi Fapa hi hnamh in na tlaihter lai maw? tiah a ti.

⁴⁹ A pawng kammi nih thil a cang hngami cu an hmuh tikah, “Bawipa, vainam kan hmang hnga maw? tiah an ti.

⁵⁰ Cun an lakah mi pakhat nih tlângbawi nganbik sinum kha a tuk i a orhlei hnâ tla lak in a tuk.

⁵¹ Jesuh nih, “Zâ cang seh, a ti i a orhlei hnâ cu a tongh piak i a damter.

⁵² Jesuh nih tlângbawi le, ṭempal uktu le, upa hna sinah, “Damiah tlaih ding bangin, vainam le tanbo he nan rak pawk maw?

⁵³ Ṭempal ah nichiar te nan sin i ka um lio ah khan tlaih awkah nan ka fuh fawn lo. Asinain atu hi khuamui thiltikhawhnâk le nannih cawlcangh cân cu a si,” tiah a ti.

⁵⁴ Cuticun an tlaih i hnuchihlen bu in tlângbawi nganbik innah an kalpi. Peter nih ral khat in a zulh.

⁵⁵ Tual rawn ah mei an kau i an ṭhu. Peter zong an sinah a ṭhu ve.

⁵⁶ Mei ceu i a ṭhut ko kha sinum ngaknu pakhat nih a hmuh, a zoh peng i, “Hi pa zong hi a sin i ummi a si,” tiah a ti.

⁵⁷ Anih nih, “Minu, na chimmi cu, ka hngal lo, tiah a hlawt.

⁵⁸ Tlawmpal ah midang nih a rak hmuh ṭhân i “Nang zong anmah chungmi na si ve ko,” tiah a ti. Peter nih, “Mipa, ka si hrimhrim lo, tiah a ti.

⁵⁹ Suimilâm pakhat hnu ah midang nih a sinah thei fiang ngaiin, “Hipa hi a sinah a ummi a si hrimhrim ko, Galili mi a si,” tiah a ti.

⁶⁰ Peter nih, “Mipa, na chimmi cu ka hngal hrimhrim lo!” tiah a ti. A chim cuahmah lio ah Ar a khuang cawlh.

⁶¹ Bawipa cu a hun i mer i Peter kha a hun zoh. Cu cângkâ, Bawipa nih, “Ni hin ah Ar a khuan hlanah voithum naka hlawt lai,” tiah a sin i a chimmi kha Peter nih a hun hngalh ṭhân.

⁶² Cuticun Peter cu a chuak i lunghno ngai in a ṭap thluah mah.

⁶³ Jesuh tlaitu hna nih Amah cu nichuak saihnâk ah an hman i an tuk.

⁶⁴ A mit an tuam i a hmai ah an bengh, kan chim tuah, ahonihdah an bengh? tiah an ti.

⁶⁵ Biachiakhâ phunkip in an au hnawh.

⁶⁶ A thaizing khua a dei le cângkâ zatlâng upa hna le, tlângbawi hna le, nawlbia cawnpiaktu kha an i tong i an biaceihnâk ah an kalpi.

⁶⁷ “Krih na si taktak ahcun kan chim tuah,” tiah an ti. Anih nih, “In chim hmanh hna ning law, nan zum lai lo.

⁶⁸ In hal hmanh hna ning law, nanka let lai lo, nanka chuahter fawn lai lo.

⁶⁹ Atu thawk in Mi Fapa hi Pathian thiltikhawhnâk orhlei ah a ṭhu cang lai,” tiah a ti.

⁷⁰ An dih lakin, “Nang hi, Pathian Fapa cu maw na si?” tiah an ti. Anih nih, “Dik ngai in ka sinâk nan chim” tiah a ti.

⁷¹ Annih nih, “Hngalhpitu dang zeidah kan herh ti hnga? kanmah hrimhrim nih a kâ in a chimmi kan theih dih cang,” tiah an ti.