LUKA 2 - Laibaibal Thiang (BSI)

¹ Cun hitihin a si, Sizar Augustus nih mi vialte min ṭial awkah nawl a pêk.

² Cu minṭial cân cu Siria ram i Khuirinias Mangki a ṭuan lio ah a si.

³ Cuticun minṭial awkah, mikip anmah le an khua cio ah an kal.

⁴ Josef zong David hrinthlak le chungkhar a si caah Galili ram Nazaret khua in Judia ram Bethlehem, David khua ah

⁵ nupi caah a hammi Mary, nau a pawimi he an kal.

⁶ Cu hmun an um lio ah, nau hrin cân kha a phân.

⁷ Cun a fater ah pa a hrin i puan in a zual, khualbuk ah an i tlum ti lo caah saṭil rawlpêknâk kuangah a ihter.

⁸ Cu ramah tuukhâl an um i an tuu kha khâl in zanah an riahpi hna.

⁹ Cun ngaihmanh, Bawipa vancungmi pakhat an hmaiah a dir, Bawipa sunparnâk nih an vêlchûm kha a run ceuh i an ṭih ngaingai.

¹⁰ Vanmi nih, “ṭih hlah u law, ngaihmanh u, mi vialte caah lunglawmhnâk Thawngṭha ka ratpi.

¹¹ Ni hin ah hin David khua ah nan caah Khamhtu a chuak cang, Bawi Krih cu.

¹² Hihi nan caah hmenchunhnâk a si lai; puan in zualmi Ngakchia, siṭil rawlpêknâk kuang i ih termi nan hmuh lai,” tiah a ti.

¹³ Chikkhatteah vanmi sinah van mirun an i pum i Pathian an thangṭhat.

¹⁴ “Cungnung bikah Pathian thangṭhat in um ko seh. Lei cungah a lawmhmi minung sinah daihnâk um ko seh,” tiah an ti.

¹⁵ Cuticun vanmi nih van i an kaltâk hna hnu ah, tuukhal hna nih, “Atu ah hin Bethlehem khua ah kal usih law, Bawipa nih a kan chimhmi kha va zoh u sih,” tiah pakhat le pakhat an ti.

¹⁶ Khulrangin an kal i Mary le Josef, saṭil rawlpêknâk kuang i ihtermi Ngakchia he an hmuh hna.

¹⁷ Cubangin Ngakchia kong i an theihmi vialte kha kau piin an thanh.

¹⁸ A theitu vialte nih tuukhal hna chimmi cu mak an ti ngaingai.

¹⁹ Asinain Mary nih cu thil vialte cu a lung chungin â cinken.

²⁰ Cuticun tuukhal hna nih chimh an rak si bantuk tein zeizong vialte an va hmuh i an va hngalhmi ruangah Pathian thangṭhat pahin an kir ṭhân.

²¹ Cun Ngakchia cu cuarpar tannâk dingah niriat a tlin tikah, a min ah JESUH tiah an sak, cucu nau-in i a um hlan hmanh ah vanmi nih an rak bunh cangmi a si.

²² Moses nawlbia bangin Mary thenhnâk ni a dih tikah, Bawipa sin i pêkchanh awkah Jerusalem khua ah an kalpi

²³ (Bawipa nawlbia ah ṭial a rak si bangin, “Nau in a ong hmasa bik fapa cu Bawipa caah a thiangmi a si”)

²⁴ Bawipa nawlbia ah ṭialmi bangin thawinâk pêkchanh awkah, parva fa pahnih kha pêkchanh ding a si.

²⁵ Cun ngaihmanh, Jerusalem khua ah mi pakhat, a min Simeon a um, cupa cu mi dik le Pathian a tlaihchanmi a si i Israel Hnangamtertu ding kha a rak hngak pengtu a si, a cungah Thiang Thlarau a um,

²⁶ Bawipa Krih a hmuh hlan pauh cu a thi lai lo tiah Thiang Thlarau nih a hngalhter cang.

²⁷ Cuticun Thlarau hruainâk in Ngakchia Jesuh cu nawlbia nih a fial bang i tuah awkah anu le apa nih an rak luhpi lio ah ṭempal chungah a lut,

²⁸ anih nih a rak pom i Pathian a thangṭhat;

²⁹ “Bawipa atu cu na bia bantukin nasalpa hi hnangam tein na kalter cang lai.

³⁰ Zeitintiah mi vialte hmai i na timhlamhmi

³¹ Khamhnâk cu ka mit in ka hmuh cang.

³² Nami Israel hna sunparnâk ding le, Gentel mi hna sin i phuan ding ceunâk cu a si,” tiah a ti.

³³ Amah kong i a chimmi hna cu Josef le anu nih mak an ti ngai ngai.

³⁴ Simeon nih annih cu thluachuah a pêk hna i anu Mary sinah, “Ngaihmanh, hi Ngakchia hi Isarel mi lakah mitampi tlukrilhnâk ding le mi tampi dirtertu dingah ruahmi a si. Mi nih an ralchanh te lainâk hmelchunhnâk he,

³⁵ mitampi nih lungthin i an ruahmi langhternâk caah, (nang zong na nunnâk cu feiin tleng lakin a chunhh te lai) tiah a ti.

³⁶ Profet nu pakhat, Anna, Asher phun chung i Fanuel fanu kha a um. A tar ngai ngai cang, Ngaknu thiang a si lio i a hmuhmi va he kum sarih an rak umṭi,

³⁷ hi nu hi kum 84 chung nuhmei a si, ṭempal kaltâk loin, chun zan hlan in thlacam le rawl ul in Pathian a biak tawn.

³⁸ Cu cân ah a ra i Pathian sinah lomhnâk bia a chim i Jerusalem khamh a si lai nâk â ruahchanmi vialte sinah a kong kha a chim tawn.

³⁹ Cubangin Bawipa nawlbia bang i thil vialte an tuah dih hnu ah Galili ram i an khua Nazarel ah an tlung ṭhân.

⁴⁰ Cun ngakchia cu a ṭhang lengmang i thlarau ah a ṭhawng chin lengmang, fimnâk in a khat i Pathian vêl kha a cungah a um.

⁴¹ Kum chiar tein Lanhtâk Thô ah anu le pa cu Jerusalem ah an kal tawn.

⁴² Cun kum 12 a si tikah, thô phung bantukin Jerusalem ah an kal.

⁴³ Thô a dih i an tlun tikah, pa Ngakchia Jesuh cu Jerusalem khua ah a câm. Josef le anu nih an hngal lo;

⁴⁴ anbu chungah â tel ve ko rua tiah an ruah, nikhat an kal hnu ah chungkhat le rualchan hna sinah an kawl.

⁴⁵ Cuticun an hmuh lo caah kawl pah in Jerusalem ah an kir.

⁴⁶ Nithum hnu ah ṭempal i cawnpiaktu hna sinah ṭhu in, an bia a ngaih i bia a rak hal len hna lio ah an va hmuh.

⁴⁷ A fimning le biahalnâk leh a thiamning kha an khuaruah a har dih.

⁴⁸ Amah an hmuh tikah mak an ti ngai ngai i anu nih, “Pa te, zeiruangahdah hibangin na kan tuah? Napa le keimah nih lungrethei in kan in kawl hi,” tiah a ti.

⁴⁹ Anih nih, “Zeiruangahdah nanka kawl? Ka Pa rianah ka um lai hi nan hngal lo maw?” tiah a ti.

⁵⁰ Asinain an sin i a chimmi bia cu a sullam an hngal lo.

⁵¹ Cuticun an sinah a kal ve i Nazaret an phâk tikah an nawl tangah a um, asinain anu nih cuthil hna cu a lungchungin â cinken.

⁵² Jesuh cu pum le fimnâkin a ṭhang i Pathian le minung mithmai ṭha a hmuh.