LUKA 17 - Laibaibal Thiang (BSI)

¹ Cuhnuah a lamkaltu hna sinah, tluknâk hi umlo kho a si lo. asinain tluknâk a umtertu cu ngaihchia a va si dah!

² Himi hna lak i a hme bik zong tlukternâk cha cun, a tluktertu hngawngah facang rialnâk lung thlaih i rili ah thlak sisehlaw a caah a ṭha deuh.

³ I ralring u, na unau nih na cungah sualnâk a tuah ahcun, chimhring, â ngaihchih ahcun, ngaithiam.

⁴ Nikhat ah voi sarih sualnâk a tuah i voi sarih in kâ ngaihchih, tiin nangmah lei i â mer ahcun na ngaihthiam lai,” tiah a ti.

⁵ Lamkaltu hna nih Bawipa sinah, “Kan zumhnâk karhter” tiah an ti.

⁶ Bawipa nih, “Anṭam ci pakhat bantuk zumhnâk nan ngeih ahcun, hi thingtheihmu kung sinah i phawi law rili ah va bunh, nan ti lai i nan nawl a ngaih ko lai.

⁷ Nan lakah, sinum leithuangtu siseh, tuukhal siseh hei ngei ulaw, lo i a rak tlun le cângkâ, rawl rak dûm cawlh, tiah nan ti hnga maw?

⁸ ‘Ka ei awk rawl ser law, timhcia tein, ka ei chung vialte rak ka bultawl, cu hnu ah na ei ve lai,’ tiah a ti deuh hnga lo maw?

⁹ Na nawl bang i an tuah tikah sinum sinah lawmhnâk bia na chim lai maw? ka zum lo.

¹⁰ Cubantukin nan nih zongnih, nan sin i nawlpêk vialte bangin nan tuah dih hnu ah, ‘san a tlai lomi sinum kan si. Kan tuah awk kan tuah a si ko,’ tiah ti u,” tiah a ti.

¹¹ Jerusalem a kal lio ah, Galili le Samaria ram laifang kha a tan.

¹² Khua pakhat i a luh lai ah, thinghmuimi pahra hna nih an rak ton i hlapi ah an dir.

¹³ Aw thangpi in an au i, “Jesuh, Cawnpiaktu, kan zângfah ko,” tiah an ti.

¹⁴ Annih cu a hmuh tikah, kal ulaw, tlângbawi sinah va zohter u,” tiah a ti. Cubangin an kal lio ah khan an thiang dih.

¹⁵ Cun anlak i pakhat nih ka dam tiah â hngalh tikah, a kir ṭhân i aw thang piin Pathian a thangṭhat,

¹⁶ Ake hramah a bawk i lawmhnâk bia a chim. Amah cu Samaria mi a si.

¹⁷ Jesuh nih, “A thiangmi kha pahra nan si lo maw? pakua hna kha ta khuazeiahdah an um?

¹⁸ Pathian thangṭhat awkah a rak kirmi, hi ramdangmi dah ti lo a dang an um lo maw?” tiah a ti.

¹⁹ Cupa sinah “Tho law, kal. Na zumhnâk nih an damter” tiah a ti.

²⁰ Farasih hna nih Pathian pennâk a phanh lainâk kong an halmi kha a leh hna i an sinah, “Pathian Pennâk cu hmuhkhawh i a phân ding a si lo.

²¹ Zohhmah u, hika ah, asiloah, khika ah, an ti lai lo. Zeitintiah Pathian pennâk cu nan chungah a um,” tiah a ti.

²² Cuhnuah lamkaltu hna sinah, “Mi Fapa nunlio cân hi nikhat te lawnghmanh hmuh nan duh cân a phân te lai i nan hmu ti lai lo.

²³ Nan sinah, ‘zohhmanh u, hika ah!’ ‘zohhmanh u, khika ah!’ an in ti hna lai. Chuak hlah u, zul fawn hna hlah u.

²⁴ Zeitintiah nimtlau â lek i van hram khatte lei in khatte lei tiang a tleuh bantukin Mi Fapa ratni ah a um te lai.

²⁵ Sihmanhsehlaw cu cân a phâk hlan ah thil tampi a tuar hmasa lai i atu chanthar hna hlawt in a um lai.

²⁶ Noa chan thil umtuning bantukin Mi Fapa ratnâk ni ah a um te lai.

²⁷ Noa lawng i a luh i tilian a rak tlun i an dihlak i a khuh dih hna ni kha a phâk hlan tiangin, an ei, an ding i nupi pasal an i ngei.

²⁸ Cubangin Lot a nun lio zongah a rak um. An ei an ding, an cawk, an zuar, thlai an cin, in an sa;

²⁹ asinain Sodom khua in Lot a chuah ni ah vanin mei le kât a sur i a thah dih hna.

³⁰ Cubantukin Mi Fapa a langhni ah a um te lai.

³¹ Cu ni ah, inncung i a kaimi nih innchung i a chawva lâk awkah ṭum hlahseh, lo i a ummi zong tlung hlah seh.

³² Lot nupi philh hlah u.

³³ A nunnâk humhâk a duhmi pauh nih a hloh lai i a nunnâk hloh a ngamhtu nih a humhâk te lai.

³⁴ Kan chimh hna, cu zan ah ih khun pakhat ah mi pahnih an um lai i pakhat cu lâk a si lai i pakhat cu nganhtâk a si lai.

³⁵ Nu pahnih fâng an su lai i pakhat lâk a si lai i pakhat nganhtâk a si lai.

³⁶ Lo ah mi pa hnih an um lai, pakhat lâk a si lai i pakhat ngahtâk a si lai.

³⁷ Annih nih an rak leh i, “Bawipa, khawzeiahdah?” tiah an ti. Anih nih, “Saruak umnâk pauh ah, Langta zong an i pum lai,” tiah a ti.