LUKA 16 - Laibaibal Thiang (BSI)

¹ A lamkaltu sinah, hi bia zong hi a chim. Mirum pakhat nih chawkengtu a ngei i cupa nih a chaw kha a hloh tawn, tiah an chimh.

² Cuticun amah kha a auh i na kong ka theihmi hi zeitindah a si? Na chaw ken ning cang ṭial tuah, atu thawk cun chawkengtu na si kho ti lai lo,’ tiah a ti.

³ “Chawkengtu nih a lung chungin, ‘Kapu nih chawkengtu rian phuah a ka timh cang. Lei cawh ka huam fawn lo. Kut dawh le ka ning a zak lai. Zeitindah ka tuah kun lai?

⁴ Chawkengtu sinâk in a ka phuah hnuah an inn i anka cohlan khawhnâk ding ka hngalh cang’ tiah a ti.

⁵ “Cuticun apu chaw a batu kha a auh hna i a hmasa bik sinah, ‘Kapu sinah zeizatdah na bat?’ tiah a ti.

⁶ Anih nih, chiti pung zakhat, tiah a ti. Anih nih na batnâk cauk hun la tuah, ṭhu law, sawmnga, tiah ṭial’ tiah a ti.

⁷ Cuticun mi dang sinah, nang zeizatdah na bat? tiah a ti. Facang pung zakhat, tiah a ti. Na batnâk cauk ah, ‘sawm riat’ tiah ṭial,’ tiah a ti.

⁸ Cuticun apu nih a ding lomi chawkengtu remruat thiamning kha a thangṭhat. Vawlei fale hna hi tu chan thil umtuning ah ceunâk fale nâkin an fim deuh, tiah a ti.

⁹ “Kan chimh hna, vawlei chaw deu hi hawikawm ser nâkah hmang u, chawva a dih hnu zongah zungzal inah cohlan nan si lai.

¹⁰ Tlawmte cungah zumhawk a tlâkmi cu, tampi cung zongah zumh an tlâk tawn; tlawmte cungah zumhawk a tlâk lomi cu, tampi cung zongah zumh an tlâk tawn lo.

¹¹ Cucaah chaw deu cung hmanh i zumhawk nan tlâk lo ahcun, chaw taktak cu zeitindah nan zohkhenh khawh lai?

¹² Cun midang thil hmanh i zumhawk nan tlâk lo ahcun, nan ta ding a simi cu zeitindah an in pêk ngam hna lai?

¹³ Sinum ahohmanh nih pu pahnih rian an kemh kho lo. Pakhat hua in pakhat an duh lai. Asiloah, pakhat ṭanh in pakhat an zomhtaih lai. Pathian le phaisa rian nan kep kho lo,’ tiah a ti.

¹⁴ Phaisa a duhtukmi farasih hna nih cucu an rak ngai ve i an nih sawh.

¹⁵ Cun an sinah, “Mi hmuhnâk i â feltermi lawng nan si. Asinain Pathian nih nan lungthin a hngalh. Minung hna cawisanmi hi Pathian mit hmuh ah fihnung a si.

¹⁶ Nawlbia le profet hna kha Johan tiang a si. Cu hnu ah Pathian Pennâk kong hi chim a si. Luh awkah mi nih an fuh len ko.

¹⁷ Nawlbia chung i a deh hmebik zong a lohtlaunâk cha cun van le vawlei loh tlau a fawi deuh.

¹⁸ Ahohmanh nupi a mâk i nupi dang a ngeimi cu ṭangdang kai a si.

¹⁹ ‘Mirum pakhat a um i puansenduk i aih in ni fatin nuamngai in khua a sa.

²⁰ Asinain kutdawh pakhat a min Lazaruh, hma nih a pumpuluk in a tlunhmi a um ve i a innkâ hramah an ihter tawn,

²¹ mirumpa cabuai tang i rawl ṭilṭawt a tlami rak char kha aduh ngaingai, cu chinchap ah, a hma kha uico nih an liah piak tawn.

²² Cun hitihin a si. Kutdawhpa cu a thi i vanmi nih Abraham ṭang chungah an kalpi. Mirumpa zong a thi ve i an vui.

²³ Cun mithi khua ah harnâk tuarin a um, van lei a hun zoh i lam hlapi i Abraham `ângchung ah a ummi Lazaruh kha a hmuh.

²⁴ Cuticun a au i, “Ka pa, Abramham ka zângfah, Lazaruh kha fial law, ka lei daihter nâk dingah a kutdong par ti-ah ciah seh, zeitintiah hi mei alh ah hin ka temtuar tuk hringhran,” tiah a ti.

²⁵ Sihmanhsehlaw Abraham nih, ‘Ka fapa na nunlio ah khan thilṭha vialte na co i Lazaruh nih thilṭha lo vialte a co kha philh hlah, asinain atu cu hika ah hnangam tein anih cu a um i nang cu harnâk natuar a si kha.

²⁶ Cu hleiah, hika in nan sinah kal â timmi an kal khawh nâkhnga lo le, nansin in kan sinah ahohmanh an rat khawh nâkhnga lo, kan karlak ah hawrkuang thukpi umter a si,” tiah a ti.

²⁷ “Anih nih, asiahcun, ka pa, amah cu kapa innah kalding in kan nawl.

²⁸ zeitintiah chuahpi unau panga ka ngei, hi temtuarnâk ah hin an rat sual nâkhnga lo va hngalhter hna seh,” tiah a ti.

²⁹ Abraham nih, “Moses le Profet an ngei ko hna, an bia ngai ko hna seh,” tiah a ti.

³⁰ Anih nih, ‘Kapa, Abraham, a si lo, mithi khua in an sin i a kal ahcun an i ngaihchih lai,’ tiah a ti.

³¹ Asinain anih nih, “Moses le Profet hna bia an ngaih lo ahcun thihnâk in tho ṭhân hmanhsehlaw an ngai hlei lai lo,” tiah a ti.