LUKA 15 - Laibaibal Thiang (BSI)

¹ Cuhnuah ngunkhuai khawltu le misual vialte nih a bia ngai dingin an run naih.

² Farasih hna le nawlbiacawnpiaktu hna nih, “Hipa nih hin misual a komh hna i rawl zong a eipi tawn hna tiah an sawi.

³ Cuticun hi tahchunhnâk hi a chimh hna.

⁴ Nanlakah mi pakhat khat nih tuu zakhat ngei ulaw, pakhat kha thlau sehlaw, sawmkua le pakua kha kal takin a tlaumi kha nan hmuh hlan lo nan kawl lai lo maw?

⁵ A hmuh tikah lunglawm ngaiin a liangah â chonh lai.

⁶ Inn a phâk tikah, innpa le a hawi le a auh hna lai i, “Ka lomhpi u, a tlaumi ka tuu ka hmuh cang,” tiah a ti lai.

⁷ Kan chimh hna, cubangin miding sawmkua le pakua ngaihchih a herh lomi nâkin misual pakhat a ngaihchihmi kongah vanah lunglomhnâk a tam deuh.

⁸ “Nu zeihmanh nih ngamu pahra ngeiin pakhat thlau sehlaw, meiin vangin, a inn cu a phiah lai i a hmuh hlan tiang a kawl lomi nan um hnga maw?

⁹ A hmuh tikah a hawikom le innpa kha au in, “Ka lomhpi u, a tlaumi ka ngamu ka hmuh cang,” a ti lai.

¹⁰ Cubangin kan chimh hna, Pathian vanmi hna hmaiah, misual pakhat ngaihchih nâkah an i lawm tawn.

¹¹ Cun mi pakhat nih fapa pahnih a ngei,

¹² A ngakchia deuhnih apa sinah, kapa, ka co hngami ro ka pe? tiah a ti. Cuticun a chawva kha a phawt hna.

¹³ Ni tlawmpal hnu ah a ngakchia deuh nih a co hngami vialte â lak i ram hlapi ah a tlawng, cukaah a chawva cu nomhhnaihnâk lawng teah a hman hna.

¹⁴ Cun a chawva a hman dih in, cu ramah fak piin mangṭâm a tlung i ei awk a ngei ti lo.

¹⁵ Cuticun cu ram i mi pakhat sinah a um. Cupa nih vawkrawl pe dingin lo ah a kalter.

¹⁶ Vawk nih an eimi bekawng hna i paw i khimter kha a duh ngaingai. Asinain ahohmanh nih zeihmanh an pe lo.

¹⁷ Cubangin amah le amah a hun i hngalh tikah, kapa sinah kuli a ṭuanmi hna nih ei cawk loin rawl an ngeih lioah, kei hika ah rawlṭâm in ka thi lai maw?

¹⁸ Ka tho lai i kapa sinah ka kal lai, a sinah, kapa, nahmai le vanmi hmai ah ka sual cang,

¹⁹ na fapa ti awk hmanh ah kâ tlâk ti lo. Na sin i kuli a ṭuanmi pakhat bangin ka siter ko,” ka ti lai, tiah a ti.

²⁰ Cun a tho i apa sinah a kal. Lam hlapi i a um lio ah apa nih a rak hmuh i a zângfah tuk hrinhran, a tlik hnawh i a hngawngah kup in a hnamh.

²¹ Cun a fapa nih, ‘Kapa, vanmi le nangmah hmaiah ka sual cang, nafa tiah kawh awkah kâ tlâk ti lo,’ tiah a ti.

²² “Asinain apa nih a sinum hna sinah, ‘A ṭha bik puan kha rak pu ulaw ngaihter u, a kutah zunghruk hruk u law a ke ah kedan danh u.’

²³ Cun a thau bik caw kha ratpi ulaw, that u, ei u sih law i nuam u sih,

²⁴ zeitintiah hi ka fapa hi a thi i atu a nung cang, a tlau i atu kan hmuh cang.’ Cun nuam ngaiin um hram an thawk.

²⁵ Cun upa deuh kha lo ah a um. A rak tlung i inn a phâk laiah ringawn tum thawng le lâm thawng kha a theih.

²⁶ Sinum pakhat a auh i, “Cucu zeithildah a si?” tiah a hal.

²⁷ Anih nih, na nau a rak tlung i him tein a hmuh ṭhân caah napa nih a thaumi caw kha a thah,” tiah a ti.

²⁸ Cuticun a thin a hung i a lut duh lo. Cucaah apa kha ra in a rak lêm.

²⁹ Anih nih, kum tampi na rian ka ṭuan, na nawl ngai loin ka um bal fawn lo; ka hawi le hna he i nomhnâk dingah meheh fa pakhat hmanh naka pe bal lo.

³⁰ Hi na fapa, hlawhhlang hna sinah na chaw a hmang dihtu hi a rak tlun le cângkâ a thaumi caw na thah, tiah a leh.

³¹ “Anih nih, ‘Ka fapa, ka sin i a um pengmi na si i ka ngeihmi vialte hi nata an si dih.

³² Hi na nau hi a thi i a nung ṭhân cang. A tlau i kan hmuh ṭhân. Cucaah lunglawm tein um ding kan si lai lo maw,’ tiah a ti,” tiah a ti.