LUKA 13 - Laibaibal Thiang (BSI)

¹ Cu cân ah Pailat nih Galili mi hna a thah i an thisen kha an raithawinâk ah an cawhchihnâk kong a chimtu an um.

² Jesuh nih, “Cu Galili mi hna cu cuthil an temtuar ruangah Galili midang hna nâkin an sual deuh tiah nan ruah maw?

³ A si lo, kan chimh hna, nan i ngaihchih lo ahcun anmah bangin nan lotlau dih lai.

⁴ Asiloah, Siloam innsâng nih a nenhmi hleiriat hna kha, Jerusalem i a ummi midang nâkin an sual deuh tiah nan ruat maw?

⁵ A si lo, kan chimh hna, nan i ngaihchih lo ahcun anmah bantukin nan lo tlau dih lai.

⁶ Hi tahchunhnâk zong hi a chimh hna. Mi pakhat nih a misur dûmah theipi kung pakhat a cin, a kungah a thei hmuh â tim nain pakhat hmanh a hmu lo.

⁷ Cuticun Misur zohkhenhtu sinah, zohhmanh, kumthum chung hi theipi kungah a thei ka kawl i pakhat hmanh ka hmu lo. Hau ko, zeicadah hmun a rawlh peng lai? tiah a ti.

⁸ Asinain anih nih, “Ka pu, tukum hi cu um rih seh, a velchum ka cawh lai i non ka toih rih lai.

⁹ A tlai ahcun a ṭha tuk lai. Asinain a tlai lo ahcun na hau ko lai,” tiah a ti.

¹⁰ Sabbath ni ah Sinagog pakhat ah mi a cawnpiak hna.

¹¹ Cun ngaihmanh, nu pakhat kum hleiriat chung ṭawntaihnâk thlarau nih a ngawrter i a keng â kuai i ding tein a dir kho ti lo.

¹² Jesuh nih a hmuh tikah a sinah a auh i, “Minu na zawtnâk nih an thlah cang” tiah a ti.

¹³ A cungah akut a chuan i hmakhat teah ding tein a dir kho i Pathian a thangṭhat.

¹⁴ Cubangin Jesuh nih Sabbath ni i mi a damter tikah Sinagog hotu cu a thin a hung i zapi sinah, “Minung caah niruk chung rianṭuannâk a um, cu chungah ra ulaw i damter ngat u, Sabbath ni ah si loin,” tiah a ti.

¹⁵ Bawipa nih, “Midepde hna, nannih zongnih Sabbath ni ah, nan caw siseh, nan lâ siseh an khihnâk phoih in ti dinter awkah a chuakpi lomi nan um maw?

¹⁶ Hi minu, Abraham fanu chinchap, Satan nih kum hleiriat chung a rak ṭemmi, Sabbath ni zongah phoih awk a si hnga lo maw?” tiah a ti.

¹⁷ A chimmi bia nih a ral vialte an ning a zakter dih hna. Zapi tu cu a tuahmi thil liannganmi ruangah khan an i lawm.

¹⁸ Anih nih, “Pathian pennâk cu zeibantukdah a si i zeihedah ka tahchunh hnga?

¹⁹ Anṭamci pakhat minih â lâk i a dûm i a cin bantuk cu a si, a ṭhang i thingkung ngan pi ah a cang. Vanva hna nih a nge ah bu an but,” tiah a ti.

²⁰ Pathian pennâk cu zeihedah ka tahchunh ṭhân lai?

²¹ “Nu nih thilnu a lak i changvut seithum dih lak thawhter awkah a phulh bantuk a si,” tiah a ti.

²² Anih cu khuapi le khuate ṭol pah in a cawnpiak hna i Jerusalem lei kha a panh.

²³ Cuhnuah mi pakhat nih a sinah, “Bawipa, khamhmi cu tlawmte maw an si?” tiah a ti. Anih nih an sinah,

²⁴ “Kutka bi ah luh i tim u, kan chimh hna, mitampi nih luh an timh na in, an lut kho lo.

²⁵ Inngeitu a rak chuah i innkâ a khar ahcun, nannih nih lengah dir in, ‘Bawipa, Bawipa, kan on piak ko, tiah va king hmanh ulaw, ‘khuazeilei mi dah nan si kan hngal hna lo,’ tiah an leh hna lai.

²⁶ Nannih nih, ‘Nahmuh lio ah kan ei i kan dintawn kha, kan inn hmai zongah na cawnpiak tawn kha,’ nan ti lai.

²⁷ Asinain anih nih, khawzei leimi dah nan si kan hngal hna lo, nannih sualnâk a tuahtu hna, ka sinin lo diam kal u, an ti hna lai.

²⁸ ‘Abraham, Isak, Jokob le Profet vialte kha Pathian pennâk chung i an um nan hmuh i nannih tu leng i hlawnh nan si tikah, cuka ahcun ṭah le hacang rialnâk a um lai.

²⁹ Chak le thlang nichuah nitlâk in mi an ra lai i Pathian pennâk ah an ṭhu lai.

³⁰ Hmadung bik zong hmasa bik an si lai, hmasa bik zong hmadung bik an si lai,” tiah a ti hna.

³¹ Cuni ah Farasih cheukhat an ra i a sinah, “Chuaklaw, hika hin kal, zeitintiah Herod nih thah an duh,” tiah an ti.

³² Anih nih, “Va kal u law cu cenghngia sinah, ‘Zohhmanh, nihin he, thaizing he khuachia ka ṭhawl hna lai, mizaw zong ka damter hna lai i a nithum nâkah ka lîm lai,’ tiah va chim u.

³³ Zeiasihmanhah nihin he thaizing he kiptuh zongah, ka kal thluahmah awk a si. zeitintiah Jerusalem hau lengah profet thih khawh a si lo,” tiah a ti.

³⁴ “Maw Jerusalem, Jerusalem, profet hna thattu, na sinah an thlahmi lung in a rakcheptu! Arpi nih afa le a thla tangah a huh tawn bangin, nafa le voi zeizatdah huh ka timh hna, sihmanhsehlaw na duh fawn lo!

³⁵ Zohmanh! Na inn cu hrawh cikcek hnuah rauh tâk a si lai, biataktein kan chimh, Bawipa min i A rami cu mi thluachuak a si, tiah nati cân a phâk hlan lo naka hmu ti lai lo,” tiah a ti.