LUKA 11 - Laibaibal Thiang (BSI)

¹ Hitihin a si, hmun pakhat ah thla a cam i a dih tikah lamkaltu lak i mi pakhat nih, “Bawipa, Johan nih a zultu hna kha thlacam a cawnpiak bantuk khan thlacam ning kan cawnpiak,” tiah a ti.

² Anih nih, “Hitihin thla cam u, van i a ummi kan Pa, na min thianghlim seh, na pennâk cu tlung ko seh, van i naduhnâk an tuah bangin, leiah tuah si ve seh,

³ Ni fa tein rawl kan pe.

⁴ Kan sualnâk kha kan ngaithiam ko. Zeitintiah kan nih zong nih kan leiba kha kan ngaihthiam hna. Tukforhnâk chungah kan luhpi hlah. Misual sinin kan khamh tuah,” tiah a ti.

⁵ An sinah, “Nanlak ah pakhat khat nih hawi ngei u law, zanṭim ah a sinah kal in, ka kawi, changreu pathum in ka coih tuah,

⁶ zeitintiah ka hawipa nih a ka tlawng i pêk awk zeihmanh ka ngei lo, ti seh law,

⁷ inn chungin, hna kan hnawh hlah, atu cu inkâ kan hrenh cang i ka fale hna he kan it dih cang, tho in kan pe kho ti lo,” ti hmanhsehlaw,

⁸ kan chimh hna, a hawi a si ruangah tho in vape hlah hmanhsehlaw a hal lengmang caah, a tho lai i a duh zat cu a va pêk ko lai.

⁹ Kan chimh hna, hal uh, pêk nan si lai, kawl uh, nan hmuh lai, king uh, onpiak nan si lai.

¹⁰ Zeitintiah a halmi pauh nih an co, a kawlmi nih an hmuh i a kingtu pauh cu onpiak an si lai.

¹¹ Nannih patung hna lakah nan fapa nih changreu in hal sehlaw ahodah lung a pe hnga, asiloah, nga in hal sehlaw, ahodah rul a pe hnga?

¹² Asiloah arti in hal sehlaw, ahodah tlâng ngaikuang a pe hnga?

¹³ Nannih misual hmanh nih nanfa le thilṭha pêk nan hngalh ahcun, van i nan Pa nih a haltu sinah Thiang thlarau a pêk lai ning cu,” tiah a ti.

¹⁴ Cun a holh kholo mi khuachia pakhat kha a ṭhawl. Cun khuachia kha a chuah le cângkâ holh kholo cu a holh kho i mizapi nih mak an ti ngai ngai.

¹⁵ Asinain mi cheu khat nih, “Khuacia bawi Belzebud thawngin dah kaw khuachia a ṭhawl ko hna cu,” tiah an ti.

¹⁶ Cheukhat nih Amah hneksaknâk ah van lei in hmelchunhnâk kha an hal.

¹⁷ Anih nih an ruahnâk kha a hngalh i, “Anmah le anmah â dohmi pennâk cu rauh tak a si tawn. Chungkhar â dohmi zong a rawk tawn.

¹⁸ Satan zong amah le amah â doh ahcun zeitindah a pennâk a dir khawh lai? Nannih nih Belzabud ruang i khuachia dawiah nan ka ruah.

¹⁹ Keinih Belzebub ruang i khuachia ka dawi ahcun, nan fa le nih aho ruangah dah an dawi tawn? Cucaah nan kong hi an mah ceih awk a si.

²⁰ Sihmanhsehlaw keinih Pathian kut i khuachia ka dawi a si ahcun Pathian pennâk nan sinah a phân cang tinâk a si.

²¹ “Mi ṭhawng nih, ralthuam tling he a inn a ven chung pauh cu, a thilri cu an him ko lai.

²² Asinain a mahnâk ṭhawngdeuh a rat i a rak tei ahcun â kilvennâk ralthuam vialte cu a chuh lai i hranchaw kha a phawt dih hna lai.

²³ Keimah lei i aṭang lomi cu aka doh i aka pumhpi lomi nih a ṭhek.

²⁴ Thlarau thur cu mi chungin a chuak i dinhnâk kawlin ti um lonâk ah a vak lengmang i dinhnâk hmun a hmu kho lo. Ka chuahnâk ka innah ka kir ṭhân ko lai, tiah a ti.

²⁵ Cun a kir tikah cu inn cu thiang te le rem tein a um.

²⁶ Cuhnuah a va kal ṭhân i amahnâk i a sual deuhmi khuachia pasarih a ratpi, cuka ah an lut i an um peng, cu minung nunning hmadung cu a hmasa nâkin a sual chinchin, tiah a ti.

²⁷ Cubia cu a chim lio ah mizapi chungin nu pakhat a rak au i, “Nangmah pawinâk nauin le nadin mi hnuk cu a van ava ṭha dah,” tiah a ti.

²⁸ Anih nih, “Pathian bia a thei i â nunpimi hna hi, mi vanṭha an si deuh,” tiah a ti.

²⁹ Cun mizapi kha a zual in an i zual i an i pumh lio ah, “Tuchan ṭhangthar hna hi mi ṭhalo ngai an si. Hmelchunhnâk an kawl tawn. Jonah hmelchunhnâk dah tilo cu hmelchunhnâk dang pêk an si lai lo.

³⁰ Zeitintiah Jonah cu Nineveh khuami caah hmelchunhnâk a si bantuk khan Mi fapa zong hi atu chanthar hna caah hmelchunhnâk a si ve lai.

³¹ Chimlei bawinu kha biaceih ni ah atu chanthar hna sinah a tho ve lai i thiam lo a coter hna lai, zeitintiah a nih cu Solomon fimnâk ngai dingin van hram dengin a ra. Solomon nâk i a ngan deuhmi hika ah hin a um dah kaw.

³² Nineveh mi hna zong kha, biaceih ni ah atu chanthar hna sinah an rak thoṭhân lai i thiamlo an coter hna lai, zeitintiah Jonah phungchimmi ruangah an i ngaihchih. Jonah nâk ngan deuh hika ah a um taktak dah kaw.

³³ Ahohmanh nih meiin an van tikah a kirkhawr ah siseh, ûm chungah siseh an chia ballo. Inn chung i a lutmi hna nih a ceu an hmuh khawh nâkhnga a chiahnâk ah an chiah tawn.

³⁴ Pum meiin cu mit hi a si. Cucaah na mit a ṭhat ahcun napum puluk in a ceu dih lai. Na mit a rawk ahcun napum cu a dihlak in a mui lai.

³⁵ Cucaah nanmah i ceu cu mui a si sual nâkhnga lo i ralring u.

³⁶ Na pumpuluk cu ceunâk in a khah ahcun, a ceu ngai ngaimi meiin nih a ceuhmi bantukin na pum cu ceuhdih a si ko lai.

³⁷ A chim lio ah farasih pakhat nih rawl ei a sawm. Cuticun a lut i rawl cu a dûm.

³⁸ Rawl ei lai ah akut a ṭawl lomi kha a hmuh tikah Farasih pa nih mak a ti ngai ngai.

³⁹ Bawipa nih, “Nannih Farasih hna nih hrai le khêng lênglei kha thiang tein nan ṭawl tawn, asinain nan chunglei cu hakkauhnâk le sualnâk in a khat.

⁴⁰ Mihrut hna! lenglei Sertu nih chunglei zong a ser lo maw?

⁴¹ Nan ngeih ciami in mi sifak hna bawm hna ngat u, cuticun nan caah zeizong vialte a thianghlim cang lai.

⁴² Nannih Farasih mi hna, ngaihchia nan va sidah. Zeitintiah puṭinan, khamhhmuai le thlai phunkip kha cheuhra cheukhat nan pêk, diknâk le Pathian dawtnâk kha zeiah nan rel fawn lo. Hi hna hi pei nan tuah deuh awk a si cu, a dang zong daithlanh hlei loin.

⁴³ Farasih hna, ngaichia nan va si dah. Zeitintiah Sinagog ah hmaichuang i ṭhut le, chawdawr hmun i kuttlaih kha nan uar.

⁴⁴ Nannih nawlbiacawnpiaktu le Farasih mi depde hna, ngaihchia nan va si dah. Zeitintiah mi nih a tangah thlan a um ti hngal lo i a kalnâk he nan i lo, tiah a ti.

⁴⁵ Cuhnuah nawlbia hngaltu pakhat nih a sinah, hi na sîk hna nâk bia nih kan nih zong a kan hnawr ve, a si lo maw?” tiah a ti.

⁴⁶ Anih nih, “Nawlbia hngaltu hna nannih zong ngaihchia nan va si dah, a rit ngaimi thil le harnâk cu mi cungah nan chawnh luaimai, cu thilrit cu nan kut dong par hmanh in tongh nan duh lo.

⁴⁷ Nan caah ngaihchia a va si dah! Zeitintiah profet hna thlân kan remh nan ti, an hringsortu hna thahmi an si.

⁴⁸ Cucaah nan pupa hna tuahmi cu nan hngalhpi hna i nan hnatlâkpi tinâk a si, annih nih an thah, nannih nih an thlân nan remh.

⁴⁹ Cucaah Pathian fimnâk zongnih hitihin a chim. ‘An sinah profet le lamkaltu kha ka thlah hna lai, a cheu an rak thah hna lai i a cheu an rak serhsat hna lai,

⁵⁰ cuticun vawleiser hramthawk in profet vialte thisen mawh cu atu chanthar hna sinah phorhter a si lai,

⁵¹ Abel thisen an chuah ri in, ṭempal le biakṭheng karlak i Zakariah an thahmi thisen tiangin, a mawh cu atu chanthar hna sinah phorhter a si lai.

⁵² Nannih nawlbia hngaltu hna, ngaihchia nan va si dah! Zeitintiah fimnâk tawh cu nan thuh. Nanmah le nan lut duh lo, luh a duhmi hna zong nan kham hna,” tiah a ti.

⁵³ Cubia an sin i a chim lio ah, nawlbia cawnpiaktu le farasih hna nih Amah cu fak piin sual an phawt, sawinâk ding ngia in an el leng mang,

⁵⁴ Amah sual an phawt khawh nâkhnga, a chimmi bia lila in foihter an timh i an bawh ko.