LUKA 1 - Laibaibal Thiang (BSI)

¹ Tling tein kan sinah a phânmi kong kha mi tampi nih ṭial an timh.

² A hramthawk in mit i a hmutu hna le bia in rian a ṭuntu hna nih an kan chanhmi kha,

³ hmaizahmi, Theofilus, a hramthawk in ṭha tein ka dothlat hnuah ningcang tein na caah ṭial hi a a ṭha tiah ka ruah.

⁴ Cucu na rak theih cangmi kha a dikmi a si tiah na hngalhfian khawh nâkhnga.

⁵ Judia ram i Herod a bawi lio ah, Abijah phu chung i tlângbawi pakhat Zakaria timi a rak um. A nupi cu Elizabet a si i Âron tefa chin a si.

⁶ An pahnih in Pathian hmaiah miding an si, Bawipa nawlpêk le a phunglam vialte sawi awk um loin an zulh.

⁷ Asinain Elizabet a cin ruangah fa an ngei lo, an pahnih in an tar ngai ngai cang.

⁸ Cuticun an phu chung i an tuah tawn bangin Pathian hmai i tlângbawi rian a ṭuan lio ah,

⁹ Bawipa ṭempal chungah lut in rimhmui khanghthawinâk tuah awkah camcawh fung an zuh tawnmi cu amah cungah a tla.

¹⁰ Cun rimhmui khanghthawi lio ah mizapi kha lengah thla an rak cam.

¹¹ Bawipa vancungmi a sinah, rimhmui khanghnâk biakṭheng orhlei kamah â lang.

¹² Zakaria nih a hmuh tikah a awlawk a chong i ṭihnâk nih a tlaih.

¹³ Asinain vanmi nih, “Zakariah, ṭih hlah, zeitintiah na thlacamnâk kha theih a si, na nupi Elyzabet nih fa an hrinpiak lai i a min ah Johan na sak lai.

¹⁴ Lunglawm tha nuam tein na um lai, a chuah tikah mitampi an i lawm lai.

¹⁵ Zeitintiah Bawipa hmai ah mingan a si lai i mitsur hang le zu a ding hrimhrim lai lo. Anu paw chung hmanh in Thiang Thlarau in a khat lai.

¹⁶ Israel fale tampi kha Bawipa an Pathian lei ah a merter hna lai.

¹⁷ Cuticun, ‘pale hna lungthin an fale hna sin i merter awk le nawlngai lomi kha mifim bang i umter awkah, Bawipa ca i mi hna rak timlam dingah Elijah thlarau le thiltikhawhnâk he Bawipa hmaiah a kal hmasa lai,” tiah a ti.

¹⁸ Zakariah nih vanmi sinah, “Cucu zeitindah ka hngalh lai? kei cu putar ka si, ka nupi zong a tar cang,” tiah a ti.

¹⁹ Vanmi nih, “Keimah cu Gabriel, Pathian hmai i a dir tawnmi ka si, nangmah chawnh le, hi lawmhnâk thawngṭha chim awkah thlahmi ka si.

²⁰ Asinain ngaihmanh, “A cân te ah a tling laimi, ka chimmi bia na zumh lo caah, cu thil a tlin hlan pauh cu, holh kho loin dai tein na um lai,” tiah a ti.

²¹ Cun zapi nih Zakariah kha an rak hngah, ṭempal chung i sau nawn a um caah an khuaruah a har.

²² Asinain a rak chuah tikah, an sinah bia a chim kho lo, holh kho loin akut lawng a cawlcangh termi an hmuh tikah ṭempal chungah langhnâk a hmu tiah an hngalh cawlh.

²³ Cun hitihin a si, a rianṭuannâk ni tlam a tlin hnu ah a innah a tlung.

²⁴ Ni zeimawzat hnu ah a nupi Elizabet cu nau a pawi i thla nga chung â thup.

²⁵ Hibangin zapi sin i ka min chiatnâk lakpiak awkah Bawipa nih vêl a ka ngeih i aka zohkhenh,” tiah a ti.

²⁶ Cun thla ruk hnu ah Pathian nih vanmi Gabriel kha Galili ram i khua pakhat Nazaret an timi i

²⁷ ngaknu thiang pakhat sinah a thlah, cu ngaknu cu David tefa chin Josef nupi hammi a si. Ngaknu thiang min cu Mary a si.

²⁸ A rak luh tikah vanmi nih, “I lawm tuah, thluachuak nu, Bawipa na sinah a um; nu hna lakah mithluachuak na si,” tiah a ti.

²⁹ Asinain amah a hmuh tikah, a chimmi bia ruangah a awlawk a chong, zeibantuk biakchonhnâk dah a si hnga? tiah a ruat.

³⁰ Vanmi nih, “Mary, ṭihhlah, Pathian lung na ton.

³¹ Ngaihmanh, nau na pawi lai i fapa na hrin lai, a min ah JESUH na sak lai.

³² Mi ngan a si lai i Cungnung bik Fapa an ti lai; Bawipa Pathian nih apa David ṭhutdanh kha a pêk lai.

³³ Jakob tefa kha zungzal in a pen hna lai; A pennâk cu a dong ti lai lo,” tiah a ti.

³⁴ Mary nih vami sinah, “Cucu zeitindah a si khawh lai, pa ka hngalh ṭung lo?” tiah a ti.

³⁵ Vanmi nih a sinah, “Thiang thlarau na sinah a phân lai i Cungnung bik thiltikhawhnâk nih an khuh lai; cucaah a Thiangmi fa a chuak hngami cu Pathian Fapa, ti a si lai.

³⁶ Ngaihmanh, na rulchan, Elizabet zong atar hnu ah nau pa a pawi, a cing an timi kha, atu hi thlaruknâk a si cang.

³⁷ Zeitintiah Pathian caah a si kho lomi zeihmanh a um lo,” tiah a ti.

³⁸ Mary nih, “Ngaihmanh Bawipa salnu ka si, na bia bangin si ko seh,” tiah a ti. Cun vanmi nih a kaltâk.

³⁹ Cu cân ah Mary cu a tho i khulrang in tlang cung i Judia ram khua pakhat ah a kal;

⁴⁰ Zakariah innah lutin Elizabet kha a kut a tlaih.

⁴¹ Cun Mary nih Elizabet kut a tlaihnâk kha Elizabet nih a theih le cângkâ a paw chung i naute kha â hlawk i Elizabet cu Thiang thlarau in a khat.

⁴² Cuticun thang ngaiin a au, “Nang cu nu hna lakah mithluachauk na si, na hrinmi zong mithluachuak a si.

⁴³ Ka Bawipa nu tu nih narak ka tlawnmi hi zeiruangahdah a si hnga.

⁴⁴ Zeitintiah na kut tlaihnâk aw thawng ka hna a phâk le cângkâ ka pawchung naute zong lunglawm in a hlawk ve dah kaw.

⁴⁵ Bawipa nih a chimmi a tling lai tiah a zumtu nu cu mithluachuak a si.

⁴⁶ Mary nih, “Ka nun nih Bawipa a thangṭhat i

⁴⁷ Ka thlarua zong ka khamhtu Pathian ah â lawm.

⁴⁸ Zeitintiah a salnu dir hmun niam ning a hmuh piak. Ngaihmanh, atu thawkin chanthar vialte nih thluachuaknu anka ti lai.

⁴⁹ Zeitintiah Miṭhawng nih khan thil lianngan aka tuahpiak, a min ah ‘thiang’ a si.

⁵⁰ Amah a ṭihtu kha chankhat hnu chankhat a zângfah hna.

⁵¹ A bânnih a ṭhawnnâk a langhter, ruamkaimi kha an lung khuaruahnâk ah a ṭhek hna.

⁵² Mi ṭhawng kha an bawiṭhutdan in a ṭhumh hna i a niammi kha a cawisan hna.

⁵³ Rawlṭâmmi kha thilṭha in a khimter hna i mirum kha kut lawngin a kirter hna.

⁵⁴ A zângfahnâk philhlonâk ah a sinum Israel kha a rak bomh.

⁵⁵ Hringtu kanpa Abraham le a tefa hna sinah zungzal in a rak chim cang bang khan,” tiah a ti.

⁵⁶ Cun Mary cu thlathum tiang a sinah a um i cu hnu ah inah a kir ṭhân.

⁵⁷ Elizabet nau ngeih cân kha a phân i fapa a hrin.

⁵⁸ Innpa hna le sahlawh hna nih an lawmhpi, zeicatiah Bawipa nih a nganmi a zângfahnâk a cungah a langhter caah.

⁵⁹ Cun niriat ni ah, cuarpar tan awk i an ratpi lio ah, apa min Zakariah in kawh an timh.

⁶⁰ Anu nih, si hlah ê, Johan tiah kawh deuh awk a si, tiah a ti.

⁶¹ Annih nih, “Na rualchan hna lakah cubantuk min a ngeimi ahohmanh an um lo,” tiah an ti.

⁶² Apa kha kut in an hei langhter i zeibantuk min dah sak a duh kha an hal.

⁶³ Anih nih ṭialnâk dingah catlap a hal hna, “Amin ah Johan a si,” tiah a ṭial. An dihlak in an khuaruah a har ngai ngai.

⁶⁴ Hmakkhatteah a lei le a kâ cu â phoih i Pathian thangṭhat in a rak holh cawlh.

⁶⁵ Cuticun pawngkam mi vialte cungah ṭihnâk a tlung. Cu kong cu Judia ram mi vialte nih an ceih.

⁶⁶ Cu kong a theitu hna nih an lungthin ah an riahter i zeibantuk minung dah hi hngakchia hi a si te lai? tiah an ti. Cun Bawipa kut nih a umpi.

⁶⁷ Cubangin apa Zakariah cu Thiang Thlarau in a khat i hitihin bia a phuan,

⁶⁸ Bawipa Israel Pathian cu thangṭhat in um ko seh, zeitintiah a mile a veh i a tlanh hna.

⁶⁹ A sal David chungkhar chungin khamhnâk ki a chuahter.

⁷⁰ Vawlei thawhka tein a thiangmi a profet hna kâ in a rak chim cang.

⁷¹ Kan ral hna le a kan huatu vialte hna chungin kan himnâk dingah.

⁷² Kan pupa hna sin i a kamhmi zângfahnâk langhter ding le, a thiangmi a biakam philhlonâk ah.

⁷³ Kan pa Abraham sin i chiat a rak i serh cangmi cu,

⁷⁴ `ihlo tein a rian kan ṭuan khawh nâkhnga, kan ral hna chungin khamhnâk ding bia a si.

⁷⁵ Kan nun chung vialte a hmaiah thiang te le ding te i um dingin.

⁷⁶ Asi, pate, nang hi Cungnung bik profet an in ti lai. Zeitintiah a lam rak timtuah dingah a hmaiah na rak kal lai.

⁷⁷ An sualnâk ngaithiam ding le, Ami le caah khamhnâk bia theihter dingin.

⁷⁸ Duh a nungmi kan Pathian zângfahnâk ruangah,

⁷⁹ Muihnâk le thihnâk thladem tang i a ṭhumi hna ceuh awkah daihnâk lam i kan ke a kal khawh nâkhnga, cunglei ni ceu dawh nih a kan zuan hnawh.

⁸⁰ Cuticun ngakchia cu a ṭhang i thlarau in a ṭhawng chin lengmang, Israel mihna sin i a langh hlan tiang ramcar ah a um.