LAMKALTU 28 - Laibaibal Thiang (BSI)

¹ Cubangin tikam kan phanh hnu ah cu tikulh cu Malta a si ti kha kan hngalh.

² Cuka i a ummi hna nih an kan zângfah tuk hringhran i ruah a sur i khua a sih ruangah mei an tih i kan dihlak in an kan cohlan.

³ Paul nih thing tomkhat a va hlam i mei ah a tih. A linh tikah rul a rak cuak i a kut ah a cuk i â thlai ko.

⁴ Cuka mi hna nih a kut i rul â thlaimi cu an hmuh tikah, “Hi pa hi lainawng a si hrim hrim lai, rili in chuak kho hmanhsehlaw, diknâk i biaceihtu nih a nun peng a sian lo caah a si,” tiah an ti.

⁵ Asinain anih nih rul cu mei ah tla ko a thin i fahnâk zeihmanh a pe lo.

⁶ Annih nih cun a rak phing lai i â teng lai i a thi cawlh ko lai tiah an zumh. Saunawn an zoh hnu zongah a zeihmanh a poi lo tikah an ruahnâk â thleng i pathian ah an ruah ṭhân.

⁷ Cuka hmun i tikulh bawibik Publius timi a um. Anih nih a kan cohlan i nithum chung a in ah a kan tlunter.

⁸ Publius pa cu raifanh le senten in a rak zaw i a it ko. Paul cu a sinah a lut i a cungah kut chuangin thla a camh i a dam.

⁹ Cubangin tuah a si hnu ah tikulh i mizaw vialte an ra i a damter hna.

¹⁰ Cuticun annih nih a phunphun in an kan conglomh i kan kal lai ah kan herhmi vialte an kan pêk.

¹¹ Thlathum hnuah Aleksandria tilawng Faphir unau hmelchunhnâk a ummi, khuasik cân i cu tikulh i a um vemi in kan chuak.

¹² Cuticun Surakas khua kan pal i cuka ah nithum kan câm.

¹³ Cuka in kan i hêl i Regiam khua kan phân. Nikhat hnuah chaklei thli a hrang i a kiptuh ah Puteoli khua kan phân,

¹⁴ cuka ah unau kan hmuh i an sinah ni sarih câm dingin an kan sawm. Cuticun Rom khualei cu kan panh.

¹⁵ Cun cuka in kan unau hna nih kan kong an theih tikah Appia Dawr le khualbuk pathum hmun tiangin don awkah an ra. Paul nih cu hna a hmuh tikah Pathian sinah lawmhnâk bia a chim i ralṭhatnâk a ngei.

¹⁶ Cun Rom khua kan luh tikah ralbawi pa nih thongtla hna cu kilvengtu bawi sinah a pêk hna i Paul tu cu ralkap vennâk tangah amah lawng um khawhnâk nawl an pêk.

¹⁷ Nithum hnuah Paul nih Judah mi hruaitu a auh hna, an rat tikah an sinah, “Unau hna, mi vialte le pupa hna phung cungah zeihmanh sualnâk ka tuah lo nain Jerusalem khua in Rom cozah kutah an ka chanh,

¹⁸ annih nih fiangte i anka hal hnuah thihnâk tlak thil zeihmanh ka cungah a um lo ruangah, chuah anka timh.

¹⁹ Judah mi hna nih cucu an duh lo caah Sizar sinah ah phanhpi lo awk a ṭha lo, asinain ka miphun hawi sual kawlnâk ah ka tuahmi a si lo.

²⁰ Cu thil ah nanmah hmu ding le bia ruah dingah kan auh hna. Israel mi ruahchannâk kâ hrawm ruangah hi cikcin i hrên ka si,” tiah a ti.

²¹ Annih nih, “Na kong hi Judah ram in cakuat zongin kan thei lo, hika i a ummi unau zong nih a chiatnâk lei in na kong an chim zong kan thei lo.

²² Asinain hi bu hna hi ramkip ah thangchiat an si. Na ruahnâk nangmah hmurkâ hrim hrim i theih cu kan duh ngaingai,” tiah an ti.

²³ Cuticun ni an khiah i cu ni ah a tlunnâk ah mi tampi an ra i an sinah Pathian pennâk kong le, Moses nawlbia cauk le Profet hna cauk nih Jesuh kong an rak chimnâk kha an ruahnâk tei dingin zing in zanlei tiang a fianter.

²⁴ Cun mi cheukhat nih a chimmi cu an zumh i a cheu nih an zum lo.

²⁵ Cuticun annih cu an i rem kho lo i Paul nih bia fangkhat a chim dih in an chuak. Cu bia cu hihi a si. “Thiang Thlarau nih Profet Isaiah hmurkâ hmangin, kan pu le hna sin i a rak chimmi kha a dikmi a si.

²⁶ Hi mi hna hi va chim hna; Hnâ in an theih ko lai nain an theithiam lai lo. Hmuh cu an hmuh ko lai nain a sullam an hngal lai lo.

²⁷ Zeitintiah hi miphun hna lungthin hi a pit dih, an hna a chet i an mit a caw. Culoahcun, an mit in an hmuh lai, an hna in an theih lai i an lungthin nih an hngalh lai, an i mer lai i ka rak damter sual hna lai,” tiah a timi kha.

²⁸ “Cucaah Pathian khamhnâk bia hi Gentel mi hna sinah kuat a si cang tihi hngal ko u, annih nih an ngaih lai,” tiah a ti.

²⁹ Cu bia a chim dih in, Judah mi hna cu anmah le anmah fakpi i i alpah in an ṭin.

³⁰ Cuticun Paul cu kumhnih chung, a hlânmi inah a um i a sin i a lutmi pauh a rak cohlan hna.

³¹ Pathian Pennâk kong chim in, Bawi Jesuh Krih kong kha ralṭha in a cawnpiak hna i ahohmanh nih an kham lo.