LAMKALTU 26 - Laibaibal Thiang (BSI)

¹ Agrippa nih Paul sinah, “Na kong chimnâk nawl pêk na si,” tiah a ti. Paul nih a kut thlir in a kong cu chim hram a thawk.

² “Siangpahrang Agrippa, nihin ah Judah mi nih sual anka puhnâk vialte ah ka kong na hmai ah ka chim khawh caah kâ lawm.

³ Judah phung le kan bia kongah fiangfai tein thil umtuning hngaltu na sinâk zongah a hleiin kâ lawm. Cucaah lung saunâk he rak ka ngaihpiak dingin kan nawl.

⁴ Ka no lio in Jerusalem khua i ka tlawnlen lioah zeibantuk minung dah ka si ti kha Judah mi vialte nih an hngalh.

⁵ Kan biaknâk ah a hleihluat in â zuammi phu ka si zia zong an duh ahcun a hramthawk in an hngalh khawh.

⁶ Pathian nih kan pupa hna sin i bia a rak kamhmi kong i ruahchannâk ka ngeih ruangah biaceihnâk hmun ah ka um.

⁷ Cu biakam cu kan mi hleihnih nih biatak chuah in Pathian rian chun zan hlanin an ṭuannâk thong in hmuh an i ruahchan. Cu thil ruahchannâk ruangah, siangpahrang, Agrippa, Judah mi nih sual an ka puh hi a si.

⁸ Pathian nih mithi a thawhter timi hi zei ruangah dah zumhkhawh lomi ah nan ruah?

⁹ “A ngaingai tiah, keimah hrimhrim nih Nazaret Jesuh min ralchanhin fak piin kâ rak zuam ve.

¹⁰ Jerusalem zongah cubantuk in ka rak tuah cang, tlângbawi hna sin in nawlpêk ka lak i mi thiang tampi kha thongah ka thlak hna i an thah lioah ka hnatlakpi hna.

¹¹ Sinagog kip ah ka serhsat hna i hranhrâm loin (Pathian)cawhdehnâk bia ka chimter tawn hna. An cungah ka hrâng tuk hringhran i ramlêng khuapi zongah ka hrem hna.

¹² Cubantuk thil tuah dingin tlângbawi hna sinin hnatlakpinâk ca ka lâk i Damaska khua ah ka kal.

¹³ Chun lai ah, maw, siangpahrang, lamthluan ah van in ceu, ni nâk in a ceu deuhmi cu keimah le ka kalpimi hna vêlchûm ah a rung ceu.

¹⁴ Kan dihlak in lei i kan tluk lioah Hebru holh in, ‘Saul, Saul, zeicadah naka serhsat? Fungzum chuih hi na caah dahkaw a fah, tiah aw ka theih.

¹⁵ ‘Bawipa, ahodah na si? tiah ka ti i Bawipa nih, ‘ na serhsatmi Jesuh ka si.

¹⁶ Tho law, na ke in dir, zeitintiah hi na hmuh cangmi le kan hmuhsak hngami ca i rianṭuantu ah le hngalhpitu ah, nasin ka langhnâk cu a si.

¹⁷ Judah mi hna le Gentel hna kut chungin kan khamh lai, an sinah kan thlah,

¹⁸ muinâk chungin ceunâk lei ah an i mer i Satan nawlngeihnâk mertâk in Pathian lei an hoihkhawh nâkhnga, keimah anka zumhnâk thawngin zumhnâk i thianter cangmi hna lakah ro an co khawh ve nâkhnga,” tiah a ti.

¹⁹ “Cucaah, Siangpahrang Agrippa, van lei langhnâk cu ka el kho lo,

²⁰ cuticun Damaska khua mi hna sinah le Jerusalem khua mi hna sinah ka phuan hmasa bik, cun Judia ram dihlak i mi vialte sinah le, Gentel mi hna sin zongah, an i ngaihchih i Pathian leiah an i mer i ngaihchihnâk he â tlakmi thil hna an tuah nâkhnga ka phuan tawn.

²¹ Curuangah dahkaw, Judah mi nih ṭempal ah anka tlaih i thah anka timhnâk a si cu.

²² Asinain Pathian sinin bomhnâk ka hmuh ruangah mi ngan le mi hme hna sinah bia hngalhter in nihin ni tiang ka dir kho i Moses le profet hna nih a ra laimi thil an chimmi hlei in zeihmanh ka chim lo.

²³ Cucu Krih nih harnâk a intuarnâk ding le, a thimi hna thawhṭhannâk lam hruaitu a si lainâk le, Judah mi le Gentel mi hna sinah cu ceunâk kong phuanchuahnâk ding bia kha a si,” tiah a ti.

²⁴ Cubangin a kong a chim dih tikah, Festas nih aw thang ngai in, “Paul, na hrut cang! Na cawn tamtuk nâk nih an hruhter cang!” tiah a ti.

²⁵ Paul nih, “Festas ṭhabik, ka hrut lo dah kaw, biatak le fimnâk bia dah kaw ka chim.

²⁶ Zeitintiah hi bia zalong ngai in ka chimmi hna hi, siangpahrang zong nih a theih cang, pakhat te hmanh a philh rih lai lo, ti ka hngalh. A chan cu hi thil hi dai kilkar i a tlungmi thil an si lo.

²⁷ Siangpahrang, Agrippa, Profet hna bia na zum maw? Na zumh tiah ka hngalh,” tiah a ti.

²⁸ Agrippa nih, “Cân toite chungah Kristian ah canter khawh naka zum maw?” tiah a ti.

²⁹ Paul nih, “Cân toi, cân sau lei a si lo, nangmah lawng hmanh si loin, nihin ah ka bia a ngaitu vialte hna zong hi keimah bantuk si dingin Pathian sinah ka nawl, cikcin bel hi tel loin,” tiah a ti.

³⁰ Cu bia a chim dih in, siangpahrang cu mangki pa le Bernis he an pawng i a ṭhumi hna he an tho i

³¹ a dang tein anmah lawng bia an i ruahnâk ah, “Hi pa nih hin thihnâk le cikcin khihnâk tlak zeihmanh a rak tuah lo,” tiah an ti.

³² Agrippa nih Festas sinah, “Hi pa nih Sizar sin phâk rak hal hlah sehlaw chuah diam awk pei a rak si ko hi,” tiah a ti.