LAMKALTU 19 - Laibaibal Thiang (BSI)

¹ Korin khua i Apollo a câm chungah Paul nih a sannâk ram hna ṭol in, Efesa a rak phân. Zultu cheukhat a hmuh hna i

² an sinah, “Nan zumhka ah khan Thiang Thlarau nan co maw?” tiah a ti. Annih nih, “Co hlah ê, Thiang Thlarau a um ti hmanh kan hngalh ṭung lo,” tiah an ti.

³ Anih nih, “Asi ah, zeibantuk baptisma dah nan in?” tiah a ti. Annih nih, “Johan Baptisma,” tiah an ti.

⁴ Paul nih, “Johan nih ngaihchihnâk Baptisma a inter hna i an sinah, a hnu i a ra laimi nan zumh nâkhnga tiah a ti hna; cucu Jesuh Krih hi a si,” tiah a ti.

⁵ Cu bia an theih tikah Bawipa Jesuh min in Baptisma an in.

⁶ Paul nih an cungah a kut a chuan tikah Thiang Thlarau kha an cungah a tlung i holh dangdang in an holh i bia zong an phuan.

⁷ An dihlak in patling hleihnih hrawng an si.

⁸ Paul cu sinagog ah â pum i thlathum chung ralṭha in bia a chim tawn. Pathian Pennâk kong kha a chimh hna i mi lungthin kha a tei tawn.

⁹ Asinain cheukhat lunghakmi le a zum duh lomi an um i mizapi sinah lam cu an thangchiat hnuah anih nih a kaltâk hna, zultu kha a dang tein â kalpi hna i Tiranas siangin ah nichiarte a cawnpi hna.

¹⁰ Cubantukin kumhnih chung a peh i Asia rammi vialte le Judah le Grik mi hna zong nih Bawipa Jesuh bia an hngalh dih.

¹¹ Pathian nih Paul cu khuaruahnarnâk thil lianngan kha a tuahter i

¹² a tak hnawhnâk puan le hngawngerh puan hna hmanh kha mizaw sinah an rak put i an zawtnâk nih a chuahtâk hna i thlarau ṭhalo zong an chungin a chuak.

¹³ Cuticun Khuachia ṭhawl ah a vak lengmangmi Judah mi zeimaw nih Paul chimmi Jesuh min in chuak u tiah Bawipa Jesuh min kha a rak hman ve.

¹⁴ Judah tlângbawi ngan Skeva zong nih cubantuk tuah a hmangmi fapa pasarih a ngei.

¹⁵ Cun thlarau ṭhalo nih, “Jesuh kan hngalh, Paul zong kan hngalh, nannih hi ahodah nan si? tiah an leh hna.

¹⁶ Cuticun khuachia tuahmi nih a nam hna i a tei dih hna, cu inn cun taklawng le hliamhma he an chuak.

¹⁷ Cu thil cu Efesa khua i a ummi Judah mi le Grik mi zong nih an theih dih. Mi vialte nih an ṭih i, Bawipa Jesuh min cu a lianngan chin chin.

¹⁸ Cun a zummi hna nih an sualnâk i phuangin thil diklo an tuahmi chim awkah an ra.

¹⁹ Doih a hmangmi hna zong nih doih le aihnâk i an hmanmi cauk hna he an ra i mi vialte hmuh ah an khangh dih. Cu vialte a man cu an tuak i phaisa 50000 man hrawng a si.

²⁰ Cuticun Bawipa bia kha a ṭhang i teinâk a co.

²¹ Cu thil hnuah Paul nih Thlarau fialnâk in Masidonia le Akai ram cu ṭol in cu hnu ah Jerusalem i kal a timh. Cu hnuah Rom zongah ka kal lai, tiah a ti.

²² Amah bawmtu pahnih Timote le Erastas kha Masidonia ramah a kalter i anih tu cu Asia ramah a câm ko rih.

²³ Cun cu lioah cu lam ruangah buainâk nganpi a chuak.

²⁴ Zeitintiah mi pakhat Demetius ngun sertu, Diana ṭempal lem ngun in hlawhfa tampi he a tuah i a hlawk ngaingai tawn.

²⁵ Cu pa nih a hlawhfa lawng si loin an ṭuanmi rian ṭuntu midang zong a auh hna i an sinah, “Pu le hna hi rian hi kan rumnâk a si nan hngalh.

²⁶ Hi Efesa khua lawng hmanh ah si loin, Asia ram vialte ah hi Paul nih hin kut in sermi hi Pathian a si lo tiah mi tampi a tei cang hna i hnulei an chit thluahmah ti kha nan hngalh.

²⁷ Hi kan pawcawmnâk hi a rawk lai ti lawng hmanh si loin Asia ram vialte le vawlei cung khua zakip nih an biakmi khuazing nu lianngan Diana ṭempal dawhnâk hi an zomhtaih lai i a min a chia sual lai,” tiah a ti.

²⁸ Cu bia a hun theih cun an thin a hung i, “Efesa khua i Diana hi a liannganbik,” tiah an au.

²⁹ Cuticun khua dihlak cu buainâk in a khat i Gaius le Aristarkas, Masidonia rammi Paul zultu kha an tlaih hna i zohnuam chuahnâk hmun ah an kalpi hna.

³⁰ Paul zong mizapi sinah kal â tim ve nain zultu hna nih an thlauh.

³¹ Asia ram i hotu cheukhat cu Paul hawikawm an si, zohnuam chuahnâk in i lut lo dingin nawlpiaktu ding mi an thlah.

³² Â tongmi mibu hna cu an buaituk hringhran, a cheu biadang in an au, a cheu bia phundang in an au ṭhân. Mi tampi nih zeiruangahdah an i ton ti hmanh an hngal lo.

³³ Alexandria kha mizapi sinin an chuah i Judah mi hna nih mizapi hmailei ah an namchih. Alexandria nih mizapi cu a kut in a zauh hna i mizapi hmaiah a sual lonâk kong chim a timh.

³⁴ Asinain Judah mi a si kha an hngalh le cângkâ mi vialte nih suimilam pahnih chung hrawng, “Efesa khua i Diana hi a lianngan bik,” tiah an au.

³⁵ Cuticun Khualipi Cazi pa nih mizapi cu a daihter hnuah, hitihin a chim, “Efesa khuami hna Diana lianngan biakinn le Zeus sinin a tlami a lem kha Efesa khuami hna hi a kilvengtu nan si kha a hngal lomi an um lo.

³⁶ Cucaah hi bia hi elkhawh a si lo ah dai tein nan um awk a si i sullam ngei loin cawlcangh men ding nan si lo.

³⁷ Zeitintiah hi nan rak hruaimi hna hi biakinn roktu zong an si lo, nan pathian nu an thangchiat fawn lo.

³⁸ Cucaah Demetias le a hawi le zong nih aho sin zongah bia an ngeih ah cun biaceihnâk in hna cu on cia a si, bawi aiawhtu zong an um i an duh ahcun i chalh hna ngat seh.

³⁹ Thildang hlathlai awk nan ngeihmi a um ahcun phung ning tein ruah a si ko lai.

⁴⁰ Nihin i buaibainâk ruangah a mawh nan kan phurter sual lai ti zong phân a um ngai, buainâk a chuahchan chimfiangtu le nan um fawn lo,” tiah a ti hna.

⁴¹ Cubantuk bia a chim dih cun â tongmi mibu cu an ṭinter hna.