LAMKALTU 17 - Laibaibal Thiang (BSI)

¹ Cubangin Amfipolis khua le Apollonia khua lanhtâk in Thesalonika khua an phân. Cuka ah Judah mi hna sinagog a um.

² Paul cu a tuah tawn bangin sinagog ah a lut i sabbath voithum tiang Cathiang chungin

³ Krih cu harnâk temtuar ding a si zia le thihnâk in a thoṭhân ding a si zia a phunphun in a langhter i a fianter tawn. Hi Jesuh kan chimmi hi Krih cu a si, tiah a ti.

⁴ Mi cheukhat nih an zumh i Grik mi hna lakah Pathian duhmi cheukhat le nu hruaitu mi zeimawzat nih Paul le Sailas kha an zulh.

⁵ Asinain a zum duh lomi Judah mi nih an hnahchuah hna i chawdawr hmun i â chawk sawhsawhmi misual kha an i sawm hna i khuachung kha an buaiter dih. Zatlâng ah chuahpi dingah Josan in kha an va nam.

⁶ Asinain annih kha an hmuh hna lo tikah Josan le unau dang hna tu kha khua uktu hna sinah an kalpi hna. An au i vawlei buaitertu hna kha hika zongah an ra,

⁷ Josan nih â tlunter hna; hi hna nih Jesuh siangpahrang dang a um tiin Sizar nawlpêk an ralchanh,” tiah an ti.

⁸ Cu bia an theih tikah mibu hna le khua uktu hna cu an buai ngaingai.

⁹ Josan le midang sinin an aiawh i chiah ding thil an lâk hnu ah an chuah hna.

¹⁰ Unau hna nih cu zan lila ah Paul le Sailas kha Beria khua ah an kalter hna. Cuka an phâk tikah Judah mi sinagog ah an lut.

¹¹ Cu khuami hna cu Thesalonika khuami hna nâk in an ṭha deuh, bia kha timhcia tein an rak cohlan, hi thil hna hi a si taktak maw si taktak lo ti hngalhnâk caah nichiar tein Cathiang in an dothlat.

¹² Cucaah mi tampi nih an zumh. Grik hmaizahmi nu hna le pa tampi zong nih an zumh.

¹³ Asinain Thesalonika khua i Judah mi hna nih Paul nih Beria khua ah Pathian bia a chim ti kha an theih tikah an ra i mizapi kha an tukforh hna.

¹⁴ Cuticun unau hna nih rili tiang kal dingin Paul cu an thlah, Sailas le Timote tu cu cuka ah an câm.

¹⁵ Cuticun Paul hruaitu hna nih Âthên khua an kalpi. Paul nih Sailas le Timote cu a sinah khulrang i ra dingin bia a cah i an kir.

¹⁶ Cubangin Paul nih Âthên khua in a hngah hna lioah, khua cu milem lawng tein a khah kha a hmuh tikah a thlarau in a si a vâng.

¹⁷ Cucaah Sinagog ah Judah le Gentel chungin Pathian a duhmi kha a ruahpi hna. Market hmun zongah nichiar tein a caihpi hna.

¹⁸ Epikorian le Stoik mifim cheukhat zong nih amah cu an rak el tawn. Cheukhat nih, “Hi biaduh pa nih hin zeidah chim a timh?” tiah an ti. Jesuh kong le thawhṭhannâk kong a chim caah cheukhat nih, “Ramdang pathian kong chimtu a si ko rua,” tiah an ti.

¹⁹ Cun an hruai i Areopagas ah an kalpi, “Hi cawnpiaknâk thar na chimmi hi nakan fianter kho hnga maw?

²⁰ Kan hna chungah a mak ngaimi biathar na phâkter fawn. Cucaah hi thil hi zei set dah a si kha hngalh kan duh,” tiah an ti.

²¹ Zeitintiah Âthên mi hna cu an khual ngeihmi hna tiangin zei dang ruat loin biathar chim ding le mi chimmi ngaih ding lawng an ruat tawn.

²² Cuticun Paul cu Areopaga laifang ah a dir i, “Nannih Âthên mi hna, a lamkip in biaknâk minung nan si hi ka hngalh.

²³ Kâ chawhleh pah in nan biakmi hna ka zoh i bia`heng pakhat cungah, “HNGALH LOMI PATHIAN CAAH” tiah ṭialmi ka hmuh. Cuticun hngalh lo buin nan biak tawnmi kha, cu kong cu kan chimh hna.

²⁴ Pathian, vawlei le a chung i a ummi vialte a sertu cu lei le van Bawi a si caah, kut i sakmi ṭempal ah a um lo.

²⁵ Chambaumi bangin minung hna kut in rian ṭuanpiak herh zongin a um lo, Amah tu kha zeizong vialte sinah nunnâk le thaw le thil vialte petu a si.

²⁶ Cun leicung vialte i khuasa dingin thisen pakhat chungin miphun vialte a ser i an caah khuacân a khiahpiak hna i an umnâk ramri zong a khampiak hna.

²⁷ Bawipa kha an kawl i an hmuh khawh nâkhnga le an dahhriah lengmang i hmuh zong an hmuh phum nâkhnga, Amah cu aho sin hmanh in â hlat lo nain.

²⁸ Zeitintiah Amah ah, kan nung, kan cawl, kan câng i khua kan sa, nan hlaphuah thiam hna zong nih, “Kannih zong a tefa kan si ve,” an rak ti bang khan.

²⁹ Cuticun Pathian tefa kan si caah Pathian sining cu sui le ngun, lung le minung zungthiamnâk i serchawmmi bantuk ah kan ruah awk a si lo.

³⁰ A ngaingai tiah, Pathian nih kan hngalh lo cân hna cu â cinken lo, asinain atu ah ramkip i mi vialte ngaihchih dingin nawl a pêk hna.

³¹ Dinnâk in vawlei hi bia a ceih lainâk ni kha a khiah cang i biaceihtu ding zong a ruah cang. Cucu mi vialte nih an hngalhfian khawh nâkhnga thihnâk in a thawhter,” tiah a ti.

³² Mithi thawhṭhânnâk kong an theih tikah, cheukhat nih an nihsawh, cheukhat nih, “Hi bia hi na sinin kan ngaih ṭhân te lai,” tiah an ti.

³³ Cuticun Paul nih a chuahtâk hna.

³⁴ Asinain cheukhat hna cu amah lei ah an ṭang i an zumh. Cu hna lakah, Areopagas chungmi Dionisias le nu pakhat Damaris le midang hna he.