LAMKALTU 15 - Laibaibal Thiang (BSI)

¹ Cun Judia ram in mizeimaw an ra i, “Moses nawlbia ningin cuarpar nan tan lo ahcun khamh nan si kho lai lo, tiah unau kha an cawnpiak.

² Cucaah Paul le Barnabas he fakpi in an i el i an i doh tikah Paul le Barnabas kha mi cheukhat hna he cu kongah Jerusalem i lamkaltu le upa hna sin i va phanhpi awkah an thim hna.

³ Cuticun kawhhran nih an thlah hna i an kal. Gentel mi hna nih Thawngṭha an cohlanning kha chim pahin Foinisia le Samaria ram an ṭol dih i unau hna kha an lawmhter ngai ngai.

⁴ Jerusalem khua an phâk tikah kawhhran hna le lamkaltu le upa hna nih an rak cohlan hna, cun Pathian nih anmah hmangin a tuahmi thil vialte kha an chimh hna.

⁵ Asinain farasih hna chungin zumtu cheukhat nih an i thawh i, “Gentel hna cu an cuarpar tan ding an si i Moses nawlbia zong zulh awkah bia kamter ding an si,” tiah an ti.

⁶ Cu kong ruahṭi awkah lamkaltu le upa kha an i tong.

⁷ Fakpi in an i al hnuah, Peter a dir i, “Unau hna, Gentel mi nih keimah hmurkâ in Thawngṭha bia an rak theih i an zumh khawh nâkhnga tuan deuh ah Pathian nih a ka thimning zong nan hngalh ko.

⁸ Lungthin hngaltu Pathian nih anmah a cohlan ko hna tiah hngalhternâk ah, kanmah a kan pêk bantuk khan an sinah Thiang Thlarau kha a pêk hna.

⁹ Kannih le annih thleidang loin zumhnâk in an lungthin a thianter hna.

¹⁰ Cucaah pupa hna le kanmah zong nih kan phorh khawh ti lomi hngawngkual kha zultu hna hngawngah banh ṭhân i tim in zeicadah Pathian nan hneksak.

¹¹ Anmah nih an zumh bantukin kannih zong nih Bawipa Jesuh Krih zângfahnâk lawnglawng in khamh dingah kan ruahmi a si,” tiah a ti.

¹² Cuticun mibupi cu dai tein an um, Barnabas le Paul nih anmah hmangin Pathian nih Gentel mi hna lakah hmelchunhnâk le khuaruaharnâk a tuahmi kong an chim tiangin an ngaih hna.

¹³ Dai tein an um hnu ah, Jeim nih, “Unau hna, ka bia hi ngai tuah u,

¹⁴ Simon nih Pathian nih Gentel mi a veh hramthawknâk le Amah min putu dingah an lak i mi a lâknâk kong a chim.

¹⁵ Cu bia le profet hna bia hi â rem ngai, hitihin ṭial a si.

¹⁶ ‘Cuhnuah ka kir ṭhân lai i David thlâm a rawkmi kha ka derh ṭhân lai, â rawhnâk zawn kha ka remh hna lai.

¹⁷ Midang ka min a autu Gentel vialte zong nih BAWIPA an kawl nâkhnga, hi thil vialte tuahtu BAWIPA nih a ti,

¹⁸ Zungzal in a tuahmi thil vialte hngalhtertu Pathian nih a ti, tiah ṭialmi bangin.

¹⁹ Cucaah hitihin ka ruah, Gentel mi Pathian lei i â mermi hna khi harnâk pe hna hlah u sih.

²⁰ Milem biaknâk sa ei le, nupa sualnâk tuah le hngawngdih sa ei le sathi ei kha i sûm hna seh, tiah an sinah ca ṭial u sih, tiah ka ruah bik ko,” tiah a ti.

²¹ Zeitintiah Moses nawlbia zong hlan lio piin khuakip ah phuangtu a ngei i sinagog kip ah Sabbath ni fate rel a si tawn kha,” tiah a ti.

²² Cuticun lamkaltu le upa hna le kawhhran dihlak nih anbu chungin mi thim i Paul le Barnabas sinah Antiok khua ah kalter kha ṭha an ti, an thimmi hna cu, Judas, Barnabas timi le, Sailas an si i cu hna cu unau hna lakah hotu deuh an si.

²³ Hitihin an ṭial i an kut ah an kuat. Lamkaltu, upa hna le unau hna nih, Antiok khua le, Siria ram le Silisia ram i Gentel unau kut an tlaih hna.

²⁴ Kan bu chungin mizeimaw biachim mi nih an buaiter hna tiah kan theih. “Cuarpar nan tan hrimhrim lai i nawlbia zong nan zulh hrimhrim lai, tiah an ti. Cubantuk chim dingin an sinah nawl zeihmanh kan pe hna lo.

²⁵ Cucaah lungnge tein kan i pum i thimmi hna nan sinah ratter awkah kan hna a tla, kan dawtmi Barnabas le Paul,

²⁶ Bawipa Jesuh min in thih hmanh a ṭih lomi hna sinah,

²⁷ Judas le Sailas hi kan rak thlah hna, annih zong nih hi bia hi hmurkâ in an chim te lai.

²⁸ Zeitintiah Thiang Thlarau le kannih nih a biapi mi thil pinlei hna cu thilrit khinh lo dingin kan hna a tla,

²⁹ milem biaknâk sa ei le, sathi ei le, hngawngdih sa ei le nupa sualnâk tuah kha ngol ulaw, tiah kan ti, hi hna hi nan rak ngol ahcun nan caah a ṭha lai. Dam tein,” tiin.

³⁰ Cuticun an thlah hna i Antiok khua an phân, mizapi kha an kawh hna i ca cu an pêk hna.

³¹ An rel hnu ah thazâng pêknâk bia an chimmi nih a lawmhter ngai ngai hna.

³² Judas le Sailas cu profet zong an si i bia tampi in unau hna kha an hna an ngamter hna i an fehter hna.

³³ Ni zeimawzat cuka i an cam hnuah, unau hna nih lamkaltu hna sinah kir ṭhân dingah hnangam tein an chuahter hna.

³⁴ Asinain Sailas nih cuka i câm rih kha a ṭha tiah a ruah.

³⁵ Paul le Barnabas tu cu Antiok khua ah Bawipa biachim le cawnpiak in an um peng, midang tampi zong an um ve.

³⁶ Ni zeimawzat hnuah Paul nih Barnabas sinah, “Atu kal ṭhân u sih law, khuakip i Bawipa bia kan chimnâk pauh i unau hna kha veh in zeitindah an um ti kha zoh hna usih,” tiah a ti.

³⁷ Cubangin Barnabas nih Johan, Marka an timi cu an sinah hruai a timh peng.

³⁸ Asinain Paul nih Pamfilia in anmah a rak tluntâk hna i an rianṭuannâk i a rak zulh hna lo ruangah i kalpi a duh ti lo.

³⁹ Fak nawn in an i al hnuah, an i ṭhen. Barnabas nih Marka â kalpi Saipras tikulh leiah tilawng in an kal.

⁴⁰ Paul nih Sailas â thim i unau hna nih Bawipa zângfahnâk ah an chiah hna hnuah an chuak ve.

⁴¹ Cun kawhhran hna fehter pah in Siria le Silisia ram kha an ṭol dih.