LAMKALTU 13 - Laibaibal Thiang (BSI)

¹ Antiok khua i kawhhran hna lakah profet le cawnpiaktu an um, cu hna cu Barnabas le, Simeon, Nigera an timi le, Sairin khua mi Lusias Mangki bawi Herod khuk`hi Manean le Saul an si.

² Rawl ul in Bawipa rian an ṭuan lioah, Thiang Thlarau nih, “Barnabas le Saul hi ka thiahmi rian ṭuan awkah ka thleidanpiak u,” tiah a ti.

³ Rawl an ul i thla an cam dih hnuah, an cungah kut an chuan i an thlah hna.

⁴ Thiang Thlarau fialnâk in an kal i Seleusia khua ah an kal, cuka cun Saipras tikulh ah tilawngin an kal.

⁵ Salamis khua an phâk tikah Judah mi sinagog ah Pathian bia an chim. Anmah bawmtu dingah Johan zong kha an i kalpi.

⁶ Cu tikulh cu Pafos khua tiangin an ṭol i doihthiam, profet deu Judah mi an hmuh i a min cu Bar-Jesuh a si.

⁷ Cu pa cu bawi aiawhtu, Sirija Paul mifim ngaimi sin i a ummi a si. Cu bawi aiawhtu nih Pathian bia ngaih a duh ruangah Barnabas le Saul kha a auh hna.

⁸ Asinain ‘Elymus’ doihthiam pa (amin dang Bar-Jesuh) nih bawi aiawhtu pa cu zumhnâk bia a zumh sual lai ti a phang i annih cu a doh hna.

⁹ Cuticun Sual, Paul tiah auhmi kha Thiang Thlarau in a khat i cu pa cu dengteu in a zoh.

¹⁰ “Nang, hlennâk le zernâk in a khatmi pa, khuachia fapa, dinnâk a ralchanhtu pa Bawipa lam lamding hi merh na timh peng ko lai maw?

¹¹ Atu ah Bawipa kut na sinah a phân taktak lai, na mit a caw lai i khuaceu na hmu rih lai lo,” tiah a ti. Cuticun muihnâk le minmei nih a khuhcolh i kut tlaitu kawl ah â dap len ko.

¹² Bawi aiawhtu nih cu thil cu a hmuh tikah, Bawipa cawnpiaknâk cu mak a ti ngaingai i a zumh.

¹³ Paul le a hawi le cu Pafos khua in tilawngin an kal i Pamfilia ram Perga khua an phân; Johan nih a kaltâk hna i Jerusalem ah a tluntâk hna.

¹⁴ Perga khua an chuahtâk i Pisidia ram Antiok khua an phân. Sabbath ni ah sinagog ah an lut i an ṭhu.

¹⁵ Nawlbia le profet hna bia an rel hnu ah, sinagog uktu hna nih an sinah mi an thlah i, “Nau le hna, mi caah thazâng pêknâk bia nan ngeih ahcun chim tuah u,” tiah an ti hna.

¹⁶ Paul cu a dir i a kut a zauh hna hnu ah, “Pathian a `ihmi Israelmi hna ngai tuah u:

¹⁷ Israel mi hna Pathian nih kan pu le kha a rak thim hna, Izip ram i khual an si lioah khan a rak cawisan hna, A kut samh in cuka in a rak chuahpi hna.

¹⁸ Ramcar ah kum 40 tiang an um lioah khan an thil tining ah lungsau ngaiin a zoh hna.

¹⁹ Kanaan ram i mi phun sarih a tei hnuah an ram cu umnâk dingah a phawt hna.

²⁰ Cu hnuah kum 450 chung profet Samuel um tiangin biaceihtu kha a pêk hna.

²¹ Cu hnuah Siangpahrang an hal i Pathian nih Saul, Kish fapa, Benjamin phun chungin kum 40 tiang a pêk hna.

²² Amah a hlawt hnuah David kha siangpahrang dingah a dirter ṭhan, amah kongah a chimmi cu, ‘Jessi fapa David, ka lungput ngeimi minung, ka duhnâk a zultu hngami kâ hmuh cang,’ tiah a ti.

²³ Hi minung tefa chungin, bia rak kamciami bangin, Pathian nih Israel mi hna caah khamhtu Jesuh a rak chuahter,

²⁴ A rat hlanah Johan nih ngaihchihnâk baptisma kong Israel mi vialte sinah a rak chimh chung hna.

²⁵ Johan nih a ṭuanmi rian a dongh lai teah, “Nannih nih mi zei ah dah nan ka ruah? Amah cu ka si lo. Asinain zohhmanh u, ka hnuah Mi pakhat a ra, kei cu a ke i kedan phoihtu hmanh ah kâ tlâk lo,” tiah a ti.

²⁶ Ule nau Abraham chungkhar le tefa hna, nan lakah Pathian a ṭihtu vialte hna, hi khamhnâk bia hi nan sinah kan rak phanhpi.

²⁷ Zeitintiah Jerusalem khua i a ummi hna le uktu hna nih Amah cu an hngal lo, asiloah profet hna biacah, Sabbath ni chiarte an relmi kha an hngalh lo caah, Amah cu thiamlo coter in cu thil cu an rak tlinter.

²⁸ Amah ah thihpi tlak sualnâk zeihmanh an hmuh lo zongah Pailat sinah thah awkah an nawl.

²⁹ Cubangin Amah kong an rak ṭialmi vialte kha an tlinter dih hnuah, thing cungin an ṭhumh i Amah thlân ah an vui.

³⁰ Asinain Pathian nih thihnâk in a thawhter.

³¹ Galili ram in Jerusalem ah Amah he a ra ṭimi hna sinah ni tampi hmuhkhawh in â lang i cu hna cu mi tampi sinah Amah hngalhpitu an si.

³² Kannih zong nih pupa hna sin i rak kamh cangmi lomhnâk thawngṭha cu nan sin i kan phuanmi hi a si.

³³ Pathian nih kannih an tefa hna ca i bia a kamhmi cu Jesuh kha thawhter in a tlinter, Sam pahnihnâk ah, ‘Ka Fapa na si, nihin ah kan hrin,’ tiah a ṭial bang khan.

³⁴ A taksa zong thutmânnâk i kir lo dingin Pathian nih thihnâk in a thawhter lainâk zong hitihin ṭial a si. David sinah ka kamhmi vêl kha nangmah kan pêk hna, tiin.

³⁵ Cucaah Thangṭhatnâk hla dangah, ‘Na mithiang cu thutter na siang lai lo,’ tiah a ti.

³⁶ Zeitintiah David cu, Pathian duhning in a cân lioah minung hna caah rian a ṭuan dih in â hngilh i a pu le hna sinah an vui i a thu diam cang,

³⁷ asinain Pathian nih a thawhtermi cu a thu lo.

³⁸ Cucaah u le nau hna, hngal ko tuah u. Amah thawngin sual ngaihthiamnâk bia nan sinah kan chim,

³⁹ Moses nawlbia in thiam nan co khawhlo lioah, Amah zumtu hna cu zeizong vialte ah thiam coter an si.

⁴⁰ Cucaah i ralring u, culoahcun profet hna cauk i chimmi kha nan cungah a tlung sual lai.

⁴¹ Zomhtaihtu hna, zoh u, mak ti ulaw, lotlau dih u, zeitintiah nan nun chungah thil pakhat ka tuahmi hi, cu thil cu mi nih an in chimh hna zongah nan zum lai lo,’ timi hi,” tiah a ti.

⁴² Cuticun Judah mi hna sinagog in an chuah lioah, Gentel mi hna nih hmai Sabbath ni ah cu bia cu an sinah chim ṭhân dingin an nawl hna.

⁴³ Cubangin â pummi cu an ṭin dih hnuah Judah mi hna le an biaknâk â hrawmmi hna lakah Pathian a duhmi tampi nih Paul le Barnabas kha an zulh, annih nih Pathian zângfahnâk ah um peng dingin thazâng an pêk hna.

⁴⁴ Sabbath ni a phân ṭhân i khuami dihlak nawn in Pathian bia ngai dingin an i pum.

⁴⁵ Judah mi hna nih mibu an hmuh le cângkâ hnahchuahnâk in an khat i Paul bia chimmi cu an rak el i an thangchiat.

⁴⁶ Paul le Barnabas cu an ral a ṭha chinchin i, “Pathian bia hi nanmah sin i chim hmasat awk a si hrimhrim. Asinain nan duh lo i zungzal in nung dingah nan ruah lo hnuah, zohhmanh u, Gentel lei kan hoih ve cang lai.

⁴⁷ Zeitintiah cubantuk tuah awkah Bawipa nawlpêkmi kan si. ‘Gentel mi hna caah ceunâk ah kan ruah i vanhram deng tiangin khamhtu i na um khawh nâkhnga,’ tiah ṭialmi bang khan,” tiah an ti.

⁴⁸ Gentel hna nih cu bia an theih tikah an i lawm ngaingai i Bawipa kha an thangṭhat. Cun zungzal in nung dingah ruahmi vialte nih an zumh.

⁴⁹ Cun Bawipa bia cu cuka hrawng ram dihlak ah a thang dih.

⁵⁰ Asinain Judah mi nih Pathian ṭanhtu mirum hna le nu minthang deuh kha an forh hna i Paul le Barnabas serhsat dingin an thawhter hna i an ram in an ṭhawl hna.

⁵¹ Annih nih an ke leidip an thlakhnawh hna i Ikonion khua ah an kal.

⁵² Cun zultu hna cu lawmnâk le Thiang Thlarau in an khat.