LAMKALTU 1 - Laibaibal Thiang (BSI)

¹ Aw Theofilus, hmasa deuh ka ca ah, Jesuh cawnpiakmi le tuahmi vialte kha ka ṭial hna,

² Thiang Thlarau thawngin lamkaltu i a thimmi hna sinah nawl a pêk hna hnu ah, van i lâk a si ni tiangin,

³ an sinah a palh kho lomi hngalhpinâk tampi he, a temtuar hnuah a nung ṭhân tiah â langhter, ni sawmli chung an hmuh khawh dingin â lang i Pathian Pennâk kong kha a chimh hna.

⁴ Cun hmunkhat i an i pumhnâk ah a umpi hna i Jerusalem chuahtâk lo ding le Pa biakammi hngak dingin nawl a pêk hna, “Cucu” A rak chimmi, “Ka sinin nan theih cangmi kha a si;

⁵ zeitintiah Johan nih ti in Baptisma a pêk tak tak, asinain a rauh hlanah Thiang Thlarau in Baptisma nan co lai,” tiah a ti.

⁶ Cucaah hmunkhat i an i pumh lioah, “Bawipa, atu ah maw Israel caah Pennâk cu na dirh lai?” tiah an hal.

⁷ Anih nih, “A ni le cân Pa nih Amah nawlngeihnâk i a chiahmi cu nannih hngalh awk a si lo.

⁸ Asinain nan cungahThiang Thlarau a phâk tikah thiltikhawhnâk nan ngei lai, Jerusalem le Judah ram vialte, Samaria ramkip le vanhram deng tiangin ka bia hngalhpitu nan si lai,” tiah a ti.

⁹ Cu thil a chim dih in, an hmuh hngan teah vanah cawi in a um i khuadawm nih an hmuh khawh lonâk ah a lâk.

¹⁰ Cunglei ah a kai i cat loin vanlei zoh in an dir ko lioah, zohhmanh puanrang â aihmi pahnih an pawngah an dir i

¹¹ an sinah, “Galili mi hna, zeiruangahdah vanlei zohin nan dir ko? Hi Jesuh nan sin i vanah a kaimi hi, van i a kai nan hmuh bantuk te hin a ra ṭhân lai,” tiah an ti.

¹² Olivet an timi tlângin Jerusalem ah an kir, cu tlâng cu Jerusalem pawng, Sabbath ni i kal khawhnâk a si.

¹³ Cun khua an luh tikah, an um tawnnâk dot cungnung ah an kai, Peter le, Jeim, Johan le Andria, Filip le Thomas; Bartholomi le Matthai, Alfai fapa Jeim le Simon Zelot chungmi le Jeim fa Judas hna an si.

¹⁴ Cu vialte cu nu hna le Jesuh nu Mary, Jesuh nau le hna he ruahnâk hmunkhat i thlacam le nawlnâk tuah in an um peng.

¹⁵ Cun lamkaltu hna an i pumh lio ah, Peter a dir i (an dihlak in za le kul hrawng an si)

¹⁶ unau hna, “Thiang Thlarau nih David kâ in Jesuh a tlaitu hna hruaitu pa Judas kong Cathiang ah a rak chimchungmi hi a tlin awk a si ko,

¹⁷ zeitintiah amah kha kan lakah relchih a si ve i hi rian ah hin ṭuanvo zong a ngei ve.”

¹⁸ (Hi pa nih hin a sualman in hmun pakhat a cawk i a bettaling in a tla, a paw a kuai i a ril vialte a chuak dih).

¹⁹ Cu kong cu Jerusalem i a ummi nih an hngalh dih; cucaah cu hmun cu anmah holh in, “Akel Dama,” tiah an ti; cucu thisen hmun tinâk a si.

²⁰ Zeitintiah Sam cauk ah hi kong hi ṭial a si. ‘A umnâk in rauhtâk si sehlaw, a chungah ahohmanh um hna hlah seh,’ ti le ‘hotu a sinâk cu midang nih co hna seh,’ tiin.

²¹ Cucaah Bawi Jesuh, kan sin i a luh a chuah chung vialte,

²² Johan nih Baptisma a pêk ri in kan sinin Jesuh vanah lakchoh i a um tiang a kan kom zungzaltu lakah mi pakhat a thawhṭhannâk a kan hngalhpitu pakhat a um awk a si,” tiah a ti.

²³ Cun mi pahnih an ruah i Josef, Barsabas timi, Judas zong an ti ṭhanmi le Matthias kha an si.

²⁴ Cun thla an cam i “Maw, Bawipa, lungthin vialte a hngaltu, hi hna pahnih lakah aho deuh dah na thim kan hngalter ko.

²⁵ Judas nih a umnâk i kal dingin sual i a tluktâkmi, hi rianṭuannâk le lamkaltusinâk hmun lawng hi cotu an um a herh fawn,” tiah an ti.

²⁶ Camcawh fung an zuh i Matthias cungah a tla. Cuticun amah cu lamkaltu hleikhat hna sinah relchih a si.