JOHAN 9 - Laibaibal Thiang (BSI)

¹ A kal pah in Jesuh nih a chuahka in mincaw pakhat a hmuh.

² A lamkaltu hna nih, “Rabbi, mitcaw cia in hrin hi, a ho sual ruangah, amah maw a nu le pa dah?” tiah an hal.

³ Jesuh nih, “Amah le anu le pa sual ruangah a si lo, a cungah Pathian rianṭuan a langhnâk ding tu ah a si.

⁴ Chûn a si lio ah aka thlahtu rian ka ṭuan awk a si; zan a rak phân lai. cu cân ah cun ahohmanh nih rian an ṭuan kho ti lai lo.

⁵ Vawlei i ka um lio ah, vawlei ceunâk ka si,” tiah a leh hna.

⁶ Cu bia a chim hnu ah vawlei ah a cil a châk i tlak a ser i a mitah a benh.

⁷ Cun a sinah, “Siloam tidil ah vâ ṭawl, tiah a ti. (Siloam sullam cu “Thlah” tinâk a si) Cuticun a kal i â ṭawl hnu ah mitdei in a rak kir.

⁸ Cucaah an innpa hna le cuhlan i kutdawh i a hmutu hna nih, “Hi pa hi ṭhut bu i kut a dawhmi kha a si lo maw?” tiah an ti.

⁹ Cheukhat nih, “Amah kha a si ko” an ti. Midang nih, “Amah he â lomi a si,” tiah an ti. Anih nih, “Amah kha ka si ko,” tiah a ti.

¹⁰ Cucaah mi nih, “Zeitindah na mit a dei ṭhân” tiah an ti.

¹¹ Anih nih, “Mi pakhat Jesuh an timi nih tlak a ser i ka mit ah a benh, ‘Siloam tidil ah va kal law, va ṭawl’ a ka ti. Ka va kal i kâ ṭawl tikah, ka mit a dei i khua ka hmu kho,” tiah a ti.

¹² Annih nih, “Amah cu khuazeiahdah a um?” tiah an ti i “Ka hngal lo,” tiah a ti.

¹³ Mitcaw pa cu Farasih hna sinah an kalpi.

¹⁴ Jesuh nih tlak ser in a mit a deiter ni kha sabbath ni a rak si ngel cel.

¹⁵ Cuticun Farasih hna nih a mit a dei `hannâk kong kha an hal ṭhân. Anih nih, “Ka mit ah tlak a benh i ka ṭawl tikah khua ka hmu kho ko” tiah a ti.

¹⁶ Farasih cheukhat nih, “Hi mipa hi Sabbath a ulh lo ruangah Pathian sin in a rami a si lai lo,” tiah an ti. Cheukhat nih, “Mi sual nih zeitindah hi bantuk hmelchuanhnâk a tuah khawh lai?” tiah an ti ve i an lakah i ṭhennâk a chuak.

¹⁷ Mitcaw sinah, na mit an deiternâk kongah nang zeitindah na ruah? tiah an ti. Anih nih, “Profet a si,” tiah a ti.

¹⁸ Asinain Judah mi hna nih mitdei pa i nu le pa an kawh hlan cu mitcaw a rak si i atu ah khua a hmu ṭhân ti kha an zum duh lo.

¹⁹ A nu le pa sinah, “Hi hi nan fapa mitcaw cia in a chuak nan timi kha a si maw? zeitindah atu khua a hmuh ṭhân? tiah an hal hna.

²⁰ A nu le pa nih an leh hna i, “Hi hi kan fapa a si i mitcaw cia in a chuak ti kha kan hngalh.

²¹ Asinain atu ah zeiruangahdah a rak hmuh khawh ṭhân, kan hngal lo, a mit dei tertu zong kan hngal lo. Patling a si cang; amah hal ulaw, amah nih amah kong cu chim ko seh,” tiah an ti.

²² Cubangin bia an chim cu Judah mi hotu an ṭih ruangah a si. Zeitintiah Judah hotu hna nih, “Amah cu Krih a si” titu pauh cu Sinagog in ṭhawl ding an si tiah biakhiahnâk an rak tuah cang.

²³ Cucaah a nu le a pa nih, ‘Patling a si cang, a mah hal u,’ tiah, an rak tinâk kha a si.

²⁴ Cuticun mitcawpa cu an kawh ṭhân i “Pathian thangṭhat ko, Hipa hi cu misual a si kha kan hngalh,” tiah an ti.

²⁵ Anih nih, “Misual a si le si lo ka hngal lo. Pakhat te ka hngalh, ka mit a rak caw i atu khua ka hmu,” tiah a ti.

²⁶ Annih nih, “Zeitindah an tuah, zeitindah na mit a deiter?” tiah an ti.

²⁷ Anih nih, “Kan chimh cang hna kha ta, nan ngai duh fawn lo. Zeiruangahdah theih cu nan duh ṭhân kun? Nannih zong a zultu si nan duh ve hlah maw?” tiah a leh hna.

²⁸ Annih nih, “Nang hi Amah zultu na si, kan nih cu Moses zultu kan si.

²⁹ Pathian nih Moses a chawnh tiah kan hngalh, hi pa hi khawzei leimi dah a si kan hngal lo,” tiah fakpi in an sîk.

³⁰ Anih nih, “Cucu dah kaw khuaruahhar a sinâk cu. Khuazeimi dah a si tiah nan hngalh lomi nih ka mit a deiter fawn.

³¹ Pathian nih misual bia a ngai ballo tiah kan theih. Mizei pauh nih Pathian a tlaih chan i a duhmi a tuah ahcun Pathian nih a bia a ngaih tawn.

³² Vawlei semka in mitcaw cia in a chuakmi mitdeinâk kong kan thei bal rih lo.

³³ Hi pa hi Pathian sinin a rami a si lo ahcun zeihmanh a tuah kho lai lo” tiah a leh hna.

³⁴ Annih nih, “Nang sual tlingte he a chuakmi nih nakan cawnpiak lai maw?” tiah an ti i an ṭhawl.

³⁵ An ṭhawl ti kha Jesuh nih a hngalh tikah a kawl i, “Pathian Fapa na zum maw?” tiah a ti.

³⁶ Anih nih, “Bawipa, ka zumh khawh nâkhnga, Amah cu ahodah a si?” tiah a ti.

³⁷ Jesuh nih, “Amah cu na hmuhmi, nangmah an chawntu hi a si,” tiah a ti.

³⁸ Anih nih, Bawipa, ka zumh ko, tiah a ti i a biak.

³⁹ Jesuh nih, “Hi vawlei ah hin biaceih dingah ka ra, mitcaw hna an mit a deinâk hnga le, mit deimi hna, an mit a cawt nâkhnga,” tiah a ti.

⁴⁰ Cuticun a pawngkam i Farasih hna nih cucu an theih i, “Kannih zong mit caw kan si ve maw?” tiah an ti.

⁴¹ Jesuh nih, “Mit caw rak si ulaw, sualnâk nan ngei hnga lo; asinain atu ah, kan hmuh khawh ko, tiah nan ti fawn. Cucaah nan sualnâk cu a um peng ko,” tiah a ti hna.