JOHAN 7 - Laibaibal Thiang (BSI)

¹ Cu thil hna hnu ah Jesuh nih Galili ram a ṭol i Judah mi nih thah an timh ruangah Judia ramah a kal duh lo.

² Judah mi Deu Thô kha a nai cang.

³ A unau hna nih, “Hika hin Judia ramah va kal, na zultuhna nih na tuahmi hi an hmuh khawh nâkhnga.

⁴ Zeitintiah mah minthannâk a kawlmi nih a thli in thil an tuah bal lo. Hi thil hna hi na tuah taktak ahcun vawlei hmai ah va langhter ngat,” tiah an ti.

⁵ Zeitintiah a unau le hmanh nih Amah kha an zum lo.

⁶ Jesuh nih, “Ka cân a phân rih lo, nannih cân tu cu phanh lo cân a um lo.

⁷ Vawlei nih nannih an in hua kho hna lo, an tuahmi Ṭhatlonâk kha ka hngalhter tawn hna caah kei tu cu an ka huat.

⁸ Nannih Thô ah vakal u, kei cu hi Thô ah hin ka kal rih lai lo, ka cân a phanh rih lo caah,” tiah a ti hna.

⁹ Cubia a chim lio ahcun Galili ah a um ko rih.

¹⁰ Asinain a unau hna thô i an kal hnu ah, anih zong lang lo dingin a thlithup in a kal.

¹¹ Cuticun Judah mi nih tho ah an kawl, “Khuazeiahdah a um?” tiah an ti.

¹² Amah kongah mizapi an i caih len i a cheu nih, “Mi ṭha a si,” an ti. A cheu nih, “Si hlah, mizapi a hlen tawn,” tiah an ti.

¹³ Judah mi an `ihruangah langhngan in a konglam an chim ngam lo.

¹⁴ Thô laifang ah Jesuh cu ṭempal ah a kal i a cawnpiak hna.

¹⁵ Judah mi nih, “Hi pa hi cawng loin zeitindah ca a thiam khawh?” an ti i mak an ti ngai ngai.

¹⁶ Jesuh nih a leh hna i, “Ka cawnpiakmi bia hi keimah ta a si lo, aka thlahtu ta a si.

¹⁷ Amah duhnâk tuah a duhmi pauh nih ka cawnpiakmi hi Pathian sin in maw a si, keimah ṭawnchawm dah a si a hngalh ko lai.

¹⁸ Mah ṭawnchawm a chimtu nih amah sunparnâk a kawl, sihmanhsehlaw a thlahtu sunparnâk lawng a kawltu cu midik a si i Amah ah dinlonâk zeihmanh a um lo.

¹⁹ Moes nih nawlbia an pe hna lo maw? Asinain nan lakah a zulmi pakhat hmanh nan um lo. Zeiruangahdah thah nanka timh?” tiah a ti.

²⁰ Mizapi nih an leh i khuachia nih an tuah ko hih. Ahonihdah thah an in timh? tiah an ti.

²¹ Jesuh nih, “Rian pakhat ka ṭuan i nan dihlak in mak nan ti.

²² Hi ruangah dah kaw Moses nih cuarpar tannâk kong an pêk hna cu. Moses chuahtermi a si lo, hringtu pa hna chuahtermi a si. Sabbath ni zongah cuanpar nan tan fawn.

²³ Mi nih Sabbath ni ah cuarpar a tan i Moses nawlbia buar a si lo ahcun, Sabbath ni i mi ka damter ruangah ka cungah nan thin a hung lai maw?

²⁴ “A langhning lawngin thil hi zohhlah u, dik le fel tein ruat tuah u.” tiah a ti.

²⁵ Jerusalem i mi cheukhat nih, “Hipa hi maw thah an timhmi pa cu?

²⁶ Zohhmanh u, ralṭha in bia a chim ko ṭung, zeitihmanh in an ti fawn lo. Hotu hna zong nih Krih a si taktak hi an hngalh cang dahra?

²⁷ Asinain kannih nih hipa hi a chuahnâk tiangin kan hngalh dih fawn,” tiah an ti.

²⁸ Cuticun ṭempal i a cawnpiak lio ah Jesuh a au i, “Nanka hngalh, ka chuahnâk tiangin nan hngalh. Asinain keimah nawl i a rami ka si lo. Aka thlahtu hi mi taktak a si i Amah cu nan hngal lo.

²⁹ Asinain Amah cu ka hngalh, Asin in a chuakmi ka si i Amah thlahmi ka si,” tiah a ti.

³⁰ Cucaah tlaih an timh, asinain a cân a tlin lo caah ahohmanh nih kut in an tawng lo.

³¹ Mitampi nih Amah cu an zumh i Krih a rak phâk tik zongah, Hi pa nâkin hmelchunhnâk tam a tuah hlei hnga maw?” tiah an ti.

³² A kong i mizapi an i caih len kha Farasih hna nih an rak theih, cuticun Farasih hna le tlângbawi hna nih Amah tlaitu dingah palik kha an thlah.

³³ Jesuh nih, “Cân tawi te nan sinah ka um rih lai, cu hnu ah aka thlahtu sinah ka kir cang lai.

³⁴ Nannih nih nanka kawl lai i nanka hmu lai lo, ka umnâk zongah nan ra kho lai lo,” tiah a ti.

³⁵ Cuticun Judah mi an i caih i kan hmuh lo dingin hipa hi khawzei kal dah a timh hnga? Grik mi hna sin i â ṭhekmi hna sinah kal in, Grik mi cawnpiak a timh a si hnga maw?

³⁶ Nanka kawl lai i nanka hmu kho lai lo, ka umnâk zongah nan ra kho lai lo, a timi hi zeidah a sullam a si hnga?” tiah an ti.

³⁷ Thô ni donghnâk nisunglawi bik timi ah, Jesuh a dir i a au, “A ti a hâlmi pauh ka sinah ra seh law, ding seh.

³⁸ Cathiang nih a chim bangin aka zummi pauh cu a chungah tinung a luang lai, tiah a ti.

³⁹ Cubia cu Amah zumtu hna nih Thlarau an ngeihnâk ding a chimmi a si, Jesuh kha thangṭhat in a um rih lo caah Thiang Thlarau kha pêk a si rih lo..

⁴⁰ Mizapi lakah mi tampi nih cu bia an theih tikah, “Hi pa hi profet a si hrimhrim ko,” tiah an ti.

⁴¹ Midang nih, “Hihi Krih cu a si,” tiah an ti. Cheukhat nih, “Krih cu Galili ram in a rak chuak hnga maw?

⁴² Krih cu David hrinthlâk in, David khua Bethlehem ah a chuah awk a si tiah Cathiang nih a chim ko lo maw?” tiah an ti.

⁴³ Cuticun Amah ruangah zapi lakah ṭhennâk a um.

⁴⁴ Cuhnuah a cheu nih tlaih an duh, asinain ahohmanh nih an kut in an tawng lo.

⁴⁵ Palik hna cu Farasih le tlângbawi sinah an ra i, “Zeiruangahdah nan rat pi lo?” tiah an rak ti hna.

⁴⁶ “Khipa bantukin ahohmanh nih bia an chim bal lo,” tiah an leh hna.

⁴⁷ Farasih hna nih, “Nan nih zong an hlenve cang hna mu,”

⁴⁸ Hotu hna le Farasih mi lakah Amah zumtu pakhat tal an um cang maw?

⁴⁹ Hi mizapi, nawlbia zong a hngal lomi hna hi, chiatserh dah kaw an si cu,” tiah an ti.

⁵⁰ Nikodimu (zan i Jesuh sin i a rami, anmah lak i pakhat) nih an sinah,

⁵¹ “A tuahmi le chimmi theih hlanah, kan nawlbia nih mi thiamlo a coter kho maw?” tiah a ti.

⁵² Annih nih, “Galili mi maw na si ve? zoh law, hlat, Galili in profet an chuak bal maw?” tiah an ti.

⁵³ Cun mikip an in cio ah an ṭin.