JOHAN 6 - Laibaibal Thiang (BSI)

¹ Cu thil hna hnu ah Jesuh cu Galili tidil, Tiberia tidil an timi ral ah a kal.

² Cuticun mizaw hna cung i hmelchunhnâk a tuahmi kha an hmuh cang caah Amah cu mi tampi nih an zulh.

³ Jesuh cu tlângcungah a kai i a lamkaltu hna he cuka ah an ṭhu.

⁴ Cubangin Lanhtâk, Judah mi Thô kha a nai cang.

⁵ Cuticun Jesuh nih a hei cuan i mibu tampi nih an rak panh kha a hmuh, Filip sinah, “Hi hna ei awk changreu hi khawzei ta dah kan cawk hnga” tiah a ti.

⁶ Cubia cu amah hniksaknâk caah a chimmi a si, zeitintiah a tuah hngami cu Amah nih a hngalh ko.

⁷ Filip nih, “Mikip nih tlawmte lawng an co awk hmanh ah ngamu zahnih man changreu nih a zat hna lai lo,” tiah a leh.

⁸ A lamkaltu lak i pakhat Simon Peter unau Andria nih,

⁹ “Barli changreu panga le nga pahnih a ngeimi pa ngakchia pakhat hika ah a um, asinain hi tluk mitam caah zeidah a si hnga?” tiah a ti.

¹⁰ Jesuh nih, “Mizapi hi ṭhutter hna u” tiah a ti. Cuhmun ah cun ramhring tampi a um. Cuticun patling hna cu an ṭhu i an tamning cu 5000 hrawng an si.

¹¹ Jesuh nih changreu kha a lâk i lawmhnâk bia a chimdih in lamkaltu kha a phawt hna, cubantukin lamkaltu nih mizapi kha an phawt hna. Nga zong kha an duh zat in an phawt hna.

¹² Cuticun an khim hnu ah, a lamkaltu hna sinah, “Zeihmanh tlawttlau lo dingin a ṭilfuan hi char dih u,” tiah a ti.

¹³ Cucaah an hun char hna i barli changreu panga eitu hna ṭilfuan cu sei hleihnih khat in an char.

¹⁴ Jesuh nih cubantuk hmelchunhnâk a tuahmi an hmuh tikah, mizapi nih, “Hi pa hi Profet, vawlei i a ra din cu a si taktak ko,” tiah an ti.

¹⁵ Cucaah Jesuh nih Amah kha siangpahrang i hranhrâm lo in canter awkah tlaihbawh an timh ti kha a hngalh tikah, tlângcungah Amah lawng in lo diam a kal.

¹⁶ Zanlei ah a lamkaltu kha tidîl ah an vung ṭum.

¹⁷ Tilawngah an i cit i Kapernaum lei panh in tidîl kha tan an tim. Khua muih â tim cang i Jesuh kha an sinah a phân rih lo.

¹⁸ Cuticun thli fakpi in a hrang i tilet kha a sângchin leng mang.

¹⁹ Cubangin mengthum mengli hrawng an tilawng an zah hnu ah Jesuh cu tidîl cungah ke in anmah a rak panh lio kha an hmuh i an ṭih.

²⁰ Asinain an sinah, “Keimah ka si, ṭih hlah u” tiah a ti hna.

²¹ Annih nih lunglawm tein tilawngah cit dingin an cohlân i a rauhhlanah an panhmi tidil kam kha an phân cawlh.

²² A thaizingah varal lei i a dirmi mizapi nih, lamkaltu hna citmi tilawng dah tilo tilawng dang a um lo i anmah lawng an i cit i Jesuh cu â cit velo ti kha an hngalh.

²³ Asinain Bawipa nih lawmhnâk bia a chim dih i changreu an ei nâk pawngah khan, Tiberia khua i tilawng dang an rak phân.

²⁴ Mizapi nih Jesuh le a lamkaltu an um lo ti kha an hngalh tikah, annih zong tilawngah an i cit i Jesuh kawl in kapernaûm khua an rak phân.

²⁵ Varal khat te lei i an hmuh tikah a sinah, “Rabi, zeitikahdah hika hi na phâk?” tiah an ti.

²⁶ Jesuh nih, “Biataktein, biataktein kan chimh hna, hmelchunhnâk nan hmuh ruangah, nanka kawlmi a si lo, changreu khim tein nan ei ruangah a si.

²⁷ A rawkral khomi rawl ruah ah i phar len hlah u, Mi Fapa nih pêk an timhmi hna rawl ruah tu ah i pharlen u; zeicatiah Pa Pathian nih Amah cu a chinchiah cang.

²⁸ Annih nih, “Pathian rian kan ṭuan khawh nâkhnga, zeidah kan tuah lai?” tiah an ti.

²⁹ Jesuh nih, “Pathian rianṭuan cu hihi a si, A thlahmi zumh hi,” tiah a leh hna.

³⁰ Annih nih, “Kan hmuh i kan in zumh khawh nâkhnga, zeibantuk hmelchunhnâkdah na tuah lai? zei rian dah na ṭuan lai?

³¹ Kan pupa hna nih ramcar ah mânâ kha an ei tawn ‘Van in an sinah changreu ei awk a pêk hna,’ tiah ṭialmi bangin,” tiah an ti.

³² Jesuh nih, “Biataktein, biataktein kan chimh hna, Moses nih vanin changreu an pe hna lo, asinain ka Pa nih van in changreu taktak kha an pêk hna.

³³ Zeitintiah Pathian changreu cu van in ara i vawlei ah a nunnâk petu ding hi a si,” tiah a ti.

³⁴ Annih nih, “Cu changreu cu kan pe zungzal ko,” tiah an ti.

³⁵ Jesuh nih, “Keimah hi nunnâk changreu cu ka si. Ka sin i a rami pauh cu a rawl a ṭâm ti lai lo. A ka zummi pauh cu a ti a hâl ti lai lo.

³⁶ Asinain nan ka hmuh ko nain nan zum lo tiah kan chimh cang hna kha.

³⁷ Pa nih aka pêkmi vialte ka sinah an ra lai, ka sin i a rami pauh cu ka dawn hna lai lo.

³⁸ Zeitintiah mah duhnâk tuah awkah van in a rami ka si lo, aka thlahtu duhnâk tuah awkah a rami ka si.

³⁹ Hihi aka thlahtu Pa duhnâk cu a si, aka pêkmi vialte thlau loin ni dongh ni ah thawhter ding hi.

⁴⁰ Cun hihi aka thlahtu duhning a si, Fapa a hmu i a zummi pauh nih zungzal nunnâk ngeiseh law, cun ni dongh ni ah keimah nih ka thawhter lai,” tiah a ti.

⁴¹ Van i a rungṭummi changreu cu ka si, a timi ruangah Judah mi cu a cungah an zai.

⁴² Hipa hi Josef fapa, Jesuh a si lo maw, anu le apa zong kan theih ko hna? Van in ka rung ṭum, tiah zeitindah a ti khawh? tiah an ti.

⁴³ Jesuh nih, phunzai lengmang hlah u.

⁴⁴ Aka thlahtu Pa nih a hnuh hna dah tilo ahcun, ahohmanh ka sinah a ra kho lo. Cun ni hmadungbik ah ka thawhter lai.

⁴⁵ Profet hna cauk ah, “Pathian cawnpiak in an um dih lai,” tiah ṭial a si. Pa bia thei i a cawngmi pauh cu ka sinah an ra tawn.

⁴⁶ Pa a hmumi an um cang tinâk a si lo, Pathian sin in a rami lawnglawng hi Pa a hmutu um chun cu a si.

⁴⁷ Biataktein, biataktein kan chimh hna, aka zummi pauh cu zungzal nunnâk a ngei cang.

⁴⁸ Keimah hi nunnâk chungreu cu ka si.

⁴⁹ Nan pupa hna nih ramcar ah mana an ei i an thi.

⁵⁰ Hihi van in a rungṭummi changreu cu a si, minih an ei i an thih ti nâkhnga lo.

⁵¹ Keimah hi van in a rungṭummi changreu nung ka si. Hi changreu a eimi pauh, zungzal in a nung peng lai. Vawlei nunnâk dingah ka pêk hngami changreu cu ka taksa hi a si.” tiah a ti.

⁵² Judah mi kha an i al i, “Hi pa nih a taksa cu ei awkah zeitindah a kan pêk khawh lai?” tiah an ti.

⁵³ Jesuh nih, “Biataktein, biataktein kan chimh hna, Mi Fapa taksa nan ei i a thisen nan din lo ahcun, nanmah tein nunnâk nan ngei lo.

⁵⁴ Ka taksa a ei i ka thisen a dingmi pauh cu zungzal nunnâk a ngei cang, cun ni donghni ah a mah cu ka thawhter lai.

⁵⁵ Zeitintiah ka taksa hi rawl tak a si i ka thisen hi dinawk taktak cu a si.

⁵⁶ Ka taksa a ei i ka thisen a dingmi pauh cu keimah ah a hmun i kei zong amah ah ka hmun.

⁵⁷ A nungmi Pa nih aka thlah i Pa thawngin a nungmi ka si bangin, aka eitu pauh cu keimah thawngin a nung ve lai.

⁵⁸ Hihi vanin chungreu a rungṭummi cu a si, nan pupa hna nih mânâ an ei i an thih ṭhân bantuk kha a si lo. Hi changreu a eimi cu zungzal in a nung peng lai.

⁵⁹ Cu bia hna cu Kapernaûm khua i Sinogog chungah chim in a cawnpiakmi an si.

⁶⁰ Cucaah a zultu lakah mi tampi nih cu bia cu an theih i “Hihi a har ngai ngaimi bia a si, ahonihdah a theihthiam khawh lai?” tiah an ti.

⁶¹ Cu kong ah a zultu an zailen kha Jesuh nih amah tein a hngalh i an sinah, “Hi bia nih hin lung si loin an umter hna hlah maw?

⁶² Mi Fapa hi hlan i a rak umnâk i a kai nan hmuh tikah zeitindah nan ti kun lai?

⁶³ Nuntertu cu Thlarau a si, taksa cu san a tlai lo. Nan sin i bia ka chimmi hi thlarau an si i nunnâk zong an si.

⁶⁴ Asinain nan lakah cheukhat zumlotu nan um,” tiah a ti. Zeitintiah Jesuh nih Amah zum lotu hna le Amah rawitu ding kha a hramthawk in a rak hngalh cang.

⁶⁵ Cun a chim ṭhân i, “Cucaah dahkaw nan sinah Pa nih a pêk hna dah ti lo ahcun ahohmanh ka sinah nan ra kho lo, tiah kan ti hna kha,” tiah a ti.

⁶⁶ Cu cân thawk in a zultu lakah mi tampi an i zûk i Amah an kawm ti lo.

⁶⁷ Cuticun Jesuh nih hleihnih hna sinah, “Nannih zong kal nan duh ve maw? tiah a ti.

⁶⁸ Simon Peter nih, “Bawipa aho sinahdah kan kal lai? Nangmah nih zungzal nunnâk bia kha na ngei.

⁶⁹ Krih Pathian nung Fapa na si kha kan hngalh i kan zumh,” tiah a leh.

⁷⁰ Jesuh nih, “Nannih hleihnih hna hi Keimah thimmi nan si lo maw? Nan lak i pakhat khuachia a hei si rih,” tiah a ti.

⁷¹ Simon fapa Judas Iskariot, hleihnih hna chung i â telmi kong a chimnâk a si, zeitintiah cupa cu Amah rawitu ding kha a si.