JOHAN 5 - Laibaibal Thiang (BSI)

¹ Cu hnu ah Judah mi Thô pakhat a um i Jesuh cu Jerusalem khua ah a kal.

² Jerusalem ah Tuu kutka timi pawngah tidîl a um i cucu Hebru holh in Bethesda tiah an ti i deu panga a um.

³ Cu deu ah mizaw, mitcaw, kebei, mizeng hna nih tidîl a cangh cân kha hngakin an um.

⁴ Zeitintiah tidîl ah khan vanmi an ra i ti kha an canghter tawn. Ti a cangh hnu i â paih hmasa bik kha zeibantuk zawtnâk le fahnâk zong an dam tawn.

⁵ Cuka ah kum 38 a ngawrmi a um.

⁶ Jesuh nih cuka hmun i a ih ko kha a hmuh i a zawt cân a sau cang ti a hngalh i a sinah, “Damter na duh maw” tiah a ti.

⁷ Mizaw pa nih, “Ka pu, ti a cangh lio ah chiatu ka ngei lo, ka vung zuan lio ah midang nih anka phâk kanh tawn,” tiah a ti.

⁸ Jesuh nih, “Tho law, na ihphah la law, kein kal cang,” tiah a ti.

⁹ Cupa cu a dam cawlh i a ihphah â lak i a kal. Cuni cu Sabbath a si.

¹⁰ Cucaah Judah mi nih a dammi pa sinah, “Sabbath ni a si, na ihphah nalâk hi phungning a si lo,” tiah an ti.

¹¹ Anih nih, “Aka damtertu nih, na ihphah la law, kein kal aka ti,” tiah a leh hna.

¹² Annih nih, “Na ihphah la law, kein kal, an titu cu ahodah a si?” tiah an hal.

¹³ Asinain damter a simi pa nih ahodah a si a hngal lo, zeitintiah cuhmun ah mi an tam tuk i Jesuh nih le â zuk cang fawn.

¹⁴ Hnu deuh ah Jesuh nih cupa cu ṭempal ah a hmuh i a sinah, “Ngaihmanh, na dam cang hih. Thilṭhalo chin chin nih an tlunh hnawh sual nâkhnga lo sualnâk va tuah ti hlah,” tiah a ti.

¹⁵ Mipa cu a vakal i Judah mi kha aka damtertu cu Jesuh a si tiah ava chim hna.

¹⁶ Sabbath ni ah cubantuk thil a tuah ruangah Judah mi nih Jesuh cu an serhsat i thahnâk ding lam kha an kawl.

¹⁷ Asinain Jesuh nih, “Ka pa, nih atu tiangin rian a ṭuan i kei zong nih ka ṭuan ve,” tiah a ti hna.

¹⁸ Judah mi nih thah an timh chin chin, zeicatiah Sabbath a buar lawng si loin, Pathian khi ka Pa, a ti ruangah le Pathian tlukah â ruah ruangah a si.

¹⁹ Jesuh nih, “Biataktein, biataktein kan chimh hna, Fapa nih Amah lawngin zeihmanh a tuah kho lo, Pa nih a tuahmi a hmuhmi dah ti lo cu, Pa nih a tuahmi pauh, Fa zong nih a tuah.

²⁰ Zeitintiah Pa nih Fapa a dawt i a tuahmi vialte kha a zohter tawn, mak nan ti awkah, hi thil hna nâk in a ngan deuhmi zong a hmuhsak chin chin lai.

²¹ Zeitintiah Pa nih mithi kha a thawhter i a nunter bantukin, Fapa zong nih a duhmi pauh a nunter tawn.

²² Zeitintiah Pa nih ahohmanh an bia a ceih ballo, biaceihnâk vialte cu Fapa sinah a pêk cang,

²³ Mi vialte nih Pa an upat lai i Fapa zong an upat nâkhnga. Fapa a upat lomi pauh cu a thlahtu Pa upat lo a si.

²⁴ “Biataktein biataktein, kan chim hna, ka bia a thei i aka thlahtu a zummi pauh cu zungzal nunnâk a ngei cang, biaceihnâk ah a phân lai lo, thihnâk in a chuak cang i nunnâk ah a lan cang.

²⁵ Biataktein biataktein, kan chimh hna, mithi hna nih Pathian Fapa aw an theih cân a phân lai, atu hi a phân ko cang, a theimi pauh an nung lai.

²⁶ Zeitintiah Pa nih Amah ah nun a ngeih bantukin Fapa zong Amah ah nun a ngeihkhawhnâk a pêk,

²⁷ cun Mi Fapa a si ruangah a sinah biaceih dingin nawlngeihnâk zong a pêk.

²⁸ Hihi nan khuaruah har hlah seh, thlân i a ummi vialte nih a aw an theih cân a phân lai,

²⁹ cun cu aw a theitu pauh cu an chuak lai i ṭhatnâk a tuahtu kha nunnâk co dingin an tho lai i Ṭhatlonâk a tuahtu kha thiamlo co in an tho lai.

³⁰ Keimah lawngin zeihmanh ka tuah kho lo, hnâ i ka theih ning tein bia ka ceih tawn. Mah duhnâk i um loin aka thlahtu Pa duhnâk i um ka timh peng caah.

³¹ “Ka kong hi Keimah lila nih hngalhter ning law, ka hngalhtermi bia cu a dik lai lo.

³² Ka kong hngalhtertu midang a um, Amah nih ka kong a hngalhtermi cu a dik ti ka hngalh.

³³ Nannih nih Johan sinah mi nan thlah i anih nih biatak a rak hngalhter hna.

³⁴ Minung sinin hngalhpinâk hi ka hmuhmi a si lo, asinain khamh nan si khawh nâkhnga hi thil hi ka chimmi an si.

³⁵ Johan cu a ceu tak takmi meiin a si, a ceunâk tang i i lawmh zong nan duh rih.

³⁶ Asinain hngalhternâk ka ngeihmi hi Johan hngalhternâk nâk in a ngan deuh. Pa nih ka lîm awkah a ka pêkmi rian ka ṭuan liomi nih hin Pa nih a thlahmi ka si hi a hngalhter.

³⁷ Cun aka thlahtu Pa zong nih ka kong hi a hngalhter cang. Nannih nih zeitikhmanhah a aw nan thei ballo, a mui zong nan hmu bal lo.

³⁸ A bia zong nan chungah a hmun lo, a thlahmi nan zumh lo ruangah.

³⁹ Cathiang cu nan dothlat lên ko, zeicatiah cuka ah zungzal nunnâk kan hmuh hmanh maw, tiah nan ruah, hi hna hi ka kong hngalhtertu an si.

⁴⁰ Asinain nunnâk ngei dingin ka sin rat nan duh lo.

⁴¹ Minung conglomh ka cohlang lo.

⁴² Nannih kan hngalh hna, nan chungah Pathian dawtnâk nan ngei lo.

⁴³ Ka Pa minin ka ra i nan ka cohlang lo, midang anmah min in ra hna sehlaw, nan cohlan hna lai.

⁴⁴ Nannih mah le mah â conglawmmi hna. Pathian in a chuakmi conglomhnâk kawl loin zeitindah nan zumh khawh lai?

⁴⁵ Pa sin ah sual kan puh hna lai kha zum hlah u, nanmah sualpuhtu cu pakhat lawnglawng a um, nan i bochanmi Moses hi a si.

⁴⁶ Zeitintiah Moses nan zumh ahcun Keimah zong nan ka zumh awk a si, zeitintiah amah nih Keimah kong pei a ṭial cu.

⁴⁷ A ṭialmi nan zumh lo ahcun zeitindah ka bia nan zumh khawh lai?