JOHAN 3 - Laibaibal Thiang (BSI)

¹ Farasih a simi, a min Nikodimu, Judah mi hotu pakhat a um.

² Cupa cu zanah Jesuh sinah a ra i “Rabbi, Pathian sinin a rami cawnpiaktu na si kha kan hngalh, na tuahmi hmelchunhnâk hna hi Pathian umpi lo ahcun ahohmanh nih an tuah kho lai lo,” tiah a ti.

³ Jesuh nih, “Biataktein, biataktein kan chimh, hrinṭhân a si lomi cu, Pathian pennâk a hmu kho lai lo,” tiah a ti.

⁴ Nikodimu nih, “Mi a tar hnu ah zeitindah hrin cu a si khawh lai? A nu pawchungah lut ṭhân in hrin cu a si kho lai maw?” tiah a ti.

⁵ Jesuh nih, “Biataktein, biataktein kan chimh. Thlarau le ti ah hrin lomi cu Pathian pennâk ah a lut kho lai lo.

⁶ Taksa in hrin cu taksa a si, Thlarau in hrin cu thlarau a si.

⁷ Na hrinṭhân hrimhrim lai kan timi hi na khuaruah har hlah.

⁸ Thli cu a duhnâk pauhah a hrâng, a thawng na theih, asinain khawzei in dah a rat i khawzei ah dah a kal lai na chim kho lo. Cubantuk cu Thlarau in hrin cu a si,” tiah a ti.

⁹ Nikodimu nih, “Zeitindah cucu a si khawh lai?” tiah a ti.

¹⁰ Jesuh nih, “Israel cawnpiaktu na si i cucu na hngal lo maw?

¹¹ Biataktein, biataktein kan chimh, kan hngalhmi kha kan chim i, kan hmuhmi kha kan hngalhter, cun kan hngalhtermi nan cohlang duh lo.

¹² Vawlei thil ka chimmi hmanh na zumh lo ahcun, vanlei thil kan chimh tikah zeitindah na zumh khawh kun lai?

¹³ Vanah a um i van in a rungṭummi Mi Fapa dah ti lo, ahohmanh vanah an kai bal lo.

¹⁴ Cun Moses nih ram car i rul a tar bantuk khan, Mi Fapa zong tar a si hrimhrim lai,

¹⁵ Amah a zummi pauh cu lotlau loin zungzal nunnâk an ngei lai.

¹⁶ Zeitintiah Pathian nih vawlei hi a dawt tuk hringhran i a Fapa ngeihchun kha a pêk, Amah a zummi pauh cu lotlau loin zungzal nunnâk an ngei lai.

¹⁷ Zeitintiah vawlei sualphawt awkah Pathian nih a Fapa vawleiah a thlah lo, vawlei hi Amah thawngin khamh a si khawh nâkhnga a thlahmi a si.

¹⁸ Amah a zummi pauh cu sualphawt an si lo; asinain Amah zum lomi pauh cu atu ah sualphawt a si cang, zeicatiah Pathian Fapa ngeihchun a min kha a zumh lo caah.

¹⁹ Hihi sualphawtnâk cu a si, vawlei ah ceunâk a ra i minung nih ceunâk nâkin muihnâk an duh deuh, zeicatiah Ṭhatlonâk an tuah caah a si.

²⁰ Zeitintiah ṭhattlonâk a tuahtu pauh nih ceunâk an huat. Ceunâk zongah an ra lo. Culoahcun a tuahmi a lang lai.

²¹ Asinain thildik a tuahtu pauh cu ceunâk ah an ra tawn, an tuahmi kha Pathian thawngin an tuah tiah a langh khawh nâkhnga,” tiah a ti.

²² Cuhnu ah Jesuh le a lamkaltu kha Judia ramah an kal, cuka ah an sinah a um peng i baptisma a pêk tawn hna.

²³ Johan zong nih titamnâk hmun a si caah Ainon, Salim khua pawngah baptisma a pêk hna. Cun an ra i baptisma a pêk hna.

²⁴ Zeitintiah cu cân ahcun Johan cu thongah an thla rih lo.

²⁵ Johan zultu hna le Judah mi hna cu ṭawlthiannâk kongah an i êl.

²⁶ Johan sinah an ra i, “Rabai, Jordan varal i nan sinah a ummi, a kong na hngalhtermi nih khan baptsima a pêk hna i ngaihmanh mi vialte Amah sinah an kal thluahmah ko,” tiah an ti.

²⁷ Johan nih, “Van lei in pêk an si lo ahcun, minung nih zeihmanh an cohlang kho lo,

²⁸ Krih ka si lo, a hmai i thlahmi ka si, tiah ka chimmi aka theihpitu cu nanmah hi nan si.

²⁹ Mo ngeitu cu a ṭhitmi va a si, asinain mo ngeitu hawi, a bia a rak ngai zungzal tu nih mo ngeitu aw a theih tikah â lawm tawn. Cucaah kei zong kâ lawmhnâk a tling cang.

³⁰ Anih cu a ṭhangcho lai, kei tu cu ka ṭumchuk lai.

³¹ Cunglei in a rami cu mi vialte nâkin cungnung bik a si. Lei in a chuakmi cu leimi a si i lei thil kong a chim tawn. Van in a rami cu zeizong vialte cung i a ummi a si.

³² A hmuh le a hngalhmi kha a hngalhter tawn, asinain ahohmanh nih a hngalhtermi an zum lo.

³³ A hngalhtermi bia a zumtu nih Pathian cu a dikmi a si, tiah a fehter.

³⁴ Zeitintiah Pathian thlahmi nih cun Pathian bia kha a chim tawn, zeitintiah Pathian nih tah ciammam in Thlarau a pe lo.

³⁵ Pa nih Fapa a dawt i a kut ah zeizong vialte a pêk cang.

³⁶ Fapa a zummi pauh nih zungzal nunnâk a ngeih cang, Fapa zumlomi pauh nih nunnâk an hmu lai lo, an cungah Pathian thinhunnâk tu a hmun.