JOHAN 2 - Laibaibal Thiang (BSI)

¹ Ni thum nâkah Galili ram Kana khua ah, ṭhitumhnâk a um, Jesuh nu kha cuka ah cun a um.

² Jesuh le a Lamkaltu kha ṭhitumhnâk ah cun an sawm hna.

³ Cun Misur hang nih a zo hna lo, Jesuh nu nih a sinah, misur hang a dih ai, tiah a ti.

⁴ Jesuh nih, “Minu, nang nih na rak ka ruah piak len a herh maw? Ka cân a tling rih lo,” tiah a ti.

⁵ Anu nih chungṭuan sinah, “Nan sin i a chimmi pauh rak tuah u,” tiah a ti hna.

⁶ Judah mi i thenhhlimhnâk phung bangin lung ralca paruk Galan 25 hrawng a tlummi cuka ah cun a um.

⁷ Jesuh nih, “Hi bêl ah hin ti khahter u” tiah a ti. Cuticun an khahter.

⁸ Cun an sinah, “Atu suak ulaw chungṭuan hotu sinah kalpi u,” tiah a ti i an kalpi.

⁹ Chungṭuan hotu nih ti misur hang i â cangmi cu a tep i khawzeiindah cu thil cu a can ti a hngal lo (asinain sinum tithantu hna nih an hngalh) chungṭuan hotu nih mo ngeitu kha a kawh.

¹⁰ A sinah, “Mikip nih a ṭhami misur hang an phawt hmasa tawn, tampi an din hnu ah a ṭhalo deuhmi an phawt tawn hna, nang nih cun atu tiangin a ṭhami misur hang na ngei ko rih,” tiah a ti.

¹¹ Jesuh nih i hmelchunhnâk tuah a thawknâk hi Galili ram i Kana khua ah a si: A sunparnâk a langhter i a lamkaltu hna nih Amah kha an zumh.

¹² Cu hnu ah Kapernaum khua ah a vung kal, anu le anau le hna le a lamkaltu hna he cuka ah cân tlawmpal an um.

¹³ Judahmi Lanhtâk thô a naicang i Jesuh cu Jerusalem khuaah a kal.

¹⁴ Ṭempal i caw, tuu, ṭhuro zuartu hna le phaisa thlengtu hna chawleh ning a hmuh tikah,

¹⁵ tuknâk hrihrual a ser i tuu le caw kha ṭempal in a ṭhawl hna, phaisa thlengtu hna phaisa kha a thlet i an cabuai kha a thluk hna.

¹⁶ Cun ṭhuro zuartu hna sinah, “Hi hna hi i kalpi u! Ka Pa inn hi chawlehnâk hmunah canter hlah u!” tiah a ti.

¹⁷ A lamkaltu hna nih, “Na inn ca i kâ zuamnâk nih a ka ei dih,” tiah ṭialmi kha an hun hngalh.

¹⁸ Judah mi nih, hi thil hna hi na tuah i hmelchunhnâk zeidah na kan hmuhsak lai? tiah an ti.

¹⁹ Jesuh nih, “Hi inn hi ṭhet ulaw, nithum ah ka sak ṭhân lai,” tiah a leh hna.

²⁰ Judah mi nih, “Hi inn hi kum 46 chung sak a si, nang nih ni thum ah na sak ṭhân lai maw?” tiah an ti.

²¹ Asinain ṭempal a chimmi cu Amah pum kong a chimnâk a si.

²² Cucaah thihnâk in a thawhṭan hnu ah a lamkaltu nih an sin i a rak chimmi kha an hun hngalh ṭhân. Cuticun cathiang le Jesuh chimmi kha an zumh.

²³ Lanhtâk Thô i Jerusalem i a câm lio ah hmelchunhnâk a tuahmi kha an hmuh tikah, mi tampi nih Amin kha an zumh.

²⁴ Asinain Jesuh cu an sinah a sia a rem kho lo, mi vialte a hngalh dih,

²⁵ ahohmanh chimhfian hau loin, minung lungthin i a ummi kha a hngalh dih.