JOHAN 18 - Laibaibal Thiang (BSI)

¹ Jesuh nih cu bia cu a chim dih in a lamkaltu hna he an chuak, Kidron hawrkuang an tan, cuka ah dûm a um i Amah le a lamkaltu hna he an lut.

² A rawitu Judas zong nih cu hmun cu a hngalh. Jesuh le a zultu hna cu cu hmun ah an lengṭi tawn.

³ Cuticun Judas nih ralkap hna le, tlângbawi hna le, Farasih nih an thlahmi kilvengtu hna he a ratpi hna i meiin le meifar le hriamnam hna i put in cuka ah cun an ra.

⁴ Jesuh nih a cung i thil a tlung dingmi vialte hna kha a hngalhchung dih hna i hmai ah tlawmpal ava kal i an sinah, “Ahodah nan kawl?” tiah a ti hna.

⁵ Annih nih, “Nazaret Jesuh” tiah an leh. Jesuh nih, “Amah cu ka si,” tiah a ti. A rawitu Judas zong an sinah a dir.

⁶ “Amah cu ka si,” A ti le cângkâ hnu lei ah tawlh in vawlei ah an tlu.

⁷ Anih nih, “Ahodah nan kawl?” tiah a hal ṭhân hna. Annih nih, “Nazaret Jesuh,” tiah an ti.

⁸ Jesuh nih, “Amah cu ka si tiah kan chimh ko hna cu ta. Keimah nanka kawl ahcun hi hna hi kalter hna u,” tiah a ti hna.

⁹ A rak chim cangmi, “Nangmah nih naka pêkmi pakhat te hmanh ka thlau hna lo,” a timi a tlin nâkhnga.

¹⁰ Simon Peter nih a vainam a zuh i tlângbawi nganbik sinum orhlei hna pet lak in a tuk. Sinum cu Malka a si.

¹¹ Jesuh nih, “Vainam kha a kawngah sanh. Pa nih aka pêkmi hrai hi ding loin maw ka um lai?” tiah a ti.

¹² Cuticun ralkap bu le an hotu le Judah mi ṭempal kilvengtu ralkap hna nih Jesuh kha an tlaih i an ṭêm.

¹³ A hmaisa bikah Anna sinah an kalpi, zeitintiah amah cu cu kum i tlângbawi nganbik Kaifas nupi pa a si caah a si.

¹⁴ Kaifas cu, “Mivialte caah mi pakhat thih a ṭha deuh,” tiah Judah mi ruahnâk cheutu kha a si.

¹⁵ Simon Peter nih Jesuh a zulh i a lamkaltu dang pakhat zong nih a zulh ve. Cu lamkaltu cu tlângbawi nganbik theih-hngalhmi a si. Tlângbawi nganbik inntual tiangin Jesuh kha an zulh.

¹⁶ Asinain Peter cu lêngah kutkâ hramah a dir, cuticun lamkaltu dang tlângbawi nganbik theih-hngalhmi pa cu a va chuak i kutkâ cawngtu a va chimh i Peter cu a luhpi.

¹⁷ Cuticun kutkâ congtu ngaknu nih Peter sinah, “Nang zong hi pa zultu lak i â tel vemi na si lo maw?” tiah a ti. Anih nih, “Ka si lo,” tiah a ti.

¹⁸ Cun sinum le vengtu kha cuka ah an dir i a kih caah meihol in mei an kau i an to. Peter zong â tel ve i dirbu in mei a to ve.

¹⁹ Tlângbawi nganbik nih Jesuh cu a lamkaltu kong le a cawnpiakmi kong a hal.

²⁰ Jesuh nih, “Vawlei theih in langhngan in ka cawnpiak tawn; Sinagog le ṭempal zongah, Judah mi an i butnâk hmunah ka cawnpiak tawn. A thlithup in zeihmanh ka chim lo.

²¹ Zeiruangahdah naka hal? Ka bia a ngaitu hal hna ngat. Cuhna nih ka chimmi an theih ko cu ta,” tiah a ti.

²² Cubia a chim tikah a pawng i a dirmi kilvengtu pakhat nih Jesuh kha a bengh, “Khabantuk khan tlângbawi nganbik na let lai maw?” tiah a ti.

²³ Jesuh nih, “Thilṭha lo ka chim ahcun ka sualnâk ka hngalhter, asinain bia ṭha ka chim ko nain zeicadah naka bengh? tiah a ti.

²⁴ Cuticun Anna nih `êmbu in tlângbawi nganbik Kaiafas sinah a kalter.

²⁵ Simon Peter cu dirin mei a to i a sinah, “Nang zong hi a lamkaltu lak ah â telmi na si lo maw?” tiah an ti. Anih nih, “Ka si lo” tiah a hlawt.

²⁶ Tlângbawi nganbik sinum Peter nih a hna a tukmi rualchan nih, “Dum chungah a pawng i ummi ka hmuhmi kha na si ko lo maw?” tiah a ti.

²⁷ Peter nih a hlawt ṭhân i ar a khuang cawlh.

²⁸ Jesuh cu Kaiafas in in bawi inntual rawnah an kalpi ṭhân, cucu zingka te a si. Annih cu bawi inah an lut lo, an luh ahcun an thur lai i Lanhtâk Thô rawl an ei kho lai lo.

²⁹ Pailat cu a va chuak i an sinah, “Hi pa ralchanhnâk ah zeibantuk sual puhnâk he dah nan rat?” tiah a ti hna.

³⁰ Annih nih, “Hipa nih sualnâk tuah hlah sehlaw na sinah kan ratpi hnga lo,” tiah an ti.

³¹ Pailat nih, “I kalpi ulaw, nan phung ningin bia cu va ceih ko ngat u,” tiah a ti. Judah mi nih, “Kan phungningah ahohmanh thah khawh an si lo,” tiah an ti.

³² Cucu zeibantuk set in dah a thih lai tiah Amah Jesuh nih a rak chimning te i a tlin khawh nâkhnga caah a si.

³³ Pailat cu tualrawn ah a va kal ṭhân, Jesuh cu a kawh i, “Judah Siangpahrang na si maw?” tiah a ti.

³⁴ Jesuh nih, “Hihi nangmah lungchuak chimmi maw a si? mi nih ka kong an in chimhmi ruang i na chimmi dah?” tiah a ti.

³⁵ Pailat nih, “Kei hi Judah mi ka si maw? Na miphun le tlângbawi hna nih ka sinah an in chanhmi na si. Zeithil dah na tuah?” tiah a ti.

³⁶ Jesuh nih, “Ka pennâk cu hi vawlei pennâk hi a si lo. Ka pennâk cu hi vawlei pennâk hi sisehlaw, Judah mi hna kut i ka phâk nâkhnga lo ka sinum hna nih an doh ve hnga. Asinain ka pennâk cu hika ah a si lo,” tiah a ti.

³⁷ Pailat nih, “Cuti a si ahcun, Siangpahrang na si ko lo maw? tiah a ti. Jesuh nih, “A dikmi na chim. Siangpahrang ka si,” Biatak chim le hngalhter hi vawlei ka chuahchan le ka rat chan a si. Biatak i a ummi pauh nih ka aw hi a ngaih tawn” tiah a ti.

³⁸ Pailat nih, “Biatak cu zeidah a si?” tiah a ti. Cu bia a chim dih in, Judah mi sinah a va chuak ṭhân i “A sualnâk zeihmanh ka hmu lo,” tiah a va chim.

³⁹ Lanhtâk Thô ah thongtla kan chuah piak hna nâkhnga phung nan ngei. Judah Siangpahrang hi in chuah piak hna ninglaw nan duhmaw? tiah a ti.

⁴⁰ An dihlak in an au ṭhân i, “Hi pa cu sihlahseh, Barabbas tu si deuh seh,” tiah an ti. Barbbas cu damiah a si.