JOHAN 13 - Laibaibal Thiang (BSI)

¹ Cuticun Lanhtâk Thô hlanah Jesuh nih vawlei hi chuah takin Pa sinah a kal cân a phâncang ti kha a hngalh, vawlei i a ummi a dawtmi ami le hna cu, a dongh tiangin a dawt hna.

² Zanriah an ei dih in khuachia nih Simon fapa Judas Iskoriot lungthin ah rawi dingin rian a rak ṭuan cang.

³ Jesuh nih a kutah Pa nih thil vialte a pêk cangnâk le, Pathian sinin a rat bangin Pathian sinah a kir ṭhân lai ti kha a hngalh,

⁴ zanriah an ei khawh in a tho i angki fual phoih in hmaihmawhnâk puan a lak i â venh.

⁵ Cuhnuah khengpi ah ti a thlet i lamkaltu ke kha a ṭawl hna, cun hmaihnawhnâk puan â venhmi in a hnawh hna.

⁶ Simon Peter sinah a ra i anih nih, “Bawipa, ka ke na ṭawl lai maw?” tiah a ti.

⁷ Jesuh nih, “Ka tuahmi hi atu ah cun na theithiam rih lai lo. Asinain hnu deuh ah na theihthiam te lai,” tiah a ti.

⁸ Peter nih, “Ka ke na ṭawl hrim lai lo,” tiah a ti. Jesuh nih, “Kan ṭawl lo ahcun ka sinin covo zeihmanh na ngei lai lo,” tiah a ti.

⁹ Simon Peter nih, “Bawipa, cutiasiahcun ka ke lawng si loin ka kut le ka lu zong,” tiah a ti.

¹⁰ Jesuh nih, “Â khawlh cangmi cu an ke dah ti lo cu ṭawl a herh ti lo, a thiang dih ko, nannih cu nan thiang- nan dihlak bel si loin,” tiah a ti.

¹¹ Zeitintiah a rawitu ding kha a hngalh chung cang, cucaah, “Nan dihlak cun nan thiang lo,” a tinâk cu a si.

¹² Cubangin anke a ṭawl dih cun, â chiahmi a thil kha i lâk in a thu ṭhân i an sinah, “Nancung i ka tuahmi hi a sullam nan hngal maw?

¹³ Nannih nih Cawnpiaktu le Bawipa nan ka ti, a ṭha ko, zeitintiah ka si taktak ko.

¹⁴ Keimah Bawipa le Cawnpiaktu hmanh nih nan ke ka ṭawl ahcun, nannih zong nan ke nan i ṭawl piak awk a si.

¹⁵ Zeitintiah nan sin i ka tuah bantukin nan tuah nâkhnga zohchunh awk kan tuah piak hna.

¹⁶ Biataktein biataktein, kan chimh hna. Sinum cu a pu nâkin a ngan deuh lo. Lamkaltu tu zong a fialtunâk in a ngan deuh lo.

¹⁷ Hi thil hna hi nan hngalh ahcun, mithluachuak nan si lai.

¹⁸ Nan dihlak kong ka chim lo. Ka thimmi cu ka hngalh. Asinain cathiang nih, “Ka changreu â hrawmmi nih, a kedil ka cungah a chuan, tiah a chimmi tlinnâk ding caah a si.

¹⁹ A cân a phâk hlan in kan chimh hna, a phâk tikah keimah hrimhrim ka si tiah nan zumh khawh nâkhnga.

²⁰ Biataktein, biataktein, kan chimh hna, ka thlahmi a rak cohlangtu pauh cu keimah cohlangtu a si. Aka cohlangtu pauh cu aka thlahtu cohlangtu a si.” tiah a ti.

²¹ Jesuh nih cu bia a chim dih in thlarau in a ngaih a chia ngaingai i, “Biataktein, biataktein, kan chimh hna, “Nanlak i mi pakhat nih a ka rawi lai,” tiah a ti.

²² Lamkaltu hna nih a ho kong dah a chim ti zong hngal loin, anmah le anmah an i zoh.

²³ A lamkaltu lakah pakhat, Jesuh nih a dawtmi kha Jesuh ṭang hngatchan in a ṭhu.

²⁴ Simon Peter nih Amah kha a ho kong dah a chim van hal tuah, tiah mithmai in a fial.

²⁵ Cuticun anih cu Jesuh ṭâng leiah a hei sawn i “Bawipa, ahodah a si lai? tiah a ti.

²⁶ Jesuh nih a leh i “Changreu pel ka ciah lai i ka pêkmi a si lai” tiah a ti. Cuticun changreu pel cu a lâk i a ciah hnuah Simon fapa Judas Iskariot kha a pêk.

²⁷ Cubangin changreu pel a pêk hnu ah a chungah Satan a lut cawlh. Jesuh nih a sinah, “Na tuah ding cu khulrangin tuah,” tiah a ti.

²⁸ Asinain cabuai kulhtu midang nih a chimmi sullam cu an hngal lo.

²⁹ Zeitintiah cheukhat nih Judas cu phaisa bawm kengtu a si ruangah, Jesuh nih Thô ca i a herhmi cawk le, mi sifak hna sinah thil zei maw pêk a fial tiah an ruah.

³⁰ Anih cu changreu pel a co hnu in a chuak cawlh. Cu cân cu zân a si cang.

³¹ A chuah hnu ah Jesuh nih, “Atu ah Mi Fapa hi thangṭhat in a um, Amah ah hin Pathian zong thangṭhat in a um.

³² Amah in Pathian kha thangṭhat in a um ahcun, Pathian zong nih Amah hrimhrim in a thangṭhat lai, cun chikkhat te ah a thangṭhat lai.

³³ Nau le hna, cân tawite nan sinah ka um rih lai. Nannih nih nan ka kawl lai; Judah mi hna sinah, ‘Ka kalnâk ah nan ra kho lai lo,’ tiah ka rak chim cang bang khan, atu zongah kan chimh ṭhân hna.

³⁴ Nawlpêk thar kan pêk hna; pakhat le pakhat i daw u, keimah nih kan dawt hna bantukin pakhat le pakhat i daw u.

³⁵ Pakhat le pakhat nan i dawt ahcun, mi vialte nih aka zultu nan si kha an hngalh lai,” tiah a ti.

³⁶ Simon Peter nih, “Bawipa, khuazeiahdah na kal lai?” tiah a ti. Jesuh nih, “Atu ah cun ka kalnâk ah naka zul kho lai lo, hnu deuh ah naka zulh khawh te lai,” tiah a ti.

³⁷ Peter nih, “Bawipa, zeiruangahdah atu zongah kan zulh khawh lai lo? Nangmah ruangah ka nunnâk zong ka pêk lai,” tiah a ti.

³⁸ Jesuh nih, “Keimah ruangah na nunnâk na pêk lai maw? Biataktein, biataktein, kan chimh, voithum naka hlawt hlan ah cun ar a khuang lai lo,” tiah a ti.