JOHAN 12 - Laibaibal Thiang (BSI)

¹ Lanhtâk Thô caah niruk lawng â duh lio ah, Jesuh cu thihnâk in a thawhtermi Lazaruh umnâk Bethani khua a rak phân.

² Cuka ah zanriah an timh piak, Marta nih rawl a chuang i Lazaruh tu cu cabuai i rawl a dumpitu pakhat ah a si.

³ Cuticun Mary nih a man a fak ngaimi spiknard sathau rimhmui mi thawlkhat â rakput i Jesuh ke a thuh i a sam in a hnawhpiak i a rimin in a khahter.

⁴ Simon fapa Judah Iskariot a lamkaltu pakhat, Amah rawituding nih,

⁵ “Zeiruangahdah hi rimhmui mi sathau hi dina zathumah zuar in mi sifak an pêk deuh hnga lo?” tiah a ti.

⁶ Mi sifak zawn a ruah ruang i a chimmi a si lo, mifir a si caah phaisa zal kengtu a si i a chung ummi kha a lak tawn caah a si.

⁷ Jesuh nih, “Amah tuah in tuah ko seh, phum ka si te lai ni caah â rak chiahmi a si,” tiah a ti.

⁸ Zeitintiah mi sifak cu nan sinah a um pengmi an si, kei tu cu nan sinah umpeng ding ka si lo,” tiah a ti hna.

⁹ Judah mi tampi nih cuka ah a um ti kha an hngalh i an ra. Jesuh lawng an rat hnawh lo i mi thi a thawhtermi Lazaruh hmuh an duh ruang zongah a si.

¹⁰ Tlângbawi hna nih amah ruanghah mitampi nih an kaltâk hna i Jesuh an zumh ruangah,

¹¹ Lazaruh zong thahchih dingin khua an khâng.

¹² A thaizing thô i a rami mi tampi nih Jesuh cu Jerusalem ah a ra lai tiah an theih tikah,

¹³ tûm hnah i put in Amah don awkah an kal, “Hosana, Bawipa min i a rami cu thangṭhat si ko seh,” tiah an au.

¹⁴ Cuticun Jesuh nih lâ fa a hmuh i a cungah â cit:

¹⁵ “Ṭihhlah, Zion fa nu; zohmanh, na Siangpahrang cu lâ fa cungah i cit in a ra lai,” tiah ṭialmi bangin.

¹⁶ Cuthil cu a hramthawk ah a lamkaltu hna nih an theithiam lo nain Jesuh thangṭhat a si hnu ah, cu bia cu ṭial a rak si i a cungah a tlungmi a si, tiah an hun hngalh ṭhân.

¹⁷ Lazaruh thlân in a auh i thihnâk in a thawhter lio i a sinah a ummi mizapi nih khan cucu an hngalhpi.

¹⁸ Zeitintiah cu hmelchunhnâk cu a tuah taktak ko ti kha an hngalh caah mizapi nih Amah an va donnâk kha a si.

¹⁹ Farasih hna nih anmah le anmah an i caih i, “Zohhmanh u, zeihmanh nan tuah kho ti lo hih. Zohhmanh u, vawlei nih Amah an zulh cang hih!” tiah an ti.

²⁰ Thô lio i Pathian biak awk ah â pummi hna lakah, Grik mizei maw an um ve.

²¹ Cu hna cu, Galili ram Bethsaida khuami Filip sinah an ra i, “Ka pu, Jesuh hmuh kan duh” tiah an ti.

²² Filip nih Adria a hun chimh i Andria le Filip nih Jesuh an rak chimh ṭhân.

²³ Jesuh nih annih cu, “Mi Fapa, thangṭhat i a um cân cu a phân cang.

²⁴ Biataktein, biataktein kan chimh hna, buhfang vawlei ah a tlak i a thih ta lo ahcun, amah lawngin a um peng, a thih ahcun thei tampi in a tlai tawn.

²⁵ A nunnâk a dawmi nih a hloh tawn. Hi vawlei nunnâk a huami nih zungzal nunnâk an ngeih tawn.

²⁶ Ka rian a ṭuanmi pauh nih ka zul seh. Ka umnâk hmun pauh ah ka rianṭuantu zong a um awk a si. Ka rian a ṭuntu pauh cu ka Pa zong nih a thangṭhat ve lai.

²⁷ Atu ah hin ka nunnâk a ngaih a chia, zeidah ka chim kun lai? Ka Pa, hi cân ah hin ka khamh ko ka ti ko lai maw? Asinain hihi ka rat chan a si.

²⁸ “Ka Pa, na min thangṭhat tuah,” tiah a ti. Vanin aw a rak chuak i, “Ka thangṭhat cang, Ka thangṭhat rih ko lai,” tiah a ti.

²⁹ A pawng i a dirmi zapi hna nih an theih i khuari a si tiah an ti. Midang nih, ‘Vanmi nih Amah a rak chawnh a si cu,’ tiah an ti.

³⁰ Jesuh nih a leh hna i, “Cu aw cu ka ca i a chuakmi a si lo. Nan caah a chuakmi a si, tiah a ti.

³¹ Atu ah hi vawlei kong hi ceih lio a si, atu ah hi vawlei bawi hi hlawnh a si lai.

³² Cun kei hi, vawlei in thlai ka si ahcun mi vialte keimah lei ah ka hnuh hna lai” tiah a ti.

³³ Cubia cu zeibantuk thihnâk phun in dah a thih lai tiah hngalhternâk caah a chimmi a si.

³⁴ Mizapi nih, “Krih cu zungzal i a um ding a si, tiah nawlbia cauk ah kan theih, zeicadah ‘Mi fapa hi tar in a um lai,’ tiah na chim khawh? cu Mi Fapa cu a hodah a si,” tiah an leh.

³⁵ Jesuh nih, “Ceunâk hi cân tawite nan sinah a um. Ceunâk nan ngeih lio ah leng u. Culoahcun muihnâk nih an phâk sual hna lai. Khuamui ah mi a kal ahcun a panhmi hmun zong a hngal lo.

³⁶ Ceunâk nan ngeih lio ah hin ceunâk hi i rinh u. Ceunâk fa le nan si khawh nâkhnga,” tiah a ti. Cu bia cu Jesuh nih a chim: Cun a kaltâk hna i an sin in â thup.

³⁷ An hmai ah khuaruahhar hmelchunhnâk kha tuah hmanhsehlaw, Amah kha an zum hlei lo,

³⁸ Cucaah Profet Isaiah nih, “Bawipa kan chimmi ahonihdah a zumh? BAWIPA kut cu ahosinah dah a langh? ti i a chimmi a tlinnâk caah a si.

³⁹ Cucaah an zumhlonâk cu a si. A chan zong Isaiah nih a rak chim ṭhân;

⁴⁰ “Anmit a cawtter i an lungthin a hahter, culoahcun an mit in a hmuh lai i an lungthin in an theihthiam lai i ka rak damter awkah an rak i mer sual lai,” tiin.

⁴¹ Isaiah nih a sunparnâk a hmuh i a konglam a rak chim caah cuthilhna cu a rak chim.

⁴² Asinain hotu hna lak zongah mitampi nih Amah an zumh. Asinain Farasih hna ruangah Amah an zumhnâk cu an phuang lo. Culoahcun Sinagog in ṭhawl an si lai.

⁴³ Zeitintiah Pathian thangṭhatmi sinâk in minung thangṭhatmi si kha an thaihchan deuh.

⁴⁴ Cuticun Jesuh a au i, “Aka zummi pauh, keimah aka zumh si loin, aka thlahtu a zumh a si.

⁴⁵ Aka hmumi pauh cu aka thlahtu hmu a si.

⁴⁶ Aka zumtu cu mui ah a um peng nâkhnga lo vawlei ceuhtu dingah ka ra.

⁴⁷ Mi zei pauh nih ka chimmi bia theiin, zumlo hmanhsehlaw, keimah nih thiamlo ka coter lo, zeitintiah vawlei thiamlo coter dingah si loin vawlei khamh dingah a rami ka si.

⁴⁸ Mi zei pauh nih an ka hlawt i ka chimmi an pawm lo ahcun thiamlo cotertu ding a ngei. Ka chim cangmi bia nih khan ni dongh ni ah thiamlo a coter te lai.

⁴⁹ Zeitintiah keimah nawl i a chimmi ka si lo. Pa, aka thlahtu cu ka chim ding le ka phuan ding bia aka petu a si.

⁵⁰ Aka pêkmi bia cu zungzal i nunnâk a si kha ka hngalh. Cucaah ka chimmi hna hi aka thlahtu Pa nih aka chimh ning tein ka chimmi a si.