JOHAN 11 - Laibaibal Thiang (BSI)

¹ Mary le a unau nu Marta umnâk Bethani khua ah mi zaw pakhat Lazaruh a um.

² Mizaw Lazaruh cu Mary ṭapa a si, Mary cu hlan i Bawipa ke i rimhmui sathau a rak thuh i a samin a hnawh piaktu kha a si.

³ Cucaah a far le hna nih, “Bawipa, ngaihhmanh, na dawtmi kha a zaw, tiah va chim dingin mi an thlah.

⁴ Jesuh nih cucu a theih tikah, “Hi zawtnâk hi thihnâk ding a si lo, Pathian sunparnâk dingtu a si, Pathian Fapa cu hiruangah hin thangṭhat i a um khawh nâkhnga,” tiah a ti.

⁵ Jesuh nih Marta le a nau Mary le Lazaruh kha a dawt hna.

⁶ Cuticun a zaw ti a theih hnu ah a umnâk hmunah ni hnih a um rih.

⁷ Cuhnuah a lamkaltu sinah, “Judia ramah kal u sih,” tiah a ti.

⁸ Lamkaltu hna nih, “Rabbi, tuanah Judah mi hna nih lungin cheh an in timh kha; cubu in maw na kal ko rih lai?” tiah an ti.

⁹ Jesuh nih, “Nikhat ah suimilam hleihnih a ceu lo maw? Chun ceu i mi a kal ahcun vawlei ceu kha a hmuh caah â chuih bal lo.

¹⁰ Asinain zanah mi a lên ahcun amah ah ceunâk a um lo ca ah a sawn tawn,” tiah a leh hna..

¹¹ Cubia cu a chim dih in, “Kan hawi Lazaruh â hngilh, a hlauh awkah ka kal lai,” tiah a ti.

¹² A lamkaltu hna nih, “Bawipa, â hngilh ahcun, â hlau te ko lai,” tiah an ti.

¹³ Asinain, Jesuh nih a thihnâk kong a chimmi a sinain annih nih â hngilh i â dinmi ah an ruah.

¹⁴ Cuticun Jesuh nih fiang tein, “Lazaruh a thi.”

¹⁵ Cuka i ka rak um lo cu nanmah ruah ah kâ lawm ko, nan zumh khawh nâkhnga. Zeasihmanh ah a sinah kal u sih,” tiah a ti.

¹⁶ Thomos, Faphir tiah kawhmi nih, “A sin i kan thih khawh nâkhnga, kal tuah u sih,” tiah a ti.

¹⁷ Jesuh a va phâk tikah, thlân ah nili a rak um cang.

¹⁸ Bethani khua cu Jerusalem pawngah a si i meng hnih hrawng lawng a si.

¹⁹ An ṭapa ruangah Mary le Marta cu nu tampi nih an rak ṭhutpi hna.

²⁰ Marta nih Jesuh a ra ti a theih tikah chikkhat te ah Amah don awkah a tho i a kal. Mary tu cu inah a ṭhu ko rih.

²¹ Marta nih Jesuh sinah, “Bawipa hika ah rak um law ka ṭapa a thi hnga lo.

²² Asinain atu zongah Pathian sin i na halmi pauh an pêk ko lai tiah ka zumh,” tiah a ti.

²³ Jesuh nih, “Na ṭapa a tho ṭhân lai,” tiah a ti.

²⁴ Marta nih a sinah, “Nidongh ni i thawhṭhannâk ah a thoṭhân lai ti cu ka hngalh,” tiah a ti.

²⁵ Jesuh nih, “Thawhṭhannâk le nunnâk cu keimah hi ka si: Aka zummi pauh cu thi hmanhsehlaw, a nung lai.

²⁶ Nungin aka zummi pauh cu, a thi ti lai lo. Hi bia hi na zum maw?” tiah a ti.

²⁷ Anih nih, “Ka zumh, Bawipa, Krih Pathian Fapa, vawlei i a ra dingmi na si kha ka zumh,” tiah a ti.

²⁸ Cu bia a chim dih in a kal i a nau Mary cu a thli in a va kawh, “Cawnpiaktu a rak phân i an kawh dah kaw,” tiah a va ti.

²⁹ Anih nih a theih le cângkâ a tho cawlh i a sinah a kal.

³⁰ Jesuh cu khua ah a lut rih lo, Marta nih a va hmuh nâkah khan a um ko rih.

³¹ Cun a ṭhutpitu, in chung i a ummi Judah mi hna nih, Mary a thawh i lêng i a chuah an hmuh tikah, “Thlân ah ṭap dingin a kal” tiah an ruah i an zulh.

³² Cuticun Mary cu Jesuh umnâk a va phân i a hmuh tikah, A ke hramah a bawk i, “Bawipa hika ah rak um law, ka ṭapa a thi hnga lo,” tiah a ti.

³³ Jesuh nih Mary le a zultu Judah mi an ṭah kha a hmuh tikah, a thlarau ngaihchia in a hrum ai.

³⁴ “Amah cu khuazeiahdah nan phum?” tiah a ti. Annih nih, “Ra law, zohhmanh,” tiah an ti.

³⁵ Jesuh a ṭap.

³⁶ Judah mi nih, “Zohmanh u, zeitlukindah a dawt!” tiah an ti.

³⁷ Mi cheukhat nih, “Mit caw, deiter khotu pa nih hin hi pa zong hi thi loin a kilveng kho lo maw? tiah an ti.

³⁸ Jesuh cu a hrum ai thlauhmah i thlân cu a phân. Lungkua a si i lung in kharmi a si.

³⁹ Jesuh nih, “Lung hi ṭhial u,” tiah a ti. A thimi farnu Marta nih, “Bawipa, atu ah cun a thunam tuk cang lai, a thihnâk nili a si cang” tiah a ti.

⁴⁰ Jesuh nih, “Na zumh ahcun Pathian liannganâk nahmuh lai, kan ti lo maw?” tiah a ti.

⁴¹ Cuticun mithi an chiahnâk hmun i lung cu an lak i Jesuh cu vanlei zoh in, “Ka Pa, ka bia na ngaih ruangah na cungah kâ lawm.

⁴² Ka bia na ngaih zungzal ti ka theih ca zongah kâ lawm. Hika i a dirmi mizapi hna ruangah cucu ka chim, Naka thlah tiah an zumh khawh nâkhnga,” tiah a ti.

⁴³ Cubia cu a chim dih in, aw thang ngaiin a au i “Lazaruh, rak chuak tuah,” tiah a ti.

⁴⁴ Mithi cu akut le ake thlânpuan i tuambu in a rak chuak, a hmai zong puan i tuam a si. Jesuh nih, “Phoih ulaw, kalter u,” tiah a ti.

⁴⁵ Cuticun Mary ṭhutpitu, Jesuh tuahmi a hmutu Judah mi tampi nih Jesuh cu an zumh.

⁴⁶ Asinain cheukhat cu Farasih hna sinah an kal i Jesuh tuahmi thil kha an va chimh hna.

⁴⁷ Cuticun tlângbawi le Farasih hna nih biaceihtu kha an auh hna i, “Zeitindah kan tuah lai?” Hi pa nih hin hmelchunhnâk tampi a tuah cang.

⁴⁸ Hibangin kan zohsawh ko ahcun, mi vialte nih Amah an zumh lai, Rommi an ra lai i kan hmun le kan miphun hi an kan lâkpiak ko lai,” tiah an ti.

⁴⁹ An lakah mi pakhat Kaiafas, cu kum i tlângbawi nganbik nih, “Zeihmanh nan hngal lo.

⁵⁰ Kan miphun dihlak a rawhral nâkhnga lo mi vialte caah mi pakhat thih kan caah a ṭha timi zong nan ruat fawn lo,” tiah a ti.

⁵¹ Cubia cu amah lungchuak chimmi zong a si lo, tlângbawi nganbik a si kum a si, cucaah an miphun dihlak ca i Jesuh a thihnâk ding a rak chimchungnâk tu a si,

⁵² Cu miphun hna ca lawng ah a si lo Pathian fale vawlei khuazakip i â ṭhekmi vialte bukhat i pumh an si lainâk ca zongah a si.

⁵³ Cucaah cu ni thawk in Amah thahnâk dingah khua an khâng leng mang.

⁵⁴ Cuticun Jesuh cu Judah mi hna sinah langhngan in a tlonglêng ti lo, cuka hmun in ramcar pawng i a ummi Efraim khua an timi ah a kal, cuka ah a lamkaltu hna he sau nawn an um.

⁵⁵ Cun Judah mi Lanhtâk Thô a nai cang i Lanhtâk Thô hlanah i thenh dingin mi tampi khuate lei in Jerusalem ah an kal.

⁵⁶ Cuticun Jesuh an kawl i ṭempal vêlchum ah a ummi hna nih, “Thô lio ah hin a ra ko lai lo maw? zeitindah nan ruah? tiah an i ceih.

⁵⁷ Tlângbawi hna le Farasih hna nih Amah cu an tlaih khawh nâkhnga a umnâk a hngaltu pauh nih, an sinah an chim zau lai, tiah nawlpêk an chuah cang.