JOHAN 10 - Laibaibal Thiang (BSI)

¹ “Biataktein, biataktein kan chimh hna, tuu kawm chungah innkâ in a lut lo i lamdang i a lutmi pauh mifir le damiah an si.

² Asinain innkâ i a lutmi pauh cu tuukhal an si.

³ Innkâ congtu nih a rak onpiak i tuu nih a aw an theih, a tuu kha an min in a auh hna i a kalpi tawn hna.

⁴ A tuu a chuahter hna i an hmaiah kal in a tuu nih a aw an theih caah an zulh tawn.

⁵ Asinain midang cu an zul lai lo, a aw an theih lo caah an zâmtâk deuh lai,” tiah a ti.

⁶ Jesuh nih hi tahchunhnâk hi a hman, asinain zeibiadah a chim ti an hngal kho lo.

⁷ Jesuh nih an sinah a chim ṭhân i, “Biataktein, biataktein kan chimh hna. Keimah hi tuuluhnâk innkâ ka si.

⁸ Ka hmai i a rami vialte kha mifir le damiah an si, cucaah tuu nih an aw an thei lo.

⁹ Kei cu innkâ ka si. keimah i a lutmi pauh cu khamh in a um lai. A lut in a chuak lai i eiawk a hmuh lai.

¹⁰ Mifir cu fir awk le, thah awk le, hrawh awkah dah ti lo cun a ra bal lo. Kei cu nun anngeih i duhdim tein an ngeih nâkhnga ka ra.

¹¹ Tuukhal ṭha ka si. Tuukhal ṭha nih a tuu caah a nunnâk a pêk tawn.

¹² Sihmanhsehlaw man phalhmi tuukhal, tuukhal taktak a si lomi, tuu ngeitu zong a si lomi nih, cinghnia a rat a hmuh tikah tuu a zâmtâk tawn. Cuticun cinghnia nih tuu a seh i an i ṭhek tawn.

¹³ Man phalhmi a si caah, tuu kha a conghrâm hna lo i a zâmtâk tawn hna.

¹⁴ Tuukhal ṭha ka si; ka tuu ka hngalh hna i ka tuu zong nih anka hngalh.

¹⁵ Pa nih aka hngalh bangin, kei zong nih Pa ka hngalh i tuu caah ka nunnâk ka pêk.

¹⁶ Cun hi tuukawm chung ta a si lomi, tuu dang zong ka ngei, annih zong ka ratpi hna lai, ka aw zong an theih lai i tuukhal pakhat le bukhat in an um lai.

¹⁷ Lâk ṭhân dingin ka nunnâk ka pêk caah hin Pa nih a ka dawt.

¹⁸ Ahohmanhnih anka lâkpiak lai lo, keimah nawl in ka pêkmi a si. Pe kho ka si i la ṭhân kho zong ka si. Hi nawlpêk hi ka Pa sinin ka hmuhmi a si.

¹⁹ Cu bia a chimmi ruangah Judah mi hna lakah i ṭhennâk a um ṭhân.

²⁰ Mitampi nih, “Khuachia nih a tuah i a mawlhmi a si, zeiruangahdah a bia nan ngaih?” tiah an ti.

²¹ Midang nih, “Hi bia hi khuachia tuahmi bia a si lo, khuachia nih mitcaw khua a hmuhter kho maw?” tiah an ti.

²² Jerusalem ah pêkchanhnâk Thô a um i cucu khuasik cân a si.

²³ Jesuh cu ṭempal chung i Solomon deu an timi ah â chawk.

²⁴ Judah mi hna nih an rak kulh i, “Zeicandah lung awṭawm in nakan umter lai? Krih na si ahcun fing tein kan chim lawlaw,” tiah an ti.

²⁵ Jesuh nih, “Kan chimh cang hna nain nan zum lo. Ka Pa min i ka tuahmi nih ka konglam a hngalhter cang.

²⁶ Asinain nan zum lo, nan sin i ka chim cang bantukin, ka tuu nan si lo caah a si.

²⁷ Ka tuu nih ka aw an theih, annih cu ka hngalh hna i an ka zulh.

²⁸ An sinah zungzal nunnâk ka pêk i an tlau hrimhrim lai lo. Ka kut chungin ahohmanh nih an ka chut kho lai lo.

²⁹ Anmah aka petu ka Pa cu mi vialte nâkin a ngan deuh, ahohmanh nih ka Pa kut in an chut kho lai lo.

³⁰ Kei le ka Pa cu pumkhat kan si.

³¹ Cuticun Judah mi hna nih a chehnâk dingah lung an char ṭhân.

³² Jesuh nih, “Ka Pa sinin rianṭha tampi kan hmuhsak cang hna. Zeiruang bik ah dah lungin cheh nan ka timh?” tiah a ti hna.

³³ Judah mi hna nih, “Rian ṭha ruangah lung in cheh kan in tim lo; (Pathian)cawhdehnâk bia ruangah le, minung na si ko nain Pathian ah nâ canter ruangah lung cheh kan in timhnâk cu a si,” tiah an ti.

³⁴ Jesuh nih, “Nan nawlbia cauk ah, ‘Pathian nan si ka ti,” tiah ṭial a si lo maw?

³⁵ Pathian bia a phâknâk hmanh pathian hna ti a si ahcun (cathiang hrawhkhawh a si fawn ṭung lo)

³⁶ Pa nih a thleidanmi le vawlei i a thlahmi nih, ‘Pathian Fapa ka si,’ ka ti rungah, (Pathian) cawhdehtu nanka ti kho lai maw?

³⁷ Ka Pa rianṭuantu ka si lo ahcun, ka zum hlah u;

³⁸ Sihmanhsehlaw ṭuntu ka si ahcun, keimah nanka zumh lo hmanh ah, ṭuanmi tal hi zum u. Pa keimah ah a um, ti le, kei zong Pa ah ka um ti nan hngalh khawh nâkhnga” tiah a leh hna.

³⁹ Cucaah tlaih an timh ṭhân, asinain an kut in lodiam â zuk.

⁴⁰ Jordan tiva ral, tuanah Johan nih Baptisma a rak pêknâk lei ah lo diam a kal i cuka ah sau nawn a um.

⁴¹ Cun mitampi a sinah an ra i, “Johan nih hmelchunhnâk zeihmanh a tuah lo nain, Amah kong Johan chimmi vialte kha a dik dih ko,” tiah an ti.

⁴² Cuka ah mi tampi nih Amah kha an zumh.