JEIM 5 - Laibaibal Thiang (BSI)

¹ Nannih mirum hna, nan cung i a tlung hngami harnâk ruangah ṭap ulaw, ai len u.

² Nan rumnâk a rawk dih i nan thilri hna rungrul nih an ei dih.

³ Nan sui le nan ngun vialte cirik nih an ei dih. Cirik ei timi cu thiamlo nan comi hngalhpitu a si, nan taksa zong meikangh bantukin a ei dih lai. Ni hmadung caah ro nan pumhmi a si.

⁴ Asi, nan lo i facang ṭuan i â hlawhmi hna, nan hlen hna i nan lakpiakmi hna kha, an rak au, facang ṭuntu hna vansannâk aw thawng zong Ralkapbu Bawipa hnâ a phân cang.

⁵ Vawlei ah nuam ngaiin nan nung, nuam nan tawl i thahnâk ni caah nan lung nan puam termi a si.

⁶ Miding cu thiamlo co terin nan thah, anih nih an ralchanh hna lo.

⁷ Cucaah unau hna, Bawipa a rat hlan lo, lungsau in um ko u. Zohhmanh u, longeitu nih, ruah ti a tla hmasa le a hmadung kha a hmuh hlantiang lungsau in vulei theipar kha a hngah tawn.

⁸ Nannih zong lungsau in um tuah u, nan lungthin fehter u. Bawipa rat cân a nai cang.

⁹ Unau hna, zailen hlah u, thiamlo nan co sual lai. Ngaihmanh u, biaceihtu cu innkâ hramah a dir cang.

¹⁰ Ka unau hna, Bawipa min in biachimtu profet hna teminnâk le an lungsauning kha i zohchunh u.

¹¹ Asi, a dongh tiang ing khomi hna cu mi thluachuak ah kan ruah hna. Job lungsauning kha nan hngalh, Bawipa nih a donghnâk i a tuahmi zong kha nan hngalh, kha thil ah khan Bawipa cu zângfahtu le velngeitu a si zia kha fiang tein a lang.

¹² Asinain cu vialte cungah ka unau hna, chiat i serh hlah u. Vanchalh in maw, leichalh in maw, thil dangdang chalh zongin chiat i serh hlah u. Asi, nan timi cu, asi, siseh law, A silo, nan timi cu, a silo, si seh. Culoahcun thiamlo a comi nan si sual lai.

¹³ Nanlakah fahnâk a tuarmi nan um maw? Thlacam seh. Â lawmmi nan um maw? Thangṭhat hla sa seh.

¹⁴ Nanlakah mi zaw an um maw? Kawhhran upa au hna sehlaw, annih nih Bawipa min in sathau thuh in a cungah thlacam hna seh.

¹⁵ Cun zumhnâk i thlacamnâk nih, mi zaw kha a damter lai, cun Bawipa nih a nih cu a thawhter lai. Sualnâk a rak tuah cangmi kha, ngaihthiam a si lai.

¹⁶ Damter nan si nâkhnga, nansualnâk phuang ulaw, thla i campiak lengmang u. Miding nih biatak tein thla a cammi cu san a tlai i thil a tuah kho ngai ngai.

¹⁷ Elijah cu kanmah bantuk minung a si ve. Ruah sur lo dingin biatak tein thla a cam, cuticun kha ka hrawng ramah khan kum thum le a cheu chung ruah a sur lo.

¹⁸ Cun thla biatak tein a cam ṭhân i vannih ruah a surter i lei nih theipar a chuahter ṭhân.

¹⁹ Ka ule nau hna, nan lakah mizei pauh hi biatak chungin a tlau ahcun, mizei maw nih kirter ṭhan sehlaw,

²⁰ lamtlaumi misual kirtertu nih cun thihnâk chungin a thlarau a khamh lai i sualnâk tampi khuhpiak a si lai ti kha hngalhter si seh.