JEIM 4 - Laibaibal Thiang (BSI)

¹ Nanlakah dohdalnâk le sikvelhnâk hna kha khuazeiindah a rat? Nomhhnaihnâk nan duhtuknâk le nan chung i dohnâk a um tawnmi chungin a chuakmi a si lo maw?

² Nan duh nain nan ngei lo. Lai nan nawng, nan hngar, nan ngei kho hlei lo. Nan i doh, nan i vel. Asinain nan hal lo caah nan ngei lo.

³ Nan hal, nan hmu lo, zeicatiah a hal nan i palh, nanmah nomhhnaihnâk lawng ah hman nan duh.

⁴ Nannih ṭangdang a kaimi nu le ṭangdang a kaimi pa le hna! Vawlei he i hawikomhnâk hi Pathian he ralchanhnâk a si kha nan hngal lo maw? Cucaah vawlei hawikawm si a duhmi pauh cu Pathian ral ah â cang tawn.

⁵ Asiloah Cathiang nih, “Kan chung i Thlarau a ummi nih hnahchuak lak in a kan ham,” ti hi a sawhsawh in a chim tiah nan ruat maw?

⁶ Asinain zângfahnâk tamchin chin a pêk tawn. Cucaah Cathiang nih, “Pathian nih miporhlaw a doh hna i toidormi kha zângfahnâk a pêk tawn,” tiah a ti.

⁷ Cucaah Pathian sinah i pe u. Khuachia kha doh u law an zâmtâk hna lai.

⁸ Pathian naih u law, Amah zong nih an naih hna lai. Nannih misual hna, nan kut ṭawl ulaw, ruahnâk set ngei lomi hna, nan lungthin thianter u.

⁹ Zûnngai le ngaihchia in ṭap u! Nan nihchuahnâk ngaichiatnâk ah cang sehlaw, nan i nomhnâk lungkuainâk ah cang seh.

¹⁰ Bawipa hmai ah toi dor u law Amah nih an cawisan hna lai.

¹¹ Unau hna, pakhat le pakhat nan kong i ceihhlah u. A ho pauh nih a unau kong a ceih tikah siseh, a unau a sawi ah siseh, nawlbia a thangchiat i nawlbia a sawi a si. Nawlbia na sawi ah cun nawlbia zultu na si lo i a sawitu na si.

¹² Nawlbia petu pakhat lawng a um, khamh khotu le hrawk khotu kha a si. Nang, midang sawitu cu ahodah na si?

¹³ Atu ah nannih, “Nihin ah maw, Thaizing ah maw, cuka, khaka, khualipi ah kan kal lai, cuka ah kumkhat ka va rau lai, chaw ka let lai i hlawknâk ka hmuh lai,” titu hna;

¹⁴ thaizing ah zeithil dah a tlung lai ti kha na hngal lo. Nan nunnâk cu zeidah a si? Min mei cân tawi te a zâm i a lo ṭhanmi bantuk men hi a si.

¹⁵ Hitihin nan chim deuh awk a si, Bawipa nih rem a ti ahcun, kan dam lai i cucu, kha kha, kan tuah lai,” tiin.

¹⁶ Asinain hmaihngal ngaiin tluang nan khawng. Cubantuk hmaihngalnâk vialte cu sual a si.

¹⁷ Cucaah aho pauh thilṭha tuah awk a hngal ko nain a tuah lo ahcun, a caah sual a si.