JEIM 3 - Laibaibal Thiang (BSI)

¹ Ka u le nau hna, cawnpiaktu nih biaceihnâk a hleiin kan ton lai ti kha hngal in, nanlak ah mi tampi cu cawnpiaktu ah rak um hlah u.

² Zeitintiah kan dihlak in thil tampi ah sualnâk kan tuah tawn. Bia chim lei i a palh lomi cu mi tlamtling a si i a pum â uk khomi a si.

³ Kan bia an ngaih khawh nâkhnga rang kâ ah châk kan banh ahcun an pum kha kan duhnâk lei pauh ah kan mer khawh.

⁴ Tilawng zong khi zohmanh, nganpi an si i thli nih a chawih tawn hna, a kaltertu nih thil hme te hmangin a duhnâk pauh ah a kalter tawn.

⁵ Cubantukin lei zong pumnge fate a si i ngan ngaiin â uah tawn. Zohhmanh u, meici fate nih ram zeitluk ngan dah a kangh tawn.

⁶ Lei hi mei a si, sualpalhnâk vawlei pakhat a si. Lei hi kan pumpuluk thûrter kho dingin chiahmi pumnge a si. Kan kokek ziaza hi a kangh i cucu hell mei in khanghmi a si.

⁷ Zeitintiah ramsa le vate vialte, sermi thilnung hna le ti chung i a nungmi hna zong hi ngamter khawh an si, minung nih an ngamter tawn hna.

⁸ Asinain lei hi a hohmanh nih an ngamter kho lo. Uk khawh lomi sual, thihnâk sivai i a khatmi a si.

⁹ Cu nih cun kan Pathian le Pa kan thangṭhat i cu ṭhiamṭhiam in Pathian lo in sermi kan minung hawi chiat kan serh tawn hna.

¹⁰ Kâ pakhat in thangṭhatnâk le chiatserhnâk a chuakṭi tawn, ka ule nau hna, cubantuk cu a si awk a si lo.

¹¹ Tikhor nih hin ti hna pakhat in a thawmi ti le a khami ti a chuahter bal maw?

¹² Ka ule nau hna, theipi kungah Olive thei a tlai bal maw? Asiloah misur ruangah theipi a tlai kho maw? Cubaktukin ti hnâ pakhat nih ti-al le ti-allo a chuahter bal lo.

¹³ Nanlakah ahodah a fim i a theithiam khomi a um? Â dawhmi nun in an tuahsernâk kha toidornâk in fimnâk i tuahmi a si kha langhter hna seh.

¹⁴ Asinain nan thinlungin a khâ mi hnachuahnâk le mah zawn lawng ruahnâk nan ngeih ahcun biatak cu ruamkai hnawh hlah ulaw, lih in ralchanh fawn hlah u.

¹⁵ Cubantuk fimnâk cu cung leiin a rami a si lo, vawlei thil, thisa le khuachia in a rami a si.

¹⁶ Zeitintiah hnahchuahnâk le mahzawn lawng ruahnâk a umnâk ah cun, buainâk le sualnâk phunkip a um tawn.

¹⁷ Asinain cung leiin a chuakmi fimnâk cu hmaisa bik ah a thiang, cuhnu ah daihnâk a duh, a nun a nem, nawl a ngai, zângfahnâk le theipar ṭha in a khat, thleidan a ngei lo i ziar a ngei lo.

¹⁸ Dinnâk theitlai cu daihnâk sertu hna nih daihnâk in an tuh tawn.