JEIM 2 - Laibaibal Thiang (BSI)

¹ Ka ule ka nau hna, kan Bawipa Jesuh Krih, Sunparnâk Bawipa cu thleidan ngeihbu i zumh phun a si lo.

² Nan i pumhnâk inn ah sui zunghruk hrukmi, thil man sungin â thuammi ra in, culioah mi sifak hnipuan chia â aihmi ra ve sehlaw,

³ thilṭha â hrukmi sinah, “Hi ṭhutnâk ṭha ah hin ṭhu tuah,” nan ti i mi sifak sinah, “Nang cu khi ka ah khin va dir, asiloah, kake chiahnâk ṭuang ah hin ṭhu,” nan ti ahcun,

⁴ thleidan nan ngeihning nan langhter i ruahnâk sual he mi nan sawi a si hnga lo maw?

⁵ Ka dawtmi unau hna, zohhmanh u, Pathian nih hi vawlei thil i misifak hna hi zumhnâk ah rumding le Amah dawtu hna sinah a kamhmi pennâk kha co cawk ah a thimmi an si lo maw?

⁶ Asinain nannih nih mi sifak kha nan mualphoh hna. Mirum hna kha nanmah lamhchihtu le biaceihnâk hmun ah an hnuk tawntu an si lo maw?

⁷ Kawh nan sinâk min ṭha a thangchiattu an si lo maw?

⁸ Cathiang chung i siangpahrang nawlbia, “Nangmah nâ dawt bangin na innpa na dawt lai,” timi nan tlinter ahcun a ṭha;

⁹ asinain thleidannâk nan ngeih ahcun, sualnâk nan tuah i nawlbia lila nih nawlbuartu bangin thiamlo an coter hna lai.

¹⁰ Mizei pauh nih nawlbia vialte zul dih in pakhat te a buar ahcun, a dih lakin a buar a si.

¹¹ “Ṭangdang kai hlah,” titu nih, “Lainawng hlah” a ti fawn. Cuticun ṭângdang na kai lo zongah lai na nawn ahcun nawlbuartu ṭhiamṭhiam na si cang.

¹² Cuticun zolonâk nawlbia bang i biaceih dingin bia chim law, tuah.

¹³ Zeitintiah mi cungah zângfahnâk ngei lomi cu zângfahnâk tel loin biaceih an si lai. Biaceihnâk cu zângfahnâk nih a tei.

¹⁴ Ka unau hna, minih zumhnâk ka ngei tihmanhsehlaw, tuahsernâk a ngeihlo ahcun san a tlai hnga maw? cubantuk zumhnâk nih amah a khamh kho hnga maw?

¹⁵ Unau nu siseh, unau pa siseh taklawng i um in ni fatin rawl ei awk ngeihlah sehlaw,

¹⁶ nanlakah mi pakhat khat nih an sinah, “Hnangam tein um ulaw lum te le khim tein um ko u,” ti sehlaw, taksa ca i a herhmi kha nan pêk lo ahcun zeitindah san a tlaihpi lai?

¹⁷ Cubantukin zumhnâk zong, tuahsernâk um loin, amah lawng a um ahcun, thi a si.

¹⁸ Asinain mi pakhat nih, “Nangnih zumhnâk na ngei i kei nih tuahsernâk ka ngei, na zumhnâk cu tuahsernâk tel loin ka hmuhsak law ka tuahsernâk in ka zumhnâk kan hmuh sak lai,” a ti khawh ko.

¹⁹ Pathian pakhat a um tiah na zumh maw. A ṭha, khuachia zong nih an zumh i an ther tawn dah kaw!

²⁰ Maw mihrutpa tuahsernâk tello i zumhnâk lawng cu zeihmanh a si lo kha na hngal duh taktak maw?

²¹ Kan pa Abraham nih a fapa Isak biakṭheng i a pêkchanh lio ah khan tuahsernâk in a si lo maw thiam a co kha?

²² Zumhnâk cu a tuahsernâk he an ṭangṭi, cuticun tuahsernâk nih zumhnâk cu tlam a tlinter a si lo maw?

²³ “Abraham nih Pathian a zumh i cucu a dinnâk ah ruahpiak a si,” tiah a timi Cathiang kha a tlinter. Cuticun Pathian hawikawm tiah kawh a si.

²⁴ Cuticun zumhnâk thawng lawng si loin tuahsernâk thawngin mi nih thiam a co tawn tiah nan theih.

²⁵ Cubantuk ṭhiamṭhiam in Rabab hlawhhlang nu zong nih khan ngiathlaitu kha a rak cohlan hna i lamdang i a tlunter hna ah khan, tuahsernâk in thiam a co a si lo maw?

²⁶ Zeitintiah taksa hi thlarau tello cun thi a si, cubangin zumhnâk hi tuahsernâk tello cun thi a si.