JEIM 1 - Laibaibal Thiang (BSI)

¹ Jeim, Pathian le Bawipa Jesuh Krih sal nih, kakipah â ṭhenmi miphun 12 nan kut an tlaih hna.

² Ka unau hna, nan zumhnâk hneksaknâk nih inkhawhnâk a chuahter ti kha hngal in,

³ hniksaknâk phunkip nan ton tikah lomhnâk lawng te ah ruat u.

⁴ Inkhawhnâk nih, a tuah hngami tlamtling tein tuah sehlaw, zeihmanh bau loin nan tlam a tling lai i tlamtlinnâk ah nan um kho lai.

⁵ Nan lakah fimnâk a baumi nan um ahcun, Pathian sinah hal seh law, mi vialte sinah siangngai le uilo tein a pe tawntu nih a pêk lai.

⁶ Asinain lungawṭawm lo in zumhnâk in hal seh, zeitintiah lungawṭawmmi cu thli nih rihli a hranh i tilet a thomi bantuk an si.

⁷ Cubantuk minung ruahnâk phir a ngei i a zulhmi lam pauh i a fek lomi nih,

⁸ Bawipa sin in zeihmanh a hmuh lai kha i ruahchan hlah seh.

⁹ A dirhmun a niammi unau cawisan a si tikah i lawm seh,

¹⁰ asinain mirumpa cu niamter a si ruangah i lawm seh; zeicatiah ram lak pangpar bangin a lotlau dingmi a si.

¹¹ Ni a rak san i thlilum a hran tikah hramh cu a uai, a par kha an tla i â dawhnâk a lo cawlh. Cubantukin mirum hna cu an lamthluan ah an loral ko lai.

¹² Tukforhnâk lungsau in a tuartu cu mi vanṭha a si, zeitintiah hngalhpiak a si tikah nunnâk luchin, Bawipa nih Amah dawtu hna ca i a timhpiakmi kha a co lai.

¹³ Tukforh a si tikah ahohmanh nih Pathian nih aka tukforh ti hlah seh, sual nih Pathian a tukforh kho lo. Amah zong nih ahohmanh a tukforh bal lo.

¹⁴ Mikip mahduhnâk cio tuah awkah hruai le hnuh an si tikah tukforhnâk an ton a si deuh.

¹⁵ Duhnâk nih fa a pawi i sualnâk a hrin tawn; sualnâk a upat tikah thihnâk a phâkpi tawn.

¹⁶ Ka dawtmi unau hna hlenin um hlah u.

¹⁷ Thilpêk ṭha le tlam a tlingmi thilpêk hna cu cung leiin ceunâk petu Pa sinin a rami an si, Amah ah ceunâk le muisam â thleng bal lo.

¹⁸ A sermi hna lakah hmasa bik theitlai kan si khawh nâkhnga, Amah duhning tein bia tak chungah a kan hrin.

¹⁹ Cucaah unau dawtmi hna, mikip bia ngai dingin khulrang sehlaw, bia chim ding le thinhung dingah khulnuar seh,

²⁰ zeitintiah minung thinhunnâk nih Pathian dinnâk a chuahpi kho lo.

²¹ Cucaah thûrhnomhnâk le suahsualnâk i a khat i a liammi vialte cu chia hna ulaw, bunhmi bia, nan nunnâk a khamh khotu kha tangdornâk in cohlang u.

²² Asinain mah le mah â hlengmi bangin, biangaitu lawng si loin nunpitu si u.

²³ Zeitintiah biangaitu lawng si i a nunpi lomi cu thlalang i ṭha tein a mui â zohmi bantuk a si,

²⁴ zeitintiah ṭha tein â zoh i a kal hnu ah mi zeidah a si â hngal ti lo.

²⁵ Asinain a tlingmi nawlbia, zalonnâk nawlbia hi ṭha tein a zoh i nunpi cawlh in a philh ti lomi cu a tuahmi kipah thluachuah a hmu lai.

²⁶ Mizei pauh biaknâk minungah â ruat nain a lei ṭha tein a kilveng lomi cu, amah le amah â hlengmi a si, cubantuk biaknâk cu zeihmanh a si lo.

²⁷ Pathian le kan Pa mithmuhah a thiang i a thûrhnawm lomi biaknâk cu ngakṭah le nuhmei an har lio i bomhchanh le hi vawlei thûrhnomhnâk chungin i thianter hi a si.