HEBRU 7 - Laibaibal Thiang (BSI)

¹ Zeitintiah hi Melkhizedek, Salem siangpahrang, Pathian Cungnung Bik Tlângbawi, siangpahrang hna thattu Abraham a rak kir i a rak dongtu le thluachuah a rak petu,

² Abraham zong nih zeizong vialte ah cheuhra cheukhat a rak pêkmi pa kha, a hram thawk ah, “dinnâk siangpahrang” ti a rak si; cu hnu ah Salem siangpahrang ti a si, a sullam cu, “daihnâk siangpahrang” tinâk a si.

³ Amah cu pa ngeilo, nu ngeilo, hringsortu ngeilo, hramthawknâk le donghnâk zong ngei lomi Pathian Fapa bangin canter a si i peh thliah mahin tlângbawi a si.

⁴ Cuticun hringtu Abraham hmanh nih hranchaw chungin cheuhra cheukhat a rak pekmi minung a lianhngan ning cu ruat hmanh u.

⁵ Levi fale lakah tlângbawi rian a cotu hna nih nawlbia bangin mizapi hna sinin cheuhra cheukhat lâknâk nawl an hmuh taktak, cu hna cu Abraham cibawm chungin a rami an si nain an unau hna sinin a si.

⁶ Asinain anmah hrinthlakmi zong a si lomi nih Abraham sinin cheuhra cheukhat a lâk i biakamnâk ngeitu kha thluachuah a pêk.

⁷ Cuticun el khawh lo in a hme deuhmi cu a ngan deuh nih thluachuahnâk a pêk.

⁸ Hika ah a thikhomi nih cheuhra cheukhat an co nain cuka ah cun a nung tiah hngalhpitu hna nih an co tawn.

⁹ Levi, cheuhra cheukhat a cotu zong nih, Abraham hmangin cheuhra cheukhat a rak pêk ve ko, ti khawh a si.

¹⁰ Zeitintiah Melkhizedek nih a rak donlio ah khan a pa cibawm chungah a rak um diam cang.

¹¹ Cucaah Levi phun tlângbawi sinâk in tlamtlinnâk cu hmuh khawh a si ahcun (cutangah cun mizapi nih nawlbia kha an hmuh i) Âron sining i kawh a si lomi, Melkhizedek sining in tlângbawi dang um cu zeidah a herh?

¹² Zeicatiah tlângbawi sinâk â thlen ruangah nawlbia zong thlen a herh ve.

¹³ Zeitintiah hi a kong an chimmi pa hi mi phundang a si i cuhna phun chungin ahohmanh nih biakṭheng ah rian an ṭuan bal lo.

¹⁴ Zeitintiah kan Bawipa cu Judah phun chungin a chuakmi a si kha a fiang, tlângbawi kong he pehtlai in Moses nih cu miphun chungin zeihmanh a chim lo.

¹⁵ Cun Melkhizedek sining bangin tlângbawi dang a rak chuah ahcun kan chim ciami kha a fiang chin chin,

¹⁶ amah cu thisa phung i nawlpêkmi bantuk si loin, nun dongh ngeilo ṭhawnnâk bantukin a ra.

¹⁷ Zeitintiah, “Nangmah cu, Melkhizedek Tlângbawi si ningin zungzal tlângbawi na si,” tiah a hngalhter.

¹⁸ Zeitintiah nawlpêk hmasa kha a der i san a tlaihlo ruangah hlawt a rak si,

¹⁹ zeitintiah nawlbia nih zeihmanh a tlinter kho lo; kap khat leiah, ruahchannâk ṭha deuh phâkter a si i cu nih cun Pathian kha a kan naihter.

²⁰ Cun chiat i serhnâk um loin tlângbawi siter zong an si lo.

²¹ (annih cu chiat i serh lo i tlângbawi siter an si, asinain a nih tlângbawi i sertu nih cun chiat i serh in hi bia hi a chim, “BAWIPA nih chiat â serh i â lêt ti lai lo, ‘Nangmah cu Melkhizedek Tlângbawi si ningin zungzal tlângbawi na si,”)

²² cutluk tam in Jesuh cu a ṭha chin chinmi biakamnâk fehtertu a rak si.

²³ tlângbawi tampi an rian pehzul kholo dingin thihnâk nih a khammi hna zong an um.

²⁴ Asinain anih cu, â thleng kho lomi tlângbawi sinnâk a ngeih caah a pehzulh zungzal ko.

²⁵ Cucaah Amah lan in Pathian sinah a rami hna cu a dongh tiangin a khamh khawh hna, zeicatiah an ca i nawlpiak dingin zungzal i a nun peng caah.

²⁶ Zeitintiah cubantuk Tlângbawi Nganbik, a thiangmi, fahnâk pe ballo, thûrter lomi, misual hna sin in thleidanmi, van nâkin a sâng deuhmi cu kan ngeih awk ah â tlakmi a si.

²⁷ Amah nih cu tlângbawi nganbik hna bantukin ni chiarte, Amah sualnâk caah raithawinâk pêk tain, cuhnu ah mizapi sualnâk ca i raithawinâk pêk ta kha a herh ve lo, zeicatiah Amah le Amah â pêk ah khan a lîm dih cang.

²⁸ Zeitintiah nawlbia nih derthawmnâk a ngeimi minung kha tlângbawi ngan ah a ruah tawn nain nawlbia umhnu ah chiat i serhnâk bia nih, Fapa, zungzal ca i tlintermi kha a ruah.