HEBRU 5 - Laibaibal Thiang (BSI)

¹ Zeitintiah Tlângbawi Ngan bik cu minung sinin thimmi, minung caah Pathian sinah sual raithawinâk le thilpêk pêchântu ah ruahmi an si.

² Anih cu theihhngalhnâk a ngei lomi le lam a pialmi vel a ngeih khawh hna, zeicatiah Anih zong derthawmnâk tangah a um tawn caah a si.

³ Hiruangah hin mizapi ca lawngah si loin, amah ca zongah sual thawinâk cu a pêk ve awk a si.

⁴ Âron bang i Pathian kawhmi dah tilo, ahohmanh nih cubantuk mah le mah upatnâk cu an la bal lo.

⁵ Cubangin Krih zong Tlângbawi Nganbik si dingin Amah le Amah sunparnâk â pe lo. “Nangmah cu ka Fapa na si, nihinah kan hrin,” tiah a sin i a chimtu nih khan sunparnâk cu a pêk.

⁶ “Nangmah cu Melkhizedek si ningin, zungzal Tlângbawi na si,” tiah hmun dang zongah a rak chim.

⁷ Anih nih taksa i a um lio ah khan, thihnâk in Amah khamhkhotu sinah, fakpi i aihrâmnâk le mitthli he thlacamnâk le nawlnâk kha a tuah, Pathian a ṭih tawn caah a thlacamnâk kha theihpiak a si.

⁸ Fapa asikonain, a tuarmi thil ah nawlngaih kha a cawn,

⁹ Tlamtlinter a si hnu ah, a nawl ngaitu vialte caah zungzal khamhnâk hrampi ah a cang.

¹⁰ “Melkhizedek tlângbawi si ningin” Pathian kawhmi Tlângbawi Nganbik a si.

¹¹ Cu kongah chim awk tampi kan ngei nain nan theihnâk hnâ a cheh caah chimfian a har.

¹² Zeitintiah atu cân hna ah cun cawnpiaktu hmanh nan si awk a si cang ko nain, Pathian bia hramthawknâk cawnpiaktu nan herh ko rih, rawlhak si loin hnuk i cawmchan nan herh ko rih.

¹³ Zeitintiah hnuk a dingmi pauh cu bawhte a si ruangah, dinfelnâk bia kha a theifiang kho lo.

¹⁴ Asinain rawlhâk cu puitling mi hna caah a si i an rak hman tawn cang bantukin a chia le a ṭha thleidang kho dingin an hngalhkhawhnâk kha hmang kho dingin cawlcanghter an si cang.