HEBRU 4 - Laibaibal Thiang (BSI)

¹ Cucaah, ṭih u sih, a dinhnâk chung luhnâk biakam a hmunh lio ahhin nan lakah a tling lomi nan um sual lai.

² A ngaingai tiah, kan sin i chim a si bangin Thawngṭha kha an sin zongah chim a si ve ko, asinain a ngaitu hna nih zumhnâk he an fonh hna lo ruangah an ngaihmi bia kha san an tlaihpi lo.

³ Zeitintiah vawlei ser ka in rian kha lîm dih asinain thin hungin chiat kâ rak serh cang bang khan, ka dinhnâk ah an lut lai lo, tiah a rak chim cang. Cuticun kannih zumtu hna hi cu dinhnâk ah cun kan lut cang.

⁴ Zeitintiah ni sarih kong cu hitihin hmun khatah a rak chim cang; “Ni sarih ni ah Pathian nih a rian ṭuanmi vialte a dinhtâk,”

⁵ cun hi hmun ah hin, “Ka dinhnâk ah an lut lai lo,” tiin a chim ṭhân.

⁶ Cucaah mi cheukhat hna caah luhkhawh a si ko rih, Thawngṭha chim a thei hmaisatu hna kha nawlngaih lonâk ruangah an luh khawh lo caah,

⁷ David nih ni zeimaw kha “Nihin” tiin a ruah i cân saupi hnu ah: “Nihin ah” hin a aw nan theih ahcun, nan lung ṭhawnter hlah u,” tiah a rak ti ṭhân.

⁸ Joshua nih khan dinhnâk rak pe hna sehlaw, a hnu ah ni dang chim ṭhân a herh ti lai lo.

⁹ Cucaah Pathian mile hna caah dinhnâk a um ko rih.

¹⁰ Zeitintiah a dinhnâk ah a lut i â dinmi hna nih Pathian nih a tuah bang khan a rian ṭuanmi kha a dinhtâk tawn.

¹¹ Cucaah cu dinhnâk ah lut dingin i zuam u sih, culoahcun nawl a ngai lomi hna bangin kan tlu ve sual lai.

¹² Zeitintiah Pathian bia cu a nung i a ṭhawng, kaphnih har vainam nâkin a har deuh, nunnâk le thlarau, hliahhlok le thlik tiangin hlang lakin a cheu khawh, lungthin in timhmi le ruahnâk kha a hngalh dih.

¹³ Sermi thil a mithmuh ah thuhmi zeihmanh a um lo, kan kong kan chimnâk ding Pa mithmuh ah zeizong vialte taklawng le oncia in a um dih.

¹⁴ Cuticun van hmanh i a lan cangmi a lianngan Tlângbawi Nganbik, Jesuh, Pathian Fapa kan ngeih caah, kan zumhnâk hi fek tein i tlaih u sih.

¹⁵ Zeitintiah kan derthawmnâk a kan ruahpiak kho lotu Tlângbawi Ngan a ngeitu kan si lo, kanmah bangin a phun kipin tukforhnâk a rak tong nain, a sual lomi ngeitu kan si.

¹⁶ Cucaah bomh kan herh cân ah vel le zângfahnâk kan co khawh nâkhnga zângfahnâk ṭhutdanh cu ralṭha in panh u sih.