HEBRU 3 - Laibaibal Thiang (BSI)

¹ Cucaah, a thiangmi unau, vanlei kawhnâk a comi hna, kan zumhnâk i lamkaltu le Tlângbawi Nganbik Krih Jesuh kha ruat tuah u.

² Moses kha Pathian chungkhar pumpi caah zumhtlâk a si bangin, Amah zong a dirhmun i a chiatu caah zumh a tlâk ve.

³ Zeitintiah inn satu cu a sakmi inn nâkin upat deuh a si bantukin anih zong Moses nâkin upatnâk co awktlâk ah ruah a si.

⁴ Zeitintiah inn pauh pauh cu mi pakhat khat sakmi an si nain zeizong vialte satu cu Pathian a si.

⁵ Moses kha a hnu ah an chim te laimi thil hna hngalhpitu a si khawh nâkhnga Pathian chungkhar vialte lakah zumh a tlâk tak takmi sal a si,

⁶ asinain Krih cu Fapa bangin Pathian chungkhar cungah zumhtlâk a si i chungkhar cu kanmah hi kan si, a dongh tiangin duh a nungmi zumhnâk le ruahchannâk kha kan i tlaih ahcun.

⁷ Cucaah Thiang Thlarau chim bangin, “Nihin ah, a aw nan theih ahcun,

⁸ ramcar i hneksaknâk ni bang khan nan lungthin hahter hlah u;

⁹ Cuka ah nan hringtu hna nih anka hneksak i anka zuamcawh, kum 40 chung ka tuahmi kha an hmuh.

¹⁰ Cucaah kha chan hna cungah ka thin a hung, cun an lungthin in an pial zungzal, ka lam kha an hngal lo,” tiah ka ti.

¹¹ Cuticun thin hungin chiat kâ serh i, “Ka dinhnâk ah an lut lai lo,” tiin.

¹² Unau hna, i ralring u, culoahcun Pathian nung kaltâk duhnâk tiangin nanmah lakah mi zeimaw chungah zumhlonâk lungthin sual a um sual lai.

¹³ “Nihin” an ti lio ah hin ni chiar tein thazâng i pe u, culoahcun nan lakah mi zei pauh sual hlennâk in lung hahtermi nan si sual lai.

¹⁴ Zeitintiah Krih cotu kan si a hramthawk i kan zumhnâk kha a dongh tiang fek tein kan i tlaih ahcun,

¹⁵ “Nihin ah a aw nan theih ahcun, an ralchanh lio bang khan, nan lung hahter hlah u,” tiah ti a si.

¹⁶ Ahodah thei ko nain ralthomi hna kha? A ngaingai tiah, Ezip ramin Moses nih a chuahpi mi vialte kha an si lo maw?

¹⁷ Aho cungahdah kum 40 chung a thin a hun kha? Sualnâk an tuah i ramcar ah an ruak a tlumi kha an si lo maw?

¹⁸ Cun ahosinahdah a dinhnâk chung i lut lo dingin chiat a serh hnawhmi hna kha? A bia a ngai lomi hna kha an si lo maw?

¹⁹ Cuticun zumhlonâk ruangah an lut kho lo ti kha kan hngalh.